ខេត្តក្រចេះ ៖ ប្តីវ័យក្មេងម្នាក់ត្រូវបាននគរបាលស្រុកសំបូរចាប់ឃាត់ខ្លួន បន្ទាប់ពីជនសង្ស័យម្នាក់នេះ បានយកអង្រែបុកគ្រឿង និងដងចបវាយទៅលើស្ត្រីជាប្រពន្ឋដែលមានវ័យចាស់ជាង បណ្តាលឲ្យស្លាប់ក្នុងថ្លុកឈាម ព្រោះភ្លើងប្រច័ណ្ឌ។
ហេតុការណ៍ខាងលើនេះត្រូវបាននគរបាលព្រហ្មទណ្ឌ ស្រុកសំបូរប្រាប់ឱ្យដឹងថា បានកើតឡើងកាលពីថ្ងៃទី៩ កុម្ភៈ នៅភូមិសំភិន ឃុំកំពង់ចាម ស្រុកសំបូរ ។
ជនរងគ្រោះដែលស្លាប់ឈ្មោះ អែប ពៅ ភេទស្រី អាយុ៥០ឆ្នាំ ត្រូវជាប្រពន្ធ ចំណែកជនសង្ស័យជាប្តីឈ្មោះ ឈីន សុឃាប អាយុ៣៣ឆ្នាំ ។
អធិការនគរបាលស្រុកសំបូរ លោកវរសេនីយ៍ឯក ប៊ុន ឈឿន បានថ្លែងប្រាប់ឲ្យដឹងថា ជនរងគ្រោះជាស្ត្រីមេម៉ាយ និងទើបតែមកយកជនសង្ស័យជាប្តីដែលមានវ័យក្មេងជាងកាលពីប៉ុន្មានឆ្នាំមុននេះ ដោយមិនមានកូននោះទេ ។
លោកបន្តថា មុនពេលកើតហេតុ ជនសង្ស័យបានរករឿងឈ្លោះជាមួយស្ត្រីរងគ្រោះជាប្រពន្ឋ ដោយសារតែជនសង្ស័យបានប្រច័ណ្ឌប្រពន្ឋជាមួយនឹងបងជីដូនមួយរបស់ខ្លួន ។ លុះនៅថ្ងៃកើតហេតុ ជនសង្ស័យស្រវឹងស្រា បានឈ្លោះទាស់ទែងគ្នាជាមួយនឹងស្ត្រីជាប្រពន្ឋនៅក្រោយផ្ទះ ហើយជនសង្ស័យបានយកអង្រែបុកគ្រឿងវាយទៅលើស្ត្រីជាប្រពន្ឋ មិនតែប៉ុណ្ណោះថែមទាំងយកដងចបមកវាយបន្ថែមទៀត។
លោកអធិការបានបញ្ជាក់ថា ក្នុងហេតុការណ៍នោះដែរ អ្នកភូមិមិនអាចជួយឃាត់ទាន់នោះទេ ដោយសារជនសង្ស័យបានវាយទៅលើស្ត្រីរងគ្រោះទាំងកំរោល និងយ៉ាងចាស់ដៃ បណ្តាលឱ្យស្ត្រីរងគ្រោះបានស្លាប់នៅនឹងកន្លែងកើតហេតុ ។ បន្ទាប់ពីកើតហេតុ អ្នកភូមិបានរាយការណ៍ទៅសមត្ថកិច្ចដើម្បីចុះមកពិនិត្យ ។
លោកអធិការបញ្ជាក់ទៀតថា ក្រោយទទួលបានព័ត៌មានពីប្រជាពលរដ្ឋភ្លាមៗ កម្លាំងនគរបាលបានចុះទៅដល់កន្លែងកើតហេតុ និងឃាត់ខ្លួនជនសង្ស័យបានតែម្តង៕
ចែករំលែកព័តមាននេះ