ខេត្តពោធិ៍សាត់ ៖ សមត្ថកិច្ចនគរបាលក្រុងពោធិ៍សាត់ បានធ្វើការឃាត់ខ្លួនមុខសញ្ញាចំនួន២នាក់ដែលប្រើប្រាស់ និងចែកចាយថ្នាំញៀន រួមនឹងវត្ថុតាងថ្នាំញៀនចំនួន៧កញ្ចប់ កាលពីថ្ងៃទី១១ ខែកុម្ភៈ ឆ្នាំ២០១៩ នៅចំណុចផ្ទះរបស់ជនសង្ស័យឈ្មោះ ញេប នៅ ស្ថិតក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់ ។
លោកវរៈសេនីយ៍ឯក យឹម ស៊ាងហៃ អធិការនគរបាលក្រុងពោធិ៍សាត់ដែលដឹកនាំកម្លាំងចុះទៅបង្ក្រាបផ្ទាល់បានប្រាប់ឲ្យដឹងថា ជនសង្ស័យទាំង២នាក់ខាងលើដែលត្រូវចាប់ឃាត់ខ្លួន ម្នាក់ឈ្មោះញេប នៅ ភេទប្រុស អាយុ៣៦ឆ្នាំ និងម្នាក់ទៀតឈ្មោះ ចាន់ ធី ភេទប្រុស អាយុ៣៩ឆ្នាំ បច្ចុប្បន្នជនសង្ស័យទាំង២នាក់រស់នៅក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់។
ក្នុងប្រតិបត្តិការបង្ក្រាបខាងលើ កម្លាំងសមត្ថកិច្ចបានឆែកឆេររកឃើញវត្ថុតាងរួមមាន ម្សៅក្រាមពណ៌សថ្លាដែលសង្ស័យថាជាសារធាតុញៀនចំនួន៧កញ្ចប់ (ក្នុងនោះធំ៤កញ្ចប់) កាំបិត និងដាវចំនួន៥ដើម កាំភ្លើងកែច្នៃមួយដើម ស្លាកលេខម៉ូតូចំនួន២សន្លឹក ម៉ូតូមួយគ្រឿង និងឧបករណ៍សម្រាប់ជក់មួយចំនួនទៀត។
លោកអធិការឲ្យដឹងបន្តថា ជនសង្ស័យទាំង២នាក់គឺជាមុខសញ្ញាប្រើប្រាស់ និងចែកចាយគ្រឿងញៀនដែលស្ថិតក្នុងការតាមប្រម៉ាញ់របស់សមត្ថកិច្ចជាយូរមកហើយ ហើយការឃាត់ខ្លួននេះគឺតាមបទបញ្ជារបស់លោកឧត្តមសេនីយ៍ទោ សារុន ចាន់ធី ស្នងការនគរបាលខេត្ត និងលោក តន់ សីហតេជះ ព្រះរាជអាជ្ញាអមសាលាដំបូងខេត្ត។
បច្ចុប្បន្ន មុខសញ្ញាទាំង២នាក់ខាងលើ រួមទាំងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការបន្តតាមនីតិវិធី៕
ចែករំលែកព័តមាននេះ