រាជធានីភ្នំពេញ ៖ ថ្នាក់ដឹកនាំជាន់ខ្ពស់នៃក្រុមហ៊ុនOCIC បានអះអាងថា ក្រុមហ៊ុនពិតជានឹងសាងសង់គម្រោងទីក្រុងរណបថ្មីមួយ ស្ថិតនៅតាមដងទន្លេ ដោយចាកចេញពីតំបន់កោះនរា ទៅកាន់ស្រុកកៀនស្វាយក្នុងខេត្តកណ្តាលពិតមែន ។
អគ្គនាយករងក្រុមហ៊ុនOCIC លោកទូច សំណាង បានឲ្យដឹងតាមទូរស័ព្ទនាព្រឹកថ្ងៃទី៨ កុម្ភៈ ម្សិលមិញថា បច្ចុប្បន្នក្រុមហ៊ុនកំពុងរៀបចំនិតិវិធីច្បាប់ ដើម្បីស្នើសុំពីរាជរដ្ឋាភិបាលលើគម្រោងអភិវឌ្ឍន៍នេះ។ ទោះជាយ៉ាងណាលោកមិនទាន់បញ្ជាក់ឲ្យដឹងពីទុនវិនិយោគលើគម្រោងនេះចំនួនប៉ុន្មាន និងចាប់ផ្តើមសាងសង់នៅពេលណានៅឡើយទេ ។
លោកបន្តថា ៖« អ្វីដែលខ្ញុំអាចបញ្ជាក់បាននាពេលនេះ គឺថាគម្រោងនេះពិតជាធ្វើនាពេលខាងមុខ ហើយទំហំផ្ទៃដីនៃទីក្រុងថ្មីនេះមានទំហំជាង១០០ហិកតា »។ លោកថា ៖« គម្រោងនេះនឹងត្រូវរៀបចំអភិវឌ្ឍន៍ដូចទីក្រុងកោះពេជ្រនាពេលបច្ចុប្បន្ននេះ »។ គម្រោងទីក្រុងរណបថ្មីនេះ នឹងត្រូវចាក់ខ្សាច់បំពេញនៅតាមជួរមាត់ទន្លេចាប់ពីតំបន់កោះនរា អូសស្របតាមទន្លេតូចឆ្ពោះទៅស្រុកកៀនស្វាយ ខេត្តកណ្តាល ។
អ្នកនាំពាក្រសួងរៀបចំដែនដី នគរូបនីយកម្ម និងសំណង់ លោកសេង ឡូត បានមានប្រសាសន៍ថា លោកមិនទាន់បានឃើញឯកសារដាក់សំណើពីក្រុមហ៊ុនមកនៅឡើយទេ ប៉ុន្តែលោកអះអាងថា សម័យបច្ចេកវិទ្យារីកចម្រើនបែបនេះ ការសាងសង់ទីក្រុងនៅតាមមាត់ទន្លេមិនមានអ្វីដែលធ្វើមិនបាននោះទេ សូម្បីតែភ្នំគេអាចចោះដើម្បីធ្វើផ្លូវឆ្លងកាត់បានដែរ ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោក ច្រឹក សុខនីម បានមានប្រសាសន៍ថា ក្នុងស្ថានភាពប្រទេសមានសន្តិភាព ស្ថិរភាពនយោបាយ និងកំណើនសេដ្ឋកិច្ចមានភាពល្អប្រសើរ ការកសាងទីក្រុងថ្មីបែបនេះជារឿងធម្មតា ហើយការកសាងទីក្រុងថ្មីនេះ នឹងជួយធ្វើឲ្យវិស័យសំណង់ និងអចលនវត្ថុនៅកម្ពុជាកាន់តែមានទំនុកចិត្តខ្ពស់ថែមទៀត។ លោកបន្តថា ៖« ការកសាងទីក្រុងរណបបែបនេះ នឹងជួយរួមចំណែកដល់ការអភិវឌ្ឍសេដ្ឋកិច្ច សង្គមកាន់តែប្រសើរឡើង ពិសេសទីក្រុងភ្នំពេញនឹងកាន់តែមានភាពរស់រវើក និងស៊ីវិល័យ »។
បច្ចុប្បន្ន គម្រោងអភិវឌ្ឍន៍អចលនទ្រព្យធំៗជាច្រើនបាននិងកំពុងសាងសាង់នៅក្នុងភូមិសាស្ត្រខណ្ឌច្បារអំពៅនេះ ។ ចំណែកតម្លៃដីធ្លីវិញបានកើនឡើងខ្ពស់គួរឲ្យកត់សម្គាល់ ជាពិសេសបន្ទាប់ពីផ្លូវជាតិលេខ១ បានស្ថាបនា និងពង្រីករួចរាល់ជាថ្មី ខណៈកាលពី១០ទៅ២០ឆ្នាំមុន តំបន់នោះមិនមានអ្នកណាចាប់អារម្មណ៍ឡើយ ហើយតម្លៃដីធ្លីស្ទើរមិនដល់១ដុល្លារផងក្នុង១ម៉ែត្រការ៉េ តែពេលបច្ចុប្បន្ននេះ វាបានកើនឡើងរហូតដល់ជិត១ពាន់ដុល្លារ ឬលើសនេះក្នុង១ម៉ែត្រការ៉េទៅហើយ ៕
ចែករំលែកព័តមាននេះ