រាជធានីភ្នំពេញ ៖ ក្នុងរយៈពេលពីរបីឆ្នាំចុងក្រោយនេះ ការផ្លាស់ប្តូរពីការប្រើរ៉ឺម៉កកង់បីខ្មែរ មកប្រើប្រាស់ កង់បី នាំចូលពីប្រទេសឥណ្ឌាកាន់តែច្រើន បានធ្វើអោយឱកាសអាជីវកម្មនៃការនាំចូល និងចែកចាយ កង់បីឥណ្ឌា នៅក្នុងប្រទេសកម្ពុជាកាន់តែច្រើនឡើង ជាក់ស្ដែងគេសង្កេតឃើញនៅលើដងផ្លូវនានាក្នុងរាជធានីភ្នំពេញ ស្ទើរតែមានវត្តមានកង់បីខ្មែរហើយ និងបានផ្លាស់មកវិញនូវ កង់បីឥណ្ឌា ។ ដោយមើលឃើញពីតម្រូវការជាបន្តបន្ទាប់បែបនេះ ក្រុមហ៊ុន Bajaj បានបន្ថែមការនាំចូល កង់បីសេរីថ្មី មកកាន់ប្រទេសកម្ពុជា ដើម្បីបំពេញតម្រូវការរបស់អ្នកប្រកបអាជីវកម្ម កង់បី ។
កាលពីល្ងាចថ្ងៃទី ១១ កុម្ភៈ ២០១៩នេះ ក្រុមហ៊ុន Bajaj បានប្រកាសសម្ពោធនាំចូលរ៉ឺម៉កកង់បីមួយប្រភេទទៀតដែលមានឈ្មោះថា បងធំ Bajaj Maxima Z (បាចាច ម៉ាក់ហ្ស៊ីម៉ា ហ្ស៊ីត) នៅសណ្ឋាគារហ៊ីម៉ាវ៉ារី រាជធានីភ្នំពេញ ដោយមានការចូលរួមពីអ្នកចែកចាយជាច្រើនផងដែរ ។
បើតាមតំណាងក្រុមហ៊ុន បានអោយដឹងថា តាមពិតទៅ កង់បីនេះ មានវត្តមាននៅក្នុងប្រទេសកម្ពុជាអស់រយៈពេលប៉ុន្មានខែមកហើយ បានធ្វើពិធីសម្ភោធជាផ្លូវការ ទើបធ្វើពិធីផ្លូវការ ដើម្បីបង្ហាញដល់អ្នកចែកចាយ និងអតិថិជនរបស់ខ្លួននៅក្នុងប្រទេសកម្ពុជា ហើយសង្ឃឹមថា កង់បីស៊េរីថ្មីនេះ នឹងមានការគាំទ្រកាន់តែច្រើនពីសំណាក់អតិថិជននៅកម្ពុជា នឹងអាចចូលរួមចំណែកក្នុងការកសាងជីវភាពរបស់ប្រជាពលរដ្ឋដែល បានប្រើប្រាស់កង់បី ។
យោងតាមសេចក្តីប្រកាសព័ត៌មានរបស់ក្រុមហ៊ុននេះ បានអោយដឹងផងដែរថា ក្រុមហ៊ុនចាប់ផ្ដើមអាជីវកម្មនៅក្នុងប្រតទេសកម្ពុជា ចាប់តាំងពីឆ្នាំ២០១២ ហើយបច្ចុប្បន្ននេះ មានដៃគូរពាណិជ្ជកម្មចំនួន ៥២ ដែលលក់បានចំនួនជាង៣ម៉ឺនគ្រឿង ។ សេចក្តីប្រកាសនោះបានបន្តថា ក្រុមហ៊ុនក៏បានបង្កើតការងារសម្រាប់ប្រជាពលរដ្ឋកម្ពុជា បង្កើតសុវត្ថិភាព សម្រាប់ការដឹកជញ្ជូន សាធារណៈ ហើយក៏បានលើកកម្ពស់ជីវភាពរស់នៅរបស់ប្រជាជនកម្ពុជាផងដែរ ។
គួរបញ្ជាក់ផងដែរថា កង់បីឥណ្ឌា ដែលប្រកាសសម្ពោធកាលពីថ្ងៃទី១១ កុម្ភៈ ២០១៩នេះ មានទំហំទទឹង១,៣៥ម៉ែត្រ បណ្ដោយ២,៩ម៉ែត្រ និងកំពស់ ១,៨ម៉ែត្រ ដោយមានកម្លាំងម៉ាស៊ីនរហូតដល់ 236CC ដែលអាចបើកបរបានកាន់តែឆ្ងាយ ដឹកបានកាន់តែច្រើន និងបង្កើនប្រាក់ចំណូលផងដែរ ។ កង់បីនេះដែរ ក៏មានគ្រឿងបន្លាស់សម្រាប់ជួសជុលនិងប្តូរជូនអតិថិជននៅគ្រប់២៥ខេត្តរាជធានីផងដែរ៕ ដោយសហការ
ចែករំលែកព័តមាននេះ