ខេត្តតាកែវ ៖ ជនសង្ស័យម្នាក់ក្នុងករណីទំនាស់ពាក្យសម្តីបង្កជាអំពើហិង្សាដោយចេតនា ត្រូវបាននគរបាលប៉ុស្តិ៍រដ្ឋបាលបាស្រែ ស្រុកអង្គរបុរី ចាប់ឃាត់ខ្លួនបានតាមពាក្យបណ្តឹងរបស់ជនរងគ្រោះ បន្ទាប់ពីជនសង្ស័យបានយកថ្នោលទូកវាយទៅលើជនរងគ្រោះបណ្តាលឲ្យរងរបួសធ្ងន់។
ហេតុការណ៍ខាងលើនេះបានកើតឡើងកាលពីវេលាម៉ោង៧និង១០នាទីព្រឹកថ្ងៃទី៨ ខែកុម្ភៈ ឆ្នាំ២០១៩ នៅស្ទឹងសន្តោក ចំណុចព្រែកវាំងកែវ ស្ថិតក្នុងភូមិពួនកកា ឃុំបាស្រែ ស្រុកអង្គរបូរី ខេត្តតាកែវ។
ប៉ូលិសស្រុកអង្គរបូរីបានអោយដឹងថា ជនសង្ស័យឈ្មោះ ឆឹង ណាក់ ភេទប្រុស អាយុ៤៦ឆ្នាំ រស់នៅភូមិតាអី ឃុំបាស្រែ ស្រុកអង្គរបូរី។ ចំណែកជនរងគ្រោះឈ្មោះ យ៉ាំ ហុង ភេទប្រុស អាយុ៥១ឆ្នាំ រស់នៅក្នុងភូមិឃុំជាមួយគ្នា ត្រូវរបួសត្រង់ក្បាលចំហៀងខាងស្តាំយ៉ាងធ្ងន់ធ្ងរ។
នៅចំពោះមុខប៉ូលិស ជនសង្ស័យបានឆ្លើយសារភាពថា ខ្លួនពិតជាបានយកថ្នោលទូកវាយទៅលើជនរងគ្រោះបណ្តាលអោយរបួសពិតប្រាកដមែន មូលហេតុគឺមកពីទំនាស់ពាក្យសម្តីរួចក៏បង្កជាអំពើហិង្សាតែម្តង។
លោកវរសេនីយ៍ឯកយ៉ុង ញីវ នាយការិយាល័យព្រហ្មទណ្ទកំរិតស្រាលខេត្តបានអោយដឹងថាបច្ចុប្បន្ន សមត្ថកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងខេត្តដើម្បីចាត់ការទៅតាមច្បាប់នារសៀលថ្ងៃទី៩ កុម្ភៈ ២០១៩នេះ ៕
ចែករំលែកព័តមាននេះ