រាជធានីភ្នំពេញ ៖ បន្ទាប់ពី EU សម្រេចផ្អាកអនុគ្រោះពន្ធចំពោះកម្ពុជាភ្លាម រាជរដ្ឋាភិបាលកម្ពុជាបានអះអាងថា ការសម្រេចផ្អាកអនុគ្រោះពន្ធរបស់សហភាពអឺរ៉ុបមកលើកម្ពុជា គឺមិនបានគិតពីជោគវេសនាកម្មករ-កម្មការិនីជិតមួយលាននាក់នោះទេ ។ នេះបើតាមសេចក្តីថ្លៃការណ៍របស់ក្រសួងការបរទេស និងកិច្ចសហប្រតិបត្តិការអន្តរជាតិ ។
ថ្លែងការណ៍បានចេញផ្សាយនៅថ្ងៃទី១២ ខែកុម្ភៈ បានឲ្យដឹងថា រាជរដ្ឋាភិបាលកម្ពុជាមានការសោកស្តាយយ៉ាងខ្លាំងចំពោះសេចក្ដីសម្រេចរបស់គណៈកម្មការអឺរ៉ុប (EU) កាលថ្ងៃទី១១ កុម្ភៈ ដើម្បីបើកដំណើរការនីតិវិធីជាផ្លូវការសម្រាប់ការដកជាបណ្តោះអាសន្ននូវប្រព័ន្ធ អនុគ្រោះពន្ធ «គ្រប់មុខទំនិញទាំងអស់លើកលែងគ្រឿងសព្វាវុធ (EBA)» ពីកម្ពុជា ។ សេចក្តីថ្លែងការណ៍បានបញ្ជាក់ថា «រាជរដ្ឋាភិបាលកម្ពុជា មានការសោកស្តាយយ៉ាងខ្លាំងចំពោះសេចក្ដីសម្រេចរបស់គណៈកម្មការអឺរ៉ុប នៅថ្ងៃទី១១ ខែកុម្ភៈ ឆ្នាំ២០១៩ ដើម្បីបើកដំណើរការនីតិវិធីជាផ្លូវការសម្រាប់ការដកជាបណ្តោះអាសន្ននូវប្រព័ន្ធអនុគ្រោះពន្ធគ្រប់មុខ» ។
រាជរដ្ឋាភិបាលកម្ពុជាចាត់ទុកសេចក្តីសម្រេចចិត្តនេះជារឿងអយុត្តិធម៌បំផុត ខណៈដែលគណៈកម្មការអឺរ៉ុបមិនអើពើចំពោះវិធានការជាក់ស្តែង និងវឌ្ឍនភាពសំខាន់ៗជាច្រើនដែលបានធ្វើឡើងដោយរាជរដ្ឋាភិបាលកម្ពុជាក្នុងការប្រកាន់ខ្ជាប់ និងការប្តេជ្ញាចិត្តចំពោះការអនុវត្តអនុសញ្ញាស្នូលទាំង១៥របស់អង្គការសហប្រជាជាតិ និងអង្គការពលកម្មអន្តរជាតិដែលជាបុរេ ល័ក្ខខ័ណ្ឌក្នុងការបន្តផ្តល់ប្រព័ន្ធអនុគ្រោះពន្ធ EBA ជាឯកតោភាគី ជាពិសេសនៅលើវិស័យ ទាំងឡាយដែលត្រូវបានគូសបញ្ជាក់នៅក្នុងសេចក្តីថ្លែងការណ៍របស់រាជរដ្ឋាភិបាលកម្ពុជានៅថ្ងៃទី៣ ខែធ្នូ ឆ្នាំ២០១៨ ស្តីពីវិធានការដើម្បីពង្រឹងលំហនយោបាយ និងសង្គមស៊ីវិល សិទ្ធិការងារ និងការដោះស្រាយបញ្ហាដីធ្លី និងដីសម្បទានស្ករអំពៅ ។
រាជរដ្ឋាភិបាលកម្ពុជាមានទស្សនៈថា គណៈកម្មការអឺរ៉ុបមិនបានធ្វើសកម្មភាពដោយឈរលើ គោលការណ៍ «ស្មោះត្រង់» និង«យុត្តិធម៌» នោះទេ ។ គណៈកម្មការអឺរ៉ុបបានបិទភ្នែកនៅពេល ដែលប្រទេសជាច្រើនដែលកំពុងតែទទួលនូវក្របខ័ណ្ឌអនុគ្រោះពន្ធរបស់សហភាពអឺរ៉ុបមិន បានអនុវត្តពេញលេញនូវអនុសញ្ញាអន្តរជាតិទាំងនោះ ប៉ុន្តែជាមួយនឹងរបៀបវារៈនយោបាយ គណៈកម្មការអឺរ៉ុបបានដាក់បន្ទុក និងរំពឹងនូវ«ការអនុវត្តដ៏ល្អឥតខ្ចោះ» នៃអនុសញ្ញាទាំងនោះ ពីកម្ពុជា ។
គណៈកម្មការអឺរ៉ុបមិនបានទទួលស្គាល់ការកែលំអ និងវឌ្ឍនភាពជាបន្តបន្ទាប់ដែលរាជរដ្ឋាភិបាលបានធ្វើដូចដែលបានរំលេចឡើងក្នុងលិខិតឆ្លើយតបចុះថ្ងៃទី៤ ខែមករា ឆ្នាំ២០១៩ ដោយ មានភ្ជាប់នូវរបាយការណ៍បញ្ជីវឌ្ឍនភាពគ្រប់ជ្រុងជ្រោយនោះទេ ។ ចំពោះអ្នកសង្កេតការណ៍ ដែលមានភាពអព្យាក្រឹត្យ និងយុត្តិធម៌សកម្មភាព និងវិធានការដែលរាជរដ្ឋាភិបាលបានធ្វើ ឡើង គឺអាចទទួលស្គាល់បានថា ជាវឌ្ឍនភាពសំខាន់ៗ បើពិចារណាទៅលើភាពស្មុគ្រស្មាញ នៃបណ្តាបញ្ហាទាំងនោះ ។ វឌ្ឍនភាពដែលរាជរដ្ឋាភិបាលបានធ្វើឡើងក្នុងអំឡុងពេល៨ខែ ចុងក្រោយចាប់តាំងពីបេសកកម្មសុឆន្ទៈលើកទី១ ទៅទីក្រុងប្រ៊ុចសែល គឺជាសក្ខីភាពនៃភាព ស្មោះត្រង់ និងការប្តេជ្ញាចិត្តរបស់រាជរដ្ឋាភិបាល ។
ជាក់ស្តែងនៅលើគោលការណ៍ពហុបក្សគណៈកម្មការអឺរ៉ុបបានផ្តោតតែទៅលើអត្ថិភាពរបស់ អតីតគណបក្សសង្គ្រោះជាតិ និងជោគវាសនានៃថ្នាក់ដឹកនាំគណបក្សនេះតែប៉ុណ្ណោះ ។ គណៈកម្មការអឺរ៉ុបបានចោទប្រកាន់ទៅលើភាពស្របច្បាប់នៃការបោះឆ្នោតជ្រើសតាំងតំណាង រាស្ត្រ កាលពីខែកក្កដា ឆ្នាំ២០១៨ ដោយឈរលើមូលដ្ឋានតែមួយគត់ គឺអវត្តមាននៃអតីត គណបក្សសង្គ្រោះជាតិ ។
គណៈកម្មការអឺរ៉ុបមិនបានទទួលស្គាល់គណបក្ស១៩ផ្សេងទៀតដែលបានប្រកួតប្រជែងក្នុង ការបោះឆ្នោតដែលបានទទួលសម្លេងជិត១លាន៥សែន ឬស្មើនឹង២៣% នៃសន្លឹកឆ្នោតបានការនោះទេ ។ ការមិនទទួលស្គាល់នូវការពិតទាំងនេះបានបង្ហាញយ៉ាងច្បាស់នូវភាពលំអៀង យ៉ាងគឃ្លើនរបស់គណៈកម្មការអឺរ៉ុបក៏ដូចជា ការមិនអើពើចំពោះម្ចាស់ឆ្នោត និងគណបក្ស របស់ពួកគេដែលបានចូលរួមក្នុងការបោះឆ្នោតក៏ដូចជា សិទ្ធិ និងជម្រើសនយោបាយរបស់ ពួកគេ ៕
ចែករំលែកព័តមាននេះ