ខេត្តស្ទឹងត្រែង ៖ ស្ត្រីជាម្តាយយំសោកបោកខ្លួន ខណៈកូនស្រីម្នាក់អាយុ៦ឆ្នាំបានស្លាប់ភ្លាមៗនៅកន្លែងកើតហេតុ បន្ទាប់ពីរថយន្តបែនមួយគ្រឿងកិនចំក្បាល ក្នុងគ្រោះថ្នាក់ចរាចរណ៍រវាងម៉ូតូមួយគ្រឿងជិះគ្នា៤នាក់វាក់អើនឹងរថយន្តបែនដឹកដីមួយគ្រឿង ហើយម៉ូតូក៏ចាប់ហ្វាំងរួចទាក់ដៃចង្កូតជាមួយរថយន្ត បណ្ដាលឱ្យដួលម៉ូតូធ្វើឲ្យក្មេងស្រីម្នាក់ខ្ទាតចូលទៅក្រោមកង់រថយន្តកិនបែកក្បាលភ្លាមៗតែម្តង ចំណែកមនុស្ស៣នាក់ទៀតបានរងរបួសស្រាល។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោងប្រមាណ៥និង៣០ល្ងាចថ្ងៃទី១៤ កុម្ភៈឆ្នាំ២០១៩ ត្រង់ចំណុចផ្លូវបែកជាបួនខាងមុខផ្ទះសំណាក់មេគង្គ ស្ថិតក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។
សមត្ថកិច្ចចរាចរណ៍ផ្លូវគោកបានឲ្យដឹងថា ភាគីខាងម៉ូតូមួយគ្រឿងជិះគ្នា៤នាក់ម៉ាកហុងដា ស៊េរីឆ្នាំ២០០៩ បើកបរដោយឈ្មោះរៀម សុផល ភេទស្រី អាយុ២០ឆ្នាំ ត្រូវជាម្តាយ បានរបួសស្រាល រីឯអ្នករួមដំណើរចំនួន៣នាក់រួមមានឈ្មោះគ្រី សុឆៃដា ភេទស្រី អាយុ៦ឆ្នាំ ត្រូវជាកូន បានស្លាប់នៅនឹងកន្លែងកើតហេតុ និងអ្នករួមដំណើរចំនួន២នាក់ទៀតមិនស្គាល់អត្តសញ្ញាណ បានរងរបួសស្រាល ។ ជនរងគ្រោះទាំង៤នាក់រស់នៅភូមិគីឡូម៉ែត្រលេខ៨ សង្កាត់សាមគ្គី ក្រុងស្ទឹងត្រែង ។
ចំណែកភាគីខាងរថយន្តបែនដឹកដី ប្រភេទទម្ងន់២តោនកន្លះ ពណ៌ខៀវ ពាក់ស្លាកលេខ ភព ៣-៨០៦៨០ បើកបរដោយឈ្មោះវ៉ាន់ សុផា ភេទប្រុស អាយុ១៩ឆ្នាំ រស់នៅភូមិកោះហិប ឃុំអន្លង់ស្វាយ ស្រុកថាឡាបរិវ៉ាត់ ត្រូវសមត្ថកិច្ចចាប់ឃាត់ខ្លួន។
សមត្ថកិច្ចចរាចរបានបន្តឲ្យដឹងទៀតថា នៅពេលមុនកើតហេតុ គេបានឃើញរថយន្តបែនដឹកដីបើកបរឆ្លងកាត់ចំណុចផ្លូវបំបែកជាបួនមុខផ្ទះសំណាក់មេគង្គ ពេលឆ្លងជិតផុតផ្លូវកៅស៊ូចូលផ្លូវលំ ក៏ស្រាប់តែមានម៉ូតូម៉ាកហុងដាមួយគ្រឿងជិះគ្នា៤នាក់ បើកបរក្នុងទិសដៅពីត្បូងមកជើងក៏វាក់អើនឹងរថយន្តបែនដឹកដី រួចម៉ូតូក៏ជាន់ហ្វ្រាំងធ្វើឱ្យទាក់ដៃចង្កូតជាមួយរថយន្ត បណ្តាលឲ្យដួលម៉ូតូ ហើយខ្ទាតក្មេងស្រីរងគ្រោះចូលក្រោមកង់ក្រោយរថយន្តកិនបែកក្បាលធ្លាយខួរស្លាប់ភ្លាមតែម្តង ។ រីឯអ្នកបើកបរម៉ូតូ និងអ្នករួមដំណើរចំនួន២នាក់ទៀតបានរងរបួសស្រាល ។ ចំណែកអ្នកបើកបររថយន្តត្រូវបានសមត្ថកិច្ចចាប់ឃាត់ខ្លួន ។
ក្រោយកើតហេតុ កម្លាំងសមត្ថកិច្ចចុះមកធ្វើការវាស់វែងនាំយកទាំងរថយន្តនិងម៉ូតូទៅកាន់ស្នងការដ្ឋាននគរបាលខេត្តដើម្បីចាត់ការតាមនីតិវិធី ។ ចំណែកសពក្មេងស្រីរងគ្រោះត្រូវបានក្រុមគ្រួសារសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ