ពីមុនគេកម្រឃើញមានតារាភេទទីបី ត្រូវបានអញ្ជើញអោយដឹកនាំកម្មវិធីណាមួយនៅក្នុងមង្គលការណាស់ ដោយសារតែមានការរើសអើង។ ប៉ុន្តែឥឡូវនេះ តារាភេទទីបីបាននិយាយថា ពួកគេចាប់ផ្តើម មានហាងឆេង រកលុយបានពីពិធីមង្គលការហើយ។ យោងតាមសម្តីតារាកំប្លែងភេទទី៣ មានឈ្មោះពិតឃ្លោក…
ពីមុនគេកម្រឃើញមានតារាភេទទីបី ត្រូវបានអញ្ជើញអោយដឹកនាំកម្មវិធីណាមួយនៅក្នុងមង្គលការណាស់ ដោយសារតែមានការរើសអើង។ ប៉ុន្តែឥឡូវនេះ តារាភេទទីបីបាននិយាយថា ពួកគេចាប់ផ្តើម មានហាងឆេង រកលុយបានពីពិធីមង្គលការហើយ។
យោងតាមសម្តីតារាកំប្លែងភេទទី៣ មានឈ្មោះពិតឃ្លោក មករា ហៅយេយេ បានអោយដឹងកាលពីពេល ថ្មីៗនេះថា នាងដូចជាមិនដែលត្រូវបានម្ចាស់ដើមការគេមាក់ងាយរិះគន់អ្វីឡើយ នៅតែឃើញហៅទៅធ្វើជាពិធីករកាត់នំតាមរោងការជារឿយៗ។
យេយេអះអាងទៀតថា នេះមកពីយើងចេះរៀបពាក្យពេចន៍និយាយមិនចំអេះចំអះ។ យើងនិយាយតែពាក្យណាដែលធ្វើអោយគេសប្បាយៗ កុំអសុរស ហើយភាគច្រើនទទួលបានការស្វាគមន៍។ នាងសប្បាយចិត្តដែលមានការអោយតម្លៃលើតារាភេទទី៣។ ចំពោះតម្លៃធ្វើពិធីករកាត់នំពេលយប់នោះនៅក្រុងភ្នំពេញ យកថ្លៃ ២០០ដុល្លារដោយយើងមិនអង្គុយនិយាយតែកាត់នំទេ គឺមានការលេងកំប្លែងមួយកម្មវិធីតែម្តង ដោយការងារទទួលកាត់នំនេះនាងធ្វើជិត២ឆ្នាំទៅហើយ។
លោកម៉ាដូណា ដែលអ្នកណាៗក៏និយមហៅថា នាងមុខសេះក៏គេឧស្សាហ៍ឃើញគាត់មានឱកាសក្តាប់យកទីផ្សារការងារកាត់នំអាពាហ៍ពិពាហ៍ច្រើនរោងមក ហើយក៏បានអោយដឹងដែរថា ៖ លោកក៏មានឱកាសចូលរួមការកាត់នំអាពាហ៍ពិពាហ៍ ឬខួបអាពាហ៍ពិពាហ៍ បានជាច្រើនកម្មវិធីមកហើយ។
ភាគច្រើនអ្នកដែលអញ្ជើញយើងដូចជា មិនផ្តោតលើជំនឿអ្វីនោះទេ ព្រោះនោះជាពិធីជប់លៀងសប្បាយៗណាមួយយើងអត់ទៅដំណើរការកម្មវិធីដូចជា កាត់សក់អ្វីដែរយើងលេងកំប្លែងអោយគេសើចតែពេលយប់ជប់លៀង។ ដូចនេះការរិះគន់ គឺគ្មាននោះទេ អោយតែយើងគោរពការនិយាយស្តីមានភាពសុជីវធម៌អោយច្រើននោះជាការស្រេច។
តារាភេទទី៣ ផេន ខេក ដែលទើបតែវះកាត់ទាំងទ្រូង និងប្រដាប់ភេទបានប្រាប់ដែរថា កញ្ញាភាគច្រើនចាប់ដៃគូជាមួយយេយេ ដែលជាមិត្តជិតដិតតស៊ូធ្វើការតាំងពីមិនទាន់ល្បី។ នាងក៏ច្បាមការងារខួបកំណើត កាត់នំនៅក្នុងមង្គលការបានច្រើនរោង ដោយតម្លៃការងារគឺ២០០ដុល្លារនៅក្នុងក្រុង បើចេញទៅខេត្តយើងនិយាយតម្លៃចរចាគ្នាតាមក្រោយ។
ភាគច្រើនយើងទទួលបានការស្វាគមន៍ច្រើនពីភ្ញៀវកិត្តិយស ដោយមានអ្នកខ្លះមកសុំថតរូបជាមួយ។ អ្វីដែលនាងអរគុណ គឺការអោយតម្លៃពីសំណាក់បងប្អូនលែងរើសអើងភេទទី៣ដូចមុន ព្រោះនាពេលបច្ចុប្បន្នភេទទី៣ ភាគច្រើនខំរកស៊ីក្នុងសង្គមណាស់។
ក្រៅពីកញ្ញាទាំង៣ខាងលើ យើងឃើញថា មានតារាភេទទី៣ មួយចំនួនទៀតក៏ខ្លាំងមិនអន់នោះទេ ក្នុងការចេញទៅច្រៀង និងកាត់នំតាមពិធីរៀបការដូចជា រ៉ូលីនឃើញថា មួយរដូវៗនាងច្បាមការច្រៀងនៅតាមកន្លែងរៀបការច្រើនណាស់ ហើយបង្កបរិយាកាសរីករាយ។
ក្រៅពីនោះនាងស្រីពៅមុខឈើ ក៏ឃើញមានការចេញមុខតាមរោងការច្រើនគួរសមបូកទាំងស្រីស្អាតប៉ុប ពី ក៏ប្រមូលលុយមិនស្ទើរនោះដែរ ពីការងារនៅមង្គលការនេះ៕
ចែករំលែកព័តមាននេះ