ខេត្តបន្ទាយមានជ័យ ៖ ថ្វីត្បិតតែថ្មីៗគេហទំព័រនិងសារព័ត៌មានក្នុងស្រុក បានធ្វើការរិះគន់ធ្ងន់ៗលើមន្ត្រីនិងសមត្ថកិច្ចនៅមាត់ច្រកតំបន់បឹងត្រកួន ក្នុងស្រុកថ្មពួកថា ព្រងើយកន្តើយមិនទប់ស្កាត់ការនាំចេញធ្យូងពីកម្ពុជា ព្រោះតែមានការសោកស្តាយព្រៃឈើដែលកំពុងរងការកាប់បំផ្លាញមិនឈប់ឈរជារៀងរាល់ថ្ងៃ ។ ទោះបីជាបែបណា មកទល់ពេលនេះ…
ខេត្តបន្ទាយមានជ័យ ៖ ថ្វីត្បិតតែថ្មីៗគេហទំព័រនិងសារព័ត៌មានក្នុងស្រុក បានធ្វើការរិះគន់ធ្ងន់ៗលើមន្ត្រី
និងសមត្ថកិច្ចនៅមាត់ច្រកតំបន់បឹងត្រកួន ក្នុងស្រុកថ្មពួកថា ព្រងើយកន្តើយមិនទប់ស្កាត់ការនាំចេញធ្យូងពីកម្ពុជា ព្រោះតែមានការសោកស្តាយព្រៃឈើដែលកំពុងរងការកាប់បំផ្លាញមិនឈប់ឈរជារៀងរាល់
ថ្ងៃ ។
ទោះបីជាបែបណា មកទល់ពេលនេះ ហាក់នៅដដែលគ្មានអ្វីប្រែប្រួលទេ ពោលគឺធ្យូងខ្មែរនៅតែត្រូវបានឈ្មួញថៃចូលមកទិញដឹកចេញតាមច្រកតំបន់បឹងត្រកួនកាត់មុខស្ថាប័ន និងសមត្ថកិច្ចពាក់ព័ន្ធខ្មែរ ពិសេសគយនិងរដ្ឋាករច្រកតំបន់ យ៉ាងរលូនមិនខ្វល់ពីការិះគន់ពីមជ្ឈដ្ឋានជាតិនានាដែលគេសង្ស័យថាគ្មានអ្វីធំជាងលោកតាប្រាក់ជាម្ចាស់ចិត្តឡើយ ។
ត្រាក់ទ័រថៃបានចូលមកដឹកធ្យូងលើទឹកដីខ្មែរជាហូហែ បើទោះជាឈ្មួញកណ្តាលជាខ្មែរអះអាងថាពេលនេះតម្លៃធ្យូងចុះថោកជាងមុនបន្តិចក្តី គឺឈ្មួញថៃយកមកមធ្យោបាយមកដឹកតែម្តងឱ្យតែខ្មែរមានធ្យូងលក់ ។ ចំណែកខ្មែរវិញ កាប់ឈើគ្មានសល់ទេ បញ្ចូលឡដុតចេញជាធ្យូងមិនលក់ទេក្នុងស្រុក ទុកលក់ឱ្យថៃវិញបានថ្លៃជាង ។
ឈ្មួញខ្មែរម្នាក់ឈ្មោះបារាំងអះអាងថា ការនាំធ្យូងចេញទៅថៃកន្លងមកមាន៣ក្រុមហ៊ុន ប៉ុន្តែដោយសារការចុះផ្សាយរបស់សារព័ត៌មានក្នុងស្រុក ក្រុមហ៊ុនខ្លះបានផ្អាកពីការនាំចេញតាមច្រកតំបន់បឹងត្រកួន ងាកទៅដឹកចេញតាមច្រករបៀងប្រាសាទត្បែង ក្នុងឃុំបន្ទាយឆ្មារជិតជើងភ្នំដងរែកវិញ កុំឱ្យច្រំដែលពេក ដូរច្រកម្តង ព្រោះចំណាយលុយដូចគ្នា ។
ពេលសាកសួរថា តើការនាំចេញធ្យូងតាមច្រកតំបន់បឹងត្រកួនត្រូវបង់ប្រាក់ឲ្យមន្ត្រីនិងសមត្ថកិច្ចច្រកតំបន់ឬក៏អត់ ? ឈ្មួញខាងលើឆ្លើយថា គាត់ដឹងត្រឹមតែទទួលទិញពីអ្នកស្រុកនៅចំណុចលើកដាក់ក្នុងភូមិបន្ទាយមានឬទ្ធិឃុំគោករមៀតតែប៉ុណ្ណោះ ។ រីឯការដឹកចេញអាស្រ័យលើឈ្មួញថៃជាអ្នករត់ការដោយខ្លួនឯង។ ចំណែកប្រភពខ្លះថា បើការដឹកចេញមិនមានពាក់ព័ន្ធនឹងការបង់ប្រាក់ទេនោះ គឺមិនអាចឆ្លងផុតមាត់ច្រកតំបន់ខាងលើបានឡើយដឹងស្រាប់ហើយមនុស្សនិងប្រាក់ យក្សនិងសាច់ ។
ពាក់ព័ន្ធករណីរិះគន់ជុំទិសនេះ លោក ញឹក ប៊ុនលេខ ប្រធានការិយាល័យគយនិងរដ្ឋាករច្រកតំបន់បឹងត្រកួនមិនអាចទាក់ទងសុំការបំភ្លឺបានទេដោយទូរស័ព្ទរបស់លោកចុចចូល៣ដង គ្មានអ្នកទទួល ។ ដោយឡែកលោក យ៉ិម លី ប្រធានមន្ទីរបរិស្ថានខេត្តបន្ទាយមានជ័យក៏ចុចចូល៣ដងដែរគ្មានអ្នកទទួលដូចគ្នា ។
អ្វីដែលគួរឱ្យអៀនខ្មាស់នោះគឺធ្យូងត្រូវនាំចេញរាប់រយតោនក្នុង១ថ្ងៃ ពីប្រទេសដែលធនធានព្រៃឈើរងការកាប់បំផ្លាញស្ទើរតែក្លាយជាវាលសាហារ៉ាក្តី ក៏នៅតែជាអ្នកផ្គត់ផ្គន់សម្រាប់ប្រទេសថៃដែលសម្បូរដោយព្រៃឈើទៅវិញ ៕
ចែករំលែកព័តមាននេះ