ខេត្តស្វាយរៀង ៖ ប្រជាពលរដ្ឋរស់នៅក្នុងស្រុករមាសហែកកំពុងកាក់កប ខណៈឫស្សីពីងពង់ និងឬស្សីស្រុក ឬស្សីព្រៃ មានហាងឆេងនាំចេញទៅប្រទេសវៀតណាម ដើម្បីធ្វើជាគ្រឿងសង្ហារឹម ។
ឫស្សីទាំងបីប្រភេទនេះគេយកទៅធ្វើផ្ទះ និងគ្រឿងសង្ហារឹមផ្សេងៗ ដោយមើលឃើញពីគុណប្រយោជន៍របស់ឫស្សីនេះទើបអ្នកស្រុករមាសហែក និងអាជីវករដែលរកស៊ីទិញដើមឫស្សីពីងពង់ឬស្សីស្រុក ជាពិសេសអ្នករស់នៅឃុំដូង ដែលមានឫស្សីពីងពង់ និងឬស្សីស្រុក ស្រាប់គឺ រីករាយព្រោះ មានទីផ្សារលក់ទៅឱ្យឈ្មួញវៀតណាមមានហាងឆេងកើនឡើងដោយបានតម្លៃសមរម្យ និងអាចដោះស្រាយជីវភាពប្រចាំថ្ងៃល្អប្រសើរ ។
បើតាមប្រជាពលរដ្ឋដែលរស់នៅភូមិបាត់ត្រាស់ ឃុំដូង បានឱ្យដឹងថា សព្វថ្ងៃគាត់មានចិត្តសប្បាយរីករាយខ្លាំងណាស់ ខណៈដែលគាត់មានជីវភាពធូរធារបានមួយកម្រិត ដោយមានក្រុមឈ្មួញវៀតណាមឡើងមកទិញដល់ភូមិ ឃុំរបស់ពួកគាត់តែម្តងមិនពិបាកក្នុងការដឹកជញ្ជូនចុះឡើងនោះឡើយ ។ ប្រភពដដែលបានឱ្យដឹងទៀតថាឫស្សីពីងពង់នេះ ត្រូវបានប្រជាពលរដ្ឋខ្លះបានដើរប្រមូលទិញពីភូមិឃុំស្រុកផ្សេងៗទៀត ក្នុងខេត្តស្វាយរៀងមកលក់នៅភូមិ ត្រាស់ឃុំដូងស្រុករមាសហែកនេះ ។
រីឯឬស្សីស្រុកឬស្សីព្រៃដើរប្រមូលទិញក្នុងស្រុករមាសហែក ហើយក៏មានរថយន្តរបស់ក្រុមឈ្មួញវៀតណាមមកដឹកយកទៅលក់បន្តទៀត នៅប្រទេសវៀតណាម ដោយឡែកឫស្សីពីងពង់មួយដើម បើជាប្រភេទលេខមួយបានតម្លៃ២,៧០០រៀល លេខ២បានតម្លៃ២០០០រៀលនិងប្រភេទលេខ៣បានតម្លៃចំនួន១,៥០០រៀល ។
ដោយឡែកក្រុមអាជីវករវិញក៏បានឱ្យដឹងផងដែរថា ឫស្សីពីងពង់នេះគេយកទៅធ្វើជាគ្រឿងសង្ហារឹមមានតុកៅអី និងធ្វើផ្ទះសំបែងផងដែរ ។ មិនតែប៉ុណ្ណោះ បើពុំមានការដាំឡើងវិញទេច្បាស់ជាប្រភេទឫស្សីពីងពង់ និងបាត់បន្តិចម្តងៗអាចឈានទៅដល់ការបាត់បង់ទាំងស្រុង ព្រោះឈ្មួញវៀតណាមមានតម្រូវការច្រើន ដើម្បីផ្គត់ផ្គង់ទីផ្សារនៅប្រទេសរបស់គេ ។
ទោះបីជាយ៉ាងណាក៏ដោយឫស្សីពីងពង់នេះ បើដាំវាវិញមានរយៈពេលយូរទម្រាំបានផល គឺដាំតាមធម្មជាតិរបស់វាពី៤ទៅ៦ឆ្នាំឯណោះ ទើបទទួលផលបានហើយអ្វីដែលជាប្រការគួរឱ្យចាប់អារម្មណ៍នោះនៅប្រទេសយើងពុំមានទីផ្សារនោះទេ ហើយនៅក្នុងខេត្តស្វាយរៀងមានសិប្បកម្មសម្រាប់កែច្នៃធ្វើតុកៅអីដែរជាលក្ខណៈគ្រួសារ នៅក្នុងស្រុកស្វាយជ្រំ ក៏ប៉ុន្តែតម្រូវការតិចតួចគ្មានទីផ្សារទេ គឺមានអ្នកប្រើប្រាស់តិចតួចបំផុតគេនិយមប្រើប្រាស់តុកៅអីជ័រ ឬតុដែកអ៊ីណុក បើអ្នកមានគួរសមគេប្រើតុកៅអីឈើប្រណិត ទើបគ្មានទីផ្សារក្នុងស្រុកត្រូវនាំចេញដូច្នេះ ៕
ចែករំលែកព័តមាននេះ