ខេត្តឧត្តរមានជ័យ ៖ សេចក្តីរាយការបឋមឲ្យដឹងថា កាលពីវេលាម៉ោង១១និង៥០នាទីព្រឹកថ្ងៃទី១៤ ខែកុម្ភៈ នៅភូមិសំរោង សង្កាត់សំរោង ក្រុងសំរោង មានករណីជាងផ្សារដែកម្នាក់បានប្រើម៉ូទ័រកាត់ និងយកបំពង់ខ្យល់ទៅបាញ់ទម្លុះធុងសាំង បណ្តាលឲ្យផ្ទុះរងរបួសបាក់ជើង។
ហេតុការណ៍នោះបានបង្កឱ្យមានការភ្ញាក់ផ្អើលកើតឡើងនៅយានដ្ឋានជួសជុលគ្រឿងយន្តរបស់ឈ្មោះ សួស សាវិន ស្ថិតនៅភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ ។
ជនរងគ្រោះឈ្មោះ ឈុត ហៃ ភេទប្រុស អាយុ១៥ឆ្នាំ មុខរបរជាកម្មករ រស់នៅភូមិ.ឃុំកើតហេតុខាងលើ ។
តាមប្រភពពីជនរងគ្រោះបានប្រាប់សមត្ថកិច្ចឱ្យដឹងថា នៅវេលាកើតហេតុខាងលើ គាត់បានម៉ូទ័រកាត់ធុងសាំងចំណុះ២០០លីត្រ បន្ទាប់មកបានយកបំពង់ខ្យល់ទៅបាញ់ទម្លុះ ដោយមិនបានបើកគំរបចេញនោះទេ ធ្វើឲ្យផ្ទុះលាន់ដូចគ្រាប់បែក បណ្តាលឲ្យរបួសជើងខាងឆ្វេងតែម្តង ។ បន្ទាប់ពីកើតហេតុ ជនរងគ្រោះត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ