ខេត្តក្រចេះ ៖ ពពួកសត្វខ្ទីងតូច-ធំដែលជាសត្វព្រៃដ៏កម្រ ត្រូវពលរដ្ឋនិយាយថា តែងតែប្រទះឃើញដើរចេញពីព្រៃ មកសំងំស៊ីស្មៅក្នុងព្រៃចម្ការរបស់អ្នកភូមិខាងក្រោយឃុំកំពង់ដំរី ស្រុកឆ្លូង ខេត្តក្រចេះ ។ ជាក់ស្តែង…
ខេត្តក្រចេះ ៖ ពពួកសត្វខ្ទីងតូច-ធំដែលជាសត្វព្រៃដ៏កម្រ ត្រូវពលរដ្ឋនិយាយថា តែងតែប្រទះឃើញដើរចេញពីព្រៃ មកសំងំស៊ីស្មៅក្នុងព្រៃចម្ការរបស់អ្នកភូមិខាងក្រោយឃុំកំពង់ដំរី ស្រុកឆ្លូង ខេត្តក្រចេះ ។
ជាក់ស្តែង ខ្ទីង៦ក្បាលត្រូវបានពួកគាត់ប្រទះឃើញសារជាថ្មី នៅក្នុងព្រៃចម្ការកៅស៊ូក្បែរព្រៃសហគមន៍មួយកន្លែង នៅខាងក្រោយ ស្រុកឆ្លូង កាលពីថ្ងៃទី១៣ កុម្ភៈ ។ ជាមួយនិងការប្រទះឃើញនេះដែរ ក៏មានមតិខ្លះលើកឡើងថា ដោយសារតែពពួកសត្វទាំងនេះអស់ព្រៃសម្រាប់ជ្រក ទើបបានជាពួកវារត់មកជ្រកនៅតាមតំបន់ព្រៃក្នុងចម្ការកៅស៊ូ ។ ហើយមតិខ្លះទៀត បានថា ហ្វូងសត្វខ្ទីងទាំងនេះ អាចទំនងរត់គេចពីការប្រមាញ់របស់ក្រុមព្រានដូចជាការបបាញ់ និងដាក់អន្ទាក់ ទើបគេចមកសំងំនៅក្បែរៗព្រៃនេះ ។
ប្រធានសង្កាត់រដ្ឋបាលព្រៃឈើឆ្លូង លោក ផូង ឃុនឡាយ បានថ្លែងឱ្យដឹងថា សត្វខ្ទីងទាំងនេះ សព្វថ្ងៃរស់នៅក្នុងព្រៃសហគមន៍អភិរក្សវាលកន្សែង ស្ថិតនៅភូមិវាលកន្សែង ឃុំកំពង់ដំរី ស្រុកឆ្លូង ។ ព្រៃសហគមន៍វាលកន្សែងនេះ ជាដីព្រៃអភិរក្សមានមានទំហំជាង១ពាន់ហិកតា ។ ក្នុងព្រៃនោះសព្វថ្ងៃ មានពពួកសត្វព្រៃជាច្រើនប្រភេទ កំពុងរស់នៅដូចជាសត្វខ្ទីង, សត្វជ្រូកព្រៃ និងសត្វស្វា ព្រមទាំងពពួកសត្វស្លាបផ្សេងទៀត ។
លោកបន្តថា កាលពីមុនព្រៃសហគមន៍នេះ មានសត្វខ្ទីងរស់នៅជាង៣០ក្បាល តែក្រោយពីស្ថានភាពការព្រៃតំបន់នោះ ត្រូវបានលួចកាប់ទន្ទ្រាន ធ្វើឲ្យសត្វខ្ទីងមួយចំនួន ត្រូវបានរត់គេចដោយនៅសល់តែចំនួនជាង១០ក្បាលតែប៉ុណ្ណោះ ដែលកំពុងតែរស់នៅក្នុងព្រៃនោះ។ កន្លងមក លោកធ្លាប់ទទួលបានការប្តឹងរាយការណ៍ពីពលរដ្ឋលើពពួកហ្វូងសត្វខ្ទីង ដែលតែងតែចូលទៅក្នុងចម្ការស៊ីកូនដំណាំរបស់អ្នកភូមិ ។
ជាមួយគ្នានោះ ក្រុមមន្ត្រីជំនាញបានចុះអប់រំពលរដ្ឋជាអ្នកចម្ការទាំងនោះ ហាមមិនឱ្យមានការបបាញ់សម្លាប់ឬចាប់សត្វទាំងនេះក្នុងរូបភាពណាមួយនោះទេ គឺត្រូវតែរួមគ្នាអភិរក្សសត្វព្រៃ ។
ចែករំលែកព័តមាននេះ