ខេត្តប៉ៃលិន ៖ ស្ពានបេតុងប្រវែង៦០ម៉ែត្រឆ្លងកាត់ស្ទឹង ស្ថិតនៅក្នុងភូមិថ្នល់កែង ឃុំអូរអណ្តូង ស្រុកសាលាក្រៅ កំពុងត្រូវបានបើកការដ្ឋានសាងសង់ជាបណ្តើរៗ ក្រោមគម្រោងថវិការបស់ក្រសួងអភិវឌ្ឍន៍ជនបទ ដែលស្ថាបនាដោយកងវិស្វកម្ម អគ្គបញ្ជាការ នៃកងយុទ្ធិពលខេមរភូមិ ។
ប្រភពព័ត៌មានពីអាជ្ញាធរមូលដ្ឋានបានឲ្យដឹងថា កាលពីដើមឡើយ នៅចំណុចស្ទឹងមួយនេះ មិនមានស្ពានថ្ម ឬស្ពានឈើអ្វីឆ្លងនោះទេ មានការលំបាកយ៉ាងខ្លាំងទើបតែរយៈពេលប៉ុន្មានឆ្នាំចុងក្រោយនេះមានគេធ្វើស្ពានឈើសម្រាប់ឆ្លងទៅមក ។ ប៉ុន្តែត្រូវបង់លុយជាប្រចាំថ្ងៃក្នុងការឆ្លងម្តងបង់ប្រាក់អស់៥០០រៀល ប្រសិនឆ្លងទៅមកអស់១០០០រៀលផងដែរ ។
ប្រភពព័ត៌មានបានឲ្យដឹងទៀតថា ស្ពានឈើ ដែលគេធ្វើឲ្យឆ្លងហើយយកលុយនោះគឺបានឆ្លងតែខែប្រាំងដែលទឹកស្ទឹងមិនឡើងប៉ុណ្ណោះ ប្រសិនបើមានទឹកជំនន់ម្តងៗគឺមិនបានឆ្លងទៅមកនោះឡើយដោយសារមានការពិបាកខ្លាំងសម្រាប់ប្រជាពលរដ្ឋនៅតំបន់នេះ ជាពិសេសគឺសិស្សសាលាតែម្តងដែលឆ្លងទៅរៀននៅវិទ្យាល័យម្តងៗវេទនាខ្លាំង ហើយចំពោះបញ្ហាពិបាកធ្វើដំណើរនេះអាជ្ញាធរភូមិ-ឃុំបានដាក់ពាក្យស្នើរសុំទៅស្រុករហូតដល់ថ្នាក់ខេត្តផងដែរតែមិនទាន់មានការឆ្លើយតបឡើយ ។
ប្រភពព័ត៌មានបានបន្តទៀតថា នៅពេលនេះប្រជាពលរដ្ឋទាំងនោះលែងមានការព្រួយបារម្ភអ្វីទៀតហើយព្រោះក្រសួងអភិវឌ្ឍន៍ជនបទបានចាប់ផ្តើមបើកការដ្ឋានសាងសង់ស្ពាននៅចំណុចនេះដើម្បីជួយសម្រួលដល់ការធ្វើដំណើររបស់អ្នកភូមិ ។
បើតាមប្រជាពលរដ្ឋរស់នៅតំបន់ខាងលើនេះបានលើកឡើងថា ពេលរដូវវស្សាមានភ្លៀងធ្លាក់ខ្លាំងមិនអាចធ្វើដំណើរកើតនោះទេ សិស្សទៅរៀនក៍មិនបានពិបាកឆ្លងទឹកស្ទឹងព្រោះទឹកហូរបុកខ្លាំងគឺពិតជាលំបាកខ្លាំងណាស់ទើបតែរយៈពេលប៉ុន្មានឆ្នាំចុងក្រោយនេះគេធ្វើផ្លូវស្ពានតែត្រូវបង់លុយពេលដើរឆ្លង ។
ប្រជាពលរដ្ឋបញ្ជាក់ថា ក្នុងនាមពួកគាត់ជាពលរដ្ឋរស់នៅក្នុងភូមិហើយដើរឆ្លងកាត់ស្ទឹងមួយនេះពិតជាសប្បាយរីករាយក្រៃលែង និងសូមថ្លែងអំណរគុណដល់អាជ្ញាខេត្តមន្ទីរជំនាញអភិវឌ្ឍន៍ជនបទ ពិសេសរាជរដ្ឋាភិបាលកម្ពុជាដែលមានសម្តេចជាប្រមុខបានយកចិត្តទុកដាក់ ក្នុងការកសាងស្ពានមួយកន្លែងនេះសម្រាប់ជួយសម្រួលដល់ការធ្វើដំណើរឆ្លងកាត់របស់ពលរដ្ឋដែលទៅមកជារៀងរាល់ថ្ងៃជាពិសេសគឺសិស្សសាលាតែម្តង ៕
ចែករំលែកព័តមាននេះ