រាជធានីភ្នំពេញ ៖ ក្មេងប្រុសអាយុ៦ឆ្នាំម្នាក់បានស្លាប់បាត់បង់ជីវិត និងស្ត្រីជាម្តាយមីងបានរងរបួសធ្ងន់ ខណៈជនរងគ្រោះទាំង២នាក់ជិះម៉ូតូមួយគ្រឿងឆ្លងផ្លូវជាតិលេខ៥ ហើយត្រូវរថយន្តមួយគ្រឿងបើកជែងរថយន្តដឹកកុងតឺន័រមួយគ្រឿងទៀត រួចមកបុកពេញទំហឹង ។
ហេតុការណ៍គ្រោះថ្នាក់ចរាចរណ៍គួរឱ្យរន្ធត់ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី៩ ខែកុម្ភៈ ឆ្នាំ២០១៩ នៅតាមផ្លូវជាតិលេខ៥ ក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
ក្មេងប្រុសដែលស្លាប់ក្នុងគ្រោះថ្នាក់ចរាចរណ៍ខាងលើនោះឈ្មោះ សុខ ឡុង អាយុ៦ឆ្នាំ រីឯម្តាយមីងដែលរងរបួសធ្ងន់ឈ្មោះ នៅ សុភាព អាយុ៤៥ឆ្នាំ ស្នាក់នៅភូមិឌួង សង្កាត់ព្រែកព្នៅ ខណ្ឌព្រែកព្នៅ ។ ចំណែកភាគីខាងរថយន្តមួយគ្រឿងខាងលើម៉ាកសាំយ៉ុង ពណ៌លឿង ពាក់ស្លាកលេខ ភ្នំពេញ ២AP-៥៤៨៩ បើកបរដោយឈ្មោះ រ៉ា សោភ័ណ្ឌ ភេទប្រុស អាយុ២៨ឆ្នាំ ស្នាក់នៅភូមិរំលេច ឃុំរំលេច ស្រុកបាកាន ខេត្តពោធិ៍សាត់ ត្រូវបានសមត្ថកិច្ចឃាត់ខ្លួន ។
តាមព័ត៌មានបានអោយដឹងថា នៅមុនពេលកើតហេតុ គេឃើញក្មេងរងគ្រោះជាអ្នករួមដំណើរ ចំណែកម្តាយមីងជាអ្នកបើកបរម៉ូតូមួយគ្រឿងម៉ាកហុងដា ធុនC125 ពណ៌ខ្មៅ ពាក់ស្លាកលេខ ភ្នំពេញ ១FV-៣៩៥៤ បានធ្វើដំណើរតាមផ្លូវជាតិលេខ៥ ក្នុងទិសដៅពីត្បូងទៅជើង លុះមកដល់កន្លែងកើតហេតុជិតដល់ផ្ទះក៏បានបត់ឆ្វេងដើម្បីឆ្លងផ្លូវ ស្រាប់តែមានរថយន្តមួយគ្រឿងម៉ាកសាំងយ៉ុងបានបើកជែងខាងឆ្វេងរថយន្តដឹកកុងតឺន័រមួយគ្រឿង ទៅបុកម៉ូតូជនរងគ្រោះពេញទំហឹង បណ្តាលអោយក្មេងប្រុសម្នាក់ស្លាប់នៅកន្លែង ហើយម្តាយមីងដែលជាអ្នកបើកបរបានរងរបួសធ្ងន់ ត្រូវបានគេដឹកបញ្ជូនទៅសង្គ្រោះនៅមន្ទីរពេទ្យ។ បន្ទាប់ពីកើតហេតុ អ្នកបើកបររថយន្តត្រូវបានកម្លាំងនគរបាលចាប់ឃាត់ខ្លួនផងដែរ ។
ក្រោយកើតហេតុ អ្នកបើកបររថយន្ត និងរថយន្ត ព្រមទាំងម៉ូតូ ត្រូវបានសមត្ថកិច្ចបញ្ជូនទៅកាន់ការិយាល័យចរាចរណ៍ជើងគោកដើម្បីចាត់ការតាមច្បាប់ ។ ចំណែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ