រាជធានីភ្នំពេញ ៖ បន្ទាប់ពីទ្រាំរស់នៅជាបុរសពោះម៉ាយក្រោយភរិយាបានទទួលមរណភាពជាង២ឆ្នាំមកនេះ តារាចម្រៀងលោក រិន សាវេត បានបង្ហាញមុខគូស្នេហ៍ថ្មីជាមួយនឹងការគ្រោងចាប់ដៃនារីម្នាក់នោះចូលរោងជ័យនៅឆ្នាំក្រោយផងដែរ។
ភាពភ្ញាក់ផ្អើលបានកើតមានសម្រាប់អ្នកលេងហ្វេសប៊ុក បន្ទាប់ពីតារាចម្រៀងពោះម៉ាយរូបនេះបានបង្ហាញនូវភាពស្និតស្នាលជាមួយនារីម្នាក់នៅលើបណ្តាញសង្គមកាលពីពេលថ្មីៗនេះ ជាមួយនឹងសារចាក់ដោតចង់បានម្តាយថ្មីសម្រាប់មើលថែកូនរបស់ខ្លួន។
រូបភាពប៉ុន្មានសន្លឹកត្រូវបានលោក រិន សាវេត ធ្វើការបង្ហោះជាសាធារណៈ ដោយភ្ជាប់ជាមួយឃ្លាសរសេរថា «កូនពុកអើយ… ! ប្រកាន់និងខឹងពុកទេ បើសិនជាពុកចង់បានអ្នកម្ដាយម្នាក់ មកជួយមើលថែរក្សាកូន? សូមបងប្អូនកុំប្រកាន់ណា!» ។
យ៉ាងណាក៏ដោយបើទោះបីជារូបភាពនឹងខ្លឹមសារដែលលោក រិន សាវេត បានសរសេរនាពេលនេះហាក់មិនបានបញ្ជាក់ន័យឲ្យស៊ីជម្រៅចំពោះនារីមា្នក់នោះថា ជាអនាគតភរិយាថ្មីរបស់លោកក៏ដោយ ប៉ុន្តែតារាចម្រៀងរូបនេះហាក់មិនបានជំទាស់ណាមួយឡើយ នៅពេលមានការជូនពរ និងសាទរពីមិត្តភក្តិ ព្រមទាំងអ្នកគាំទ្រនៅពេលដែលលោកអាចរកបានភរិយាថ្មីនាពេលនេះ។
ដោយឡែកពាក់ព័ន្ធបញ្ហានេះ តារាចម្រៀងរបស់ផលិតកម្មហង្សមាសលោក រិន សាវេត បានអះអាងប្រាប់កោះសន្តិភាពតាមសារអេឡិចត្រូនិចថា នារីដែលលោកបានបង្ហាញនេះ គឺពិតជាអនាគតភរិយារបស់លោកប្រាកដមែន។ លោកបញ្ជាក់ថា លោកបានចាប់ផ្តើមទាក់ទងជាមួយនារីខាងលើនេះប្រមាណជាកន្លះឆ្នាំនេះប៉ុណ្ណោះ ក្រោមការជួយណែនាំពីមិត្តភក្តិរបស់លោក ខណៈពេលដែលនារីរូបនេះក៏បានយល់ចិត្តគ្នាច្រើនជាមួយលោកផងដែរ។
លោកនិយាយថា «ខ្ញុំបានស្គាល់គាត់ តាមរយៈមិត្តភក្តិដែលមានផ្ទះនៅជិតគាត់ ហើយការស្គាល់គ្នាបានប្រហែលជាកន្លះឆ្នាំដែរទេ ហើយគាត់យល់ចិត្តខ្ញុំ ហើយមានចិត្តស្រឡាញ់កូនខ្ញុំដែរ ទើបខ្ញុំស្រឡាញ់គាត់វិញដែរទៅ» ។ លោកបន្ថែមថា នារីដែលលោកនឹងយកធ្វើជាភរិយានាពេលនេះ គឺមានវ័យប្រមាណជាជាង៣០ឆ្នាំ ជាអ្នកនៅភ្នំពេញ និងមិនមែនជាអ្នកសិល្បៈនោះឡើយ ពោលគឺជាអ្នករកស៊ីជាមួយក្រុមគ្រួសារ។
បើតាមលោក រិន សាវេត ទោះបីជាពួកលោកបានស្វែងរកចិត្តថ្លើមគ្នាហើយក៏ដោយ ប៉ុន្តែលោកនៅមិនទាន់មានគម្រោងចូលរោងការនាពេលឆាប់ៗនេះឡើយ ពោលគឺលោកអាចនឹងធ្វើនៅឆ្នាំក្រោយ ព្រោះត្រូវសន្សំលុយកាក់ទុកឲ្យបានច្រើនបន្តិច។
គួរបញ្ជាក់ថា តារាចម្រៀងលោក រិន សាវេត បានក្លាយជាបុរសពោះម៉ាយ បន្ទាប់ពីភរិយារបស់លោកបានទទួលមរណភាពដោយជំងឺដ៏កាចសាហាវ បន្សល់ទុកនូវកូនប្រុសម្នាក់ជាចំណងដៃ។ បើទោះបីជាទទួលការក្រៀមក្រំចិត្ត និងស្ទើរបាក់ទឹកចិត្តចំពោះមរណភាពភរិយាជាទីស្រឡាញ់ក៏ដោយ ប៉ុន្តែតារាចម្រៀងរូបនេះបានតស៊ូប្រឹងប្រែងរកស៊ីចិញ្ចឹមកូនប្រុសរហូតមកដល់ពេលនេះ។
សម្រាប់ការងារសិល្បៈ បើទោះជាស្ងប់ស្ងាត់ចេញបទចម្រៀងថ្មីៗបន្ថែមនៅក្នុងផលិតកម្មហង្សមាសក៏ពិតមែន ប៉ុន្តែលោក រិន សាវ៉េត ត្រូបានគេផ្តល់ឱកាសឲ្យចូលច្រៀងនៅតាមពិធីមង្គលការជាបន្តបន្ទាប់ស្ទើរមិនដាច់សូរ។ ម្យ៉ាងទៀតតារាចម្រៀងរូបនេះ ក៏ត្រូវបានគេដឹងថា បានចូលហ៊ុនរកស៊ីរួមគ្នាជាមួយអ្នកសិល្បះដូចគ្នា ក្នុងគម្រោងពុះដីឡូតិ៍លក់ផងដែរ៕
ចែករំលែកព័តមាននេះ