រាជធានីភ្នំពេញ ៖ បើទោះបីជាឆ្នាំនេះ ក្រសួងធនធានទឹក និងឧត្តុនិយម ព្យាករណ៍ថា អាកាសធាតុឡើងកំដៅ និងរដូវប្រាំងអូសបន្លាយយូរជាងឆ្នាំមុនៗក្ដី សមាគមអ្នកផលិតអំបិលនៅខេត្តកំពតអះអាងថា ការនាំចូលអំបិលមកផ្គត់ផ្គង់នឹងនៅតែមាន…
រាជធានីភ្នំពេញ ៖ បើទោះបីជាឆ្នាំនេះ ក្រសួងធនធានទឹក និងឧត្តុនិយម ព្យាករណ៍ថា អាកាសធាតុឡើងកំដៅ និងរដូវប្រាំងអូសបន្លាយយូរជាងឆ្នាំមុនៗក្ដី សមាគមអ្នកផលិតអំបិលនៅខេត្តកំពតអះអាងថា ការនាំចូលអំបិលមកផ្គត់ផ្គង់នឹងនៅតែមាន ព្រោះការផលិតក្នុងស្រុកមិនអាចគ្រប់ទៅតាមតម្រូវការ
ឡើយ ។
លោក តុង ខ្លឹង អនុប្រធានផែនការនៃសមាគមផលិតអំបិលខេត្តកំពតកែប បានឲ្យដឹងថា បើទោះបីជាអាកាសធាតុឆ្នាំនេះអំណោយផលជាងឆ្នាំមុនៗក្ដី ក៏ឆ្នាំនេះការផលិតអំបិលក្នុងស្រុក មិនអាចគ្រប់គ្រាន់នឹងតម្រូវការបានឡើយ ដូច្នេះហើយត្រូវការឲ្យមានការនាំចូលបន្ថែម ។ លោកបន្តថា បច្ចុប្បន្ននេះ អាជីវកម្មស្រែអំបិលរបស់ផលិតករក្នុងសហគមន៍ បានថយចុះជាច្រើន ដោយមួយចំនួនឈប់ផលិតព្រោះតែខ្វះកម្លាំងពលកម្ម និងអ្នកមួយចំនួនទៀតដោយសារតែការខាតបង់នាឆ្នាំកន្លងមក ដូច្នេះហើយធ្វើឲ្យអាជីវកម្មស្រែអំបិល បានថយចុះច្រើន ។
លោកមានប្រសាសន៍ថា ៖« សព្វថ្ងៃនេះ ការផលិតអំបិលនៅក្នុងសហគមន៍ បានធ្លាក់ចុះប្រមាណ៣០% ដោយសារតែខ្វះកម្លាំងពលកម្ម ដូច្នេះហើយទើបត្រូវការនាំចូលពីខាងក្រៅប្រទេសដើម្បីបង្គ្រប់ » ។
លោក ខាត់ សាមឿន សមាជិកអ្នកផលិតអំបិលមួយរូបក្នុងសមាគមនេះ បានឲ្យដឹងដែរថា ប្រជាជនភាគច្រើនធ្វើអាជីវកម្មស្រែអំបិល ត្រូវយកទុនពីខាងមីក្រូហិរញ្ញវត្ថុ ឬធនាគារ មកពង្រាបដីស្រែ និងបូមទឹកបញ្ចូលស្រែជាដើម ហើយកាលពីមុននោះ ដោយសារតែភ្លៀងធ្លាក់ច្រើនពេក បានធ្វើឲ្យពួកគាត់ខាតបង់ ដោយមិនអាចប្រមូលផលបាន អីចឹងហើយមួយចំនួនក៏បានឈប់ធ្វើ បូករួមនឹងខ្វះកម្លាំងពលកម្មផងដែរ ។
លោកបន្តថា បច្ចុប្បន្ននេះ ការផលិតអំបិលនៅក្នុងប្រទេសកម្ពុជា គឺត្រូវពឹងលើវិធីធម្មជាតិសុទ្ធសាធ បើអាកាសធាតុអំណោយផល អំបិលក៏បានផលល្អ តែបើអាកាសធាតុមិនអំណោយផល ផលិតករក៏ត្រូវប្រឈមនឹងការខាតបង់ដែរ ដូច្នេះទើបទិន្នផលអំបិលកម្ពុជា ពេលខ្លះក៏ទទួលបានលើសតម្រូវការ ពេលខ្លះក៏បានតិច តែយ៉ាងណាក៏ដោយនៅឆ្នាំកន្លងៗមក ដោយសារការផលិតនៅឆ្នាំមុនៗទទួលបានផលច្រើន ហើយអ្នកផលិតក៏ច្រើន ធ្វើឲ្យអំបិលអាចផ្គត់ផ្គង់បានគ្រប់ ទើបតែឆ្នាំ២០១៨កន្លងទៅនេះ ការផលិតអំបិលក្នុងស្រុក មិនអាចគ្រប់ទៅតាមតម្រូវការ ក៏បានចាប់ផ្ដើមនាំចូលពីប្រទេសចិន មកបំពេញនូវភាពខ្វះខាត ។
កាលពីអំឡុងខែវិច្ឆិកាឆ្នាំមុន អំបិលជាង៥ពាន់តោន ត្រូវបានដឹកមកដល់កំពង់ផែខេត្តព្រះសីហនុ ដើម្បីត្រៀមផ្គត់ផ្គង់ទៅតាមតម្រូវការ ហើយក៏មានគម្រោងនាំចូលបន្ថែមទៀតដែរ ក្នុងករណី មិនអាចផលិតបានគ្រប់ទៅតាមតម្រូវការ ។ ការនាំចូលអំបិលមកកាន់ទីផ្សារព្រះរាជាណាចក្រកម្ពុជា កាលពីឆ្នាំ២០១៨កន្លងទៅនេះ មិនមែនជាលើកទី១ទេ ជាក់ស្ដែងកាលពីជាង១០ឆ្នាំមុន ពោលគឺអំឡុងឆ្នាំ២០០៨ កម្ពុជាបាននាំចូលអំបិលប្រមាណ៦ម៉ឺនតោនរួចមកហើយពីប្រទេសចិន ដើម្បីផ្គត់ផ្គង់ ។ យោងតាមរបាយការណ៍របស់សមាគមអ្នកផលិតអំបិលខេត្តកំពត បានបង្ហាញផងដែរថា តម្រូវការអំបិលក្នុងស្រុក ក្នុងមួយឆ្នាំមានប្រមាណ១០ម៉ឺនតោន ៕
ចែករំលែកព័តមាននេះ