ខេត្តកណ្តាល ៖ យុវជន២នាក់ត្រូវបានប៉ូលិសប៉ុស្តិ៍រដ្ឋបាលឃុំឈើខ្មៅ ចាប់ខ្លួនកាលពីវេលាម៉ោង១០យប់ ថ្ងៃទី២៤ សីហា តាមពាក្យបណ្តឹងរបស់នារីរងគ្រោះថា បានរួមគ្នាចាប់រំលោភនាងម្តងម្នាក់ រហូតបានសំរេច កាលពី វេលាម៉ោង៨យប់ ថ្ងៃទី២៤ សីហា នៅឃុំឈើខ្មៅ ស្រុកកោះធំ ។ តាមប្រភពព័ត៌មានឱ្យដឹងថា ជនជាប់ចោទម្នាក់បានទូរស័ព្ទហៅនារីរងគ្រោះឱ្យមកជួប ហើយឌុបគ្នាដើរលេង និងជិះម៉ូតូបង្ហួសទៅកន្លែងស្ងាត់ដែលមិត្តភក្តិរបស់ខ្លួនរងចាំរួចជាស្រេច ហើយក៏ធ្វើសកម្មភាពចាប់រំលោភតែម្តង ។ តាមព័ត៌មានពីមន្ត្រីប៉ុស្តិ៍បានឱ្យដឹងថា យុវជនជាប់ចោទទាំង២នាក់ដែលត្រូវចាប់ខ្លួនម្នាក់ឈ្មោះងន ចិន្តា អាយុ១៩ឆ្នាំ ជាអ្នកទូរស័ព្ទណាត់នារីរងគ្រោះឱ្យមកជួប និងម្នាក់ទៀតឈ្មោះសេង តុងហេង អាយុ២៣ឆ្នាំ អ្នកទាំងពីររស់នៅឃុំចុងកោះ ស្រុកកោះធំ ជាមួយគ្នា ។ ចំណែកនារីរងគ្រោះឈ្មោះស.សម អាយុ២៣ឆ្នាំ ។
ប្រភពដដែលបានឱ្យដឹងទៀតថា មុនពេលជនជាប់ចោទឈ្មោះងន ចិន្តា បានទូរស័ព្ទហៅនារីរងគ្រោះឱ្យទៅជួប ពេលនោះនារីរងគ្រោះក៏មកជូបតាមការណាត់ ហើយជនជាប់ចោទក៏បានឌុបនាងតាមម៉ូតូសំដៅទៅខាងក្រោយភូមិដែលជាកន្លែងស្ងាត់ ។ ពេលទៅដល់កន្លែងស្ងាត់នោះក៏បានជួបជាមួយឈ្មោះសេង តុងហេង ឈរនៅចាំទីនោះស្រេច ហើយឈ្មោះងន ចិន្តា ក៏ឈប់ម៉ូតូនៅទីនោះដែរ ។ បន្ទាប់មកជនជាប់ចោទទាំងពីរនាក់ បានធ្វើសកម្មភាពចាប់រំលោភនាងរហូតបានសំរេចម្នាក់ម្តងៗ រួចក៏បានឌុបនាងត្រឡប់ទៅភូមិវិញ ហើយក៏បែកគ្នារៀងខ្លួនទៅ ។
លុះក្រោយមកនារីរងគ្រោះបានប្តឹងប៉ូលិសប៉ុស្តិ៍ឱ្យធ្វើការឃាត់ខ្លួនយុវជនជាប់ចោទទាំងពីរនាក់តែម្តង ។ លោកភន សារឿន អធិការប៉ូលិសស្រុកកោះធំ បានប្រាប់អ្នកយកព័ត៌មានតាមទូរស័ព្ទថា កំលាំងប៉ូលិសបានបញ្ជូនជនជាប់ចោទពីបទរំលោភសេពសន្ថវៈទាំង២នាក់ ទៅកាន់អធិការប៉ូលិសហើយ ដោយប៉ូលិសព្រហុ្មទណ្ឌកំពុងធ្វើកំណត់ហេតុ និងធ្វើការសាកសួរ ។ ទោះបីជាបែបណាលោកអធិការមិនអនុញ្ញាតឱ្យថតរូបជនជាប់ចោទទេ ។ ចំណែកជនជាប់ចោទទាំងពីរនាក់ត្រូវបានឃុំខ្លួនក្នុងបន្ទប់មិនអាចធ្វើការសាកសួរបំភ្លឺជុំវិញការចោទខាងនោះបានដែរ ៕
ចែករំលែកព័តមាននេះ