ខេត្តសៀមរាប ៖ បុរសម្នាក់ដើរឆ្លងផ្លូវមិនប្រយ័ត្នត្រូវរថយន្ត១គ្រឿងមិនស្គាល់ម៉ាកបើកបរក្នុងល្បឿនលឿនដូចហោះទៅបុកបណ្តាលឱ្យស្លាប់ដាច់ជាកង់ៗឈាមហូរដូចទឹកនៅកណ្តាលផ្លូវគួរឱ្យរន្ធត់ បង្កឱ្យមានការភ្ញាក់ផ្អើលពេលផ្លូវ ។ ហេតុការគ្រោះថ្នាកចរាចរណ៍គួរឱ្យរន្ធត់នេះបានកើតឡើងនៅវេលាម៉ោង០៨និង៥០នាទីយប់ ថ្ងៃទី០៨ ខែកុម្ភៈ ឆ្នាំ២០១៩ ស្ថិតនៅចំណុចខាងលិចស្ពានគង់ម៉ុច៤០០ម ក្នុងភូមិកក្រាញ់ សង្កាត់សៀមរាប ក្រុងសៀមរាប ។
បើតាមប្រភពពីមន្ត្រីជំនាញដែលបានចុះដល់កន្លែងកើតហេតុបានប្រាប់ថា ករណីគ្រោះថ្នាក់ចរាចរណ៏រវាងមនុស្សដើរ និងរថយន្តមិនស្គាល់ដែលបុកអ្នករងគ្រោះឈ្មោះ ប៉ែន សានិត ភេទប្រុស អាយុ២៥ឆ្នាំ ភូមិកក្រាញ់ សង្កាត់សៀមរាប ក្រុងសៀមរាប បណ្តាលឱ្យស្លាប់ដាច់ជាកង់ៗភ្លាមៗនៅហ្នឹងកន្លែង ។ ចំណែករថយន្តនោះបានបើករត់គេចបាត់ដោយសុវត្ថិភាព ។
ប្រភពបានបញ្ជាក់ទៀតថា ទោះជាយ៉ាងណារថយន្តដែលបង្កនោះក៏រត់គេចមិនរួចពីសំណាញ់ច្បាប់បានដែរ ។ បច្ចុប្បន្នសាកសពជនរងគ្រោះត្រូវបានកម្លាំងសមត្ថកិច្ចជំនាញបានធ្វើការប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីរួចរាល់ទាំងយប់ ៕
ចែករំលែកព័តមាននេះ