ខេត្តកណ្ដាល ៖ គោឈ្មោល១ក្បាល ក្នុងចំណោមគោញី និងឈ្មោល៥ក្បាល ដែលម្ចាស់ចងនៅក្នុងក្រោលក្បែរផ្ទះ ហើយរវល់តែលង់លក់ក្នុងដំណេក ត្រូវបានចោរ១ក្រុមដឹកយកចេញពីក្រោលចូលទៅក្នុងគុម្ពោធព្រៃមួយកន្លែង ។
បន្ទាប់មកសម្លាប់ និងពន្លះយកសាច់ភ្លៅក្រោយ និងសាច់ចំឡកមួយចំហៀងខាងឆ្វេងប៉ុណ្តោះរួចគេចខ្លួនបាត់ ចំណែកមួយចំហៀងខាងស្ដាំមិនបានពន្លះយកទៅឡើយ ។ ក្រោយមកត្រូវបានបុរសអ្នកដាក់មងម្នាក់ប្រទះឃើញ កាលពីវេលាម៉ោង៧និង២០នាទីព្រឹក ថ្ងៃទី១៤ ខែកុម្ភៈ ឆ្នាំ២០១៩ នៅក្នុងគម្ពោធព្រៃ ស្ថិតនៅក្នុងភូមិកណ្តាល ឃុំឆក់ឈើនាង ស្រុកអង្គស្នួល ខេត្តកណ្តាល ។
តាមប្រភពព័ត៌មានបានឲ្យដឹងថា គោឈ្មោល១ក្បាលខាងលើនោះមានទម្ងន់ប្រហែលជាង២០០គីឡូក្រាម ហើយតាមការប៉ាន់ស្មានគោនេះមានតម្លៃប្រហែលជាង៤លានរៀល ដែលជាម្ចាស់ម្នាក់ឈ្មោះ កុយ សារី អាយុ៥៣ឆ្នាំ មុខរបរកសិករ មានទីលំនៅក្នុងភូមិបឹងគ្រើល សង្កាត់ឪឡោក ខណ្ឌពោសែនជ័យ រាជធានីភ្នំពេញ ។
នៅមុនពេលមានការភ្ញាក់ផ្អើលមានបុរសម្នាក់ឈ្មោះ ស៊ុម សំណាង អាយុ៤៦ឆ្នាំ ជាអ្នកភូមិឈូកធំ ឃុំឆក់ឈើនាង ស្រុកអង្គស្នួល បានធ្វើដំណើរចេញពីផ្ទះទៅសាមង នៅជិតកន្លែងកើតហេតុ ។ ខណៈនោះបានប្រទះឃើញខ្មោចគោ១ក្បាលខាងលើ ត្រូវបានក្រុមចោរពន្លះយកអស់សាច់ភ្លៅក្រោយឆ្វេង និងសាច់ចំឡកទៅបាត់ នៅសល់មួយចំហៀងខាងស្តាំទៀតព្រមទាំងគ្រឿងក្នុងមិនបានពន្លះ ឬវះយកឡើយ ។
ប្រភពដដែលបានបន្តទៀតថា បន្ទាប់ពីឃើញបែបនេះបុរសអ្នកដាក់មងបានរាយការណ៍ជូននគរបាលប៉ុស្តិ៍ឆក់ឈើនាងបានដឹង ខណៈនោះកម្លាំងនគរបាលប៉ុស្តិ៍ បានការសហការណ៍ពីកម្លាំងនគរបាលស្រុកអង្គស្នួលបានចុះទៅធ្វើការត្រួតពិនិត្យកន្លែងកើតហេតុភ្លាមៗដែរ ។ បន្ទាប់មកនគរបាលបានធ្វើការស្រាវជ្រាវទើបរកឃើញម្ចាស់គោនេះ រួចប្រគល់ខ្មោចគោនេះទៅម្ចាស់លក់ក្រែងបានលុយខ្លះ ដើម្បីផ្សែផ្សំរកទិញគោថ្មីមកទឹមប្រើប្រាស់ពេលធ្វើស្រែក្នុងរដូវវស្សាខាងមុខ ។
បុរសជាម្ចាស់គោបាននិយាយថា កាលពីវេលាម៉ោង៥ល្ងាចថ្ងៃទី១៣ ខែកុម្ភៈ ឆ្នាំ២០១៩ គាត់បានដឹកគោចំនួន៥ក្បាល មានញី មានឈ្មោល ចូលទៅចងនៅក្នុងក្រោល ។ បន្ទាប់មកនៅវេលាយប់ថ្ងៃដដែលទើបគាត់ឡើងដេកនៅលើផ្ទះ ហើយបានលង់លក់រហូតដល់វេលាម៉ោង៥ព្រឹក ថ្ងៃទី១៤ ខែកុម្ភៈ ឆ្នាំ២០១៩ ទើបភ្ញាក់ពីដេកហើយដើរចុះពីលើផ្ទះ ស្រាប់តែបាត់គោឈ្មោលអស់១ក្បាល មិនដឹងជាទៅណា បណ្ដាលឲ្យមានការភ្ញាក់ផ្អើលទាំងព្រឹកព្រលឹមអុរតែម្ដង ។
បុរសនេះបានបន្តទៀតថា ខណៈនោះគាត់បានដើររកគោគ្រប់ច្រកល្ហក ប៉ុន្តែមិនបានឃើញឡើយ លុះក្រោយមកស្រាប់តែទទួលដំណឹងថា មានគេប្រទះឃើញខ្មោចគោ១ក្បាលត្រូវចោរសម្លាប់ពន្លះយកសាច់នៅក្នុងគុម្ពោធព្រៃ ជិតភូមិកណ្ដាល ឃុំឆក់ឈើនាង ស្រុកអង្គស្នួល ទើបពេលនោះគាត់បានប្រញាប់ប្រញាល់ទៅមើលទើបបានស្គាល់ថា ជាគោរបស់គាត់ ហើយគាត់ក៏បានដាក់ពាក្យប្ដឹងសុំឲ្យនគរបាលជួយស្រាវជ្រាវរកមុខក្រុមចោរដែលលួចគោរបស់គាត់ដើម្បីចាប់ខ្លួនមកផ្ដន្ទារទោសតាមច្បាប់ ៕
ចែករំលែកព័តមាននេះ