រាជធានីភ្នំពេញ ៖ ក្នុងគោលបំណងផ្សព្វផ្សាយពីលទ្ធផលសិក្សាស្រាវជ្រាវថ្មីលើ វិស័យបុរាណវិទ្យា និងពិនិត្យទៅលើសក្ដានុពលភាពលើវិស័យការងារវប្បធម៌បុរាណវិទ្យានៅ កម្ពុជា កាលពីថ្ងៃទី១៩ មករា ឆ្នាំ២០១០ ក្រសួងវប្បធម៌ និងវិចិត្រសិល្បៈបានរៀបចំសិក្ខាសាលាជាលើកទី១ ក្រោមអធិបតីភាពលោកជុច ភឿន រដ្ឋលេខាធិការក្រសួងវប្ប ធម៌ និងវិចិត្រសិល្បៈ ។
រាជធានីភ្នំពេញ ៖ ក្នុងគោលបំណងផ្សព្វផ្សាយពីលទ្ធផលសិក្សាស្រាវជ្រាវថ្មីលើវិស័យបុរាណវិទ្យា និងពិនិត្យទៅលើសក្ដានុពលភាពលើវិស័យការងារវប្បធម៌បុរាណវិទ្យានៅកម្ពុជា កាលពីថ្ងៃទី១៩ មករា ឆ្នាំ២០១០ ក្រសួងវប្បធម៌ និងវិចិត្រសិល្បៈបានរៀបចំសិក្ខាសាលាជាលើកទី១ ក្រោមអធិបតីភាពលោកជុច ភឿន រដ្ឋលេខាធិការក្រសួងវប្ប ធម៌ និងវិចិត្រសិល្បៈ ។
លោកហម គីមសុន ប្រធាននាយកដ្ឋានបុរាណវិទ្យានិងបុរេប្រវត្ដិវិទ្យា បានមានប្រសាសន៍ថា បើពិនិត្យតាមការប្រែ ប្រួលពីដំណាក់កាលមួយទៅដំណាក់កាលមួយនៃការអភិវឌ្ឍន៍របស់សង្គមប្រកបដោយបច្ចេកវិទ្យា និងវិទ្យាសាស្ដ្រទំនើបជឿនលឿនយ៉ាងណាក៏ដោយ ក៏យើងមិនអាចបំភ្លេចនូវមរតកវប្បធម៌អំពីការរស់នៅរបស់មនុស្ស សត្វ និងរុក្ខ ជាតិ ដែលបានបន្សល់ពីអតីតកាលរាប់រយពាន់លានឆ្នាំ មកធ្វើការសិក្សាស្រាវជ្រាវប្រមូលចងក្រងទុកជាឯកសារ ប្រវត្ដិសាស្ដ្រ ដើម្បីថែរក្សាការពារអភិរក្ស និងអភិវឌ្ឍន៍នូវអត្ដសញាណដួងព្រលឹង ប្រពៃណី វប្បធម៌ ទំនៀមទម្លាប់របស់ជាតិឱ្យបានស្ថិតស្ថេរគង់វង្សដែរ ។ តាមរយៈសិក្ខាសាលានេះ យើងនឹងដកស្រង់បាននូវខ្លឹមសារ និងបទពិសោធន៍ជាមេរៀនពីសក្ដានុពលពិតប្រាកដ ដើម្បីពង្រឹងតម្រង់ទិស និងអភិវឌ្ឍន៍សកម្មភាពបេតិកភណ្ឌវប្បធម៌ឱ្យបានស្របទៅនឹងថ្ងៃអនាគត ទោះបីជាថវិកាយើងនៅមានកំរិតក៏ដោយ ។ ទន្ទឹមនោះ យើងនឹងបំផុសគំនិតផ្ដួចផ្ដើមថ្មីៗសំរាប់ជាមូលដ្ឋានក្នុងការគ្រប់គ្រងដែនដីបុរាណវិទ្យា អប់រំផ្សព្វផ្សាយបណ្ដុះបណ្ដាលស្មារតីស្រឡាញ់វប្បធម៌ជាតិក្នុងស្រទាប់ប្រជាពលរដ្ឋ និងចូលរួមចំណែកថែរក្សាអភិរក្ស និងអភិវឌ្ឍន៍ ។
លោកជុច ភឿន បានថ្លែងក្នុងអង្គសិក្ខាសាលានោះ ដោយសម្ដែងនូវការចាប់អារម្មណ៍យ៉ាងខ្លាំងចំពោះសកម្មភាពបំផ្លិចបំផ្លាញជីកគាស់កកាយផ្នូរសពបុរាណ ទួលបុរាណ ស្រះបុរាណនៅតាមបណ្ដាខេត្ដមួយចំនួនដូចជា ខេត្ដ កណ្ដាល ព្រៃវែង ស្វាយរៀង សៀមរាប បន្ទាយមានជ័យ ឧត្ដរមានជ័យ ព្រះវិហារជាដើម ដែលជាការបំផ្លាញ សម្បត្ដិវប្បធម៌ជាតិខ្លួនឯងដោយមិនដឹងខ្លួន ។ ទន្ទឹមនោះ ក្រុមឈ្មួញទុច្ចរិតនៅតែបន្ដសកម្មភាពបំផុសប្រជាពល រដ្ឋក្រីក្រតាមតំបន់ដាច់ស្រយាលឱ្យប្រព្រឹត្ដអំពើមិនគប្បីខាងលើជាថ្នូរនឹងប្រាក់កាសបន្ដិចបន្ដួច ដែលប្រការទាំង អស់នោះជាកង្វល់ និងជាការយកចិត្ដទុកដាក់សំរាប់ថ្នាក់ដឹកនាំក្រសួងវប្បធម៌ និងវិចិត្រសិល្បៈ និងមន្ដ្រីបេតិក ភណ្ឌជាតិ ។
លោករដ្ឋលេខាធិការបញ្ជាក់ថា ដើម្បីទប់ស្កាត់សកម្មភាពបំផ្លិចបំផ្លាញទាំងអស់នោះ យើងទាំងអស់គ្នាសំខាន់ថ្នាក់ដឹកនាំក្រសួង ក៏ដូចជាមន្ទីរវប្បធម៌ និងវិចិត្រសិល្បៈខេត្ដ រួមទាំងអ្នកជំនាញមិនអាចសម្រេចគោលដៅបានទេ ប្រសិនបើគ្មានការចូលរួមពីអាជ្ញាធរមូលដ្ឋានគ្រប់ថ្នាក់ ។ ប៉ុន្ដែយ៉ាងណាក៏ដោយចុះ លោកបានថ្លែងនូវការកោត សរសើរចំពោះនាយកដ្ឋានបុរាណវិទ្យា និងបុរេប្រវត្ដិវិទ្យា ដែលបំពេញការងារបានល្អ ទទួលស្នាដៃច្រើនក្រោមកិច្ចសហការជាមួយអង្គការជាតិ-អន្ដរជាតិ ហើយសង្ឃឹមថា កិច្ចសហការដ៏ជិតស្និទ្ធនោះនឹងជំរុញសកម្មភាពការងារស្រាវជ្រាវការពារ និងថែរក្សាបេតិកភណ្ឌជាតិឱ្យទទួលបានជោគជ័យបន្ដទៀត ដើម្បីប្រែក្លាយកម្ពុជាឱ្យទៅជា មជ្ឈមណ្ឌលផ្សព្វផ្សាយវប្បធម៌ និងអរិយធម៌ ដល់ពិភពលោកទាំងមូល ៕
ចែករំលែកព័តមាននេះ