ប្រទេសអង់គ្លេស ៖ ការិយាល័យស៊ើបអង្កេតអង់គ្លេសលើគ្រោះថ្នាក់អាកាស AAIB បានរាយការណ៍កាលពីយប់ថ្ងៃទី៦ កុម្ភៈថា សាកសពមនុស្សម្នាក់ត្រូវបានស្រង់យកចេញពីបំណែកយន្តហោះ ដែលដឹកកីឡាករបាល់ទាត់អាហ្សង់ទីន លោក EMILIANO…
ប្រទេសអង់គ្លេស ៖ ការិយាល័យស៊ើបអង្កេតអង់គ្លេសលើគ្រោះថ្នាក់អាកាស AAIB បានរាយការណ៍កាលពីយប់ថ្ងៃទី៦ កុម្ភៈថា សាកសពមនុស្សម្នាក់ត្រូវបានស្រង់យកចេញពីបំណែកយន្តហោះ ដែលដឹកកីឡាករបាល់ទាត់អាហ្សង់ទីន លោក EMILIANO SALA ក្រោយបាត់ដានពីរ៉ាដា តាំងពីថ្ងៃទី២១ មករា មកពីលើសមុទ្រ MANCHE។
មូលហេតុនៃគ្រោះថ្នាក់យន្តហោះនោះដែលគេយល់ថា តារាបាល់ទាត់រូបនោះ និងអ្នកបើកយន្តហោះជនជាតិអង់គ្លេស លោកDAVID IBBOTSON ពិតជាស្លាប់ នៅពុំទាន់ដឹងនៅឡើយ។ ប៉ុន្តែដោយថតបណ្ដារូបភាពនៃបំណែក យន្តហោះ ពួកអ្នកស៊ើបអង្កេតគិតថាអាចប្រមូលបានដានខ្លះ។
ក្នុងសេចក្ដីប្រកាសមួយការិយាល័យស៊ើបអង្កេតនេះគូសបញ្ជាក់ថា ក្នុងលក្ខខណ្ឌដ៏លំបាក ការិយាល័យស៊ើបអង្កេត និងបណ្ដាអ្នកឯកទេសរបស់ខ្លួន អាចស្រង់យកបានសាកសពមនុស្សម្នាក់ ពីក្នុងបំណែកយន្តហោះដែលធ្លាក់ក្នុងសមុទ្រ។ ប្រតិបត្តិការរុករកប្រព្រឹត្តទៅក្នុងភាពកក់ក្ដៅខ្លាំង ហើយសាច់ញាតិគ្រួសារជនរងគ្រោះ បានទទួលព័ត៌មាននានាជាបន្តបន្ទាប់។
យន្តហោះម៉ាស៊ីនមួយធុនPIPER MALIBU ដែលដឹកតារាបាល់ទាត់អាយុ២៨ឆ្នាំរូបនេះនិងអ្នកបើកលោក IBBOTSONអាយុ៥៩ឆ្នាំ ទៅកាន់ក្លឹបថ្មីនៅCARDIFF ក្រោយបាត់ដាន ត្រូវបានរកឃើញធ្លាក់ក្នុងសមុទ្រ កាលពីថ្ងៃទី៣កុម្ភៈ។ កន្លែងដែលយន្តហោះបាត់ពីអេក្រង់រ៉ាដាលើសមុទ្រMANCHE ស្ថិតនៅចម្ងាយប្រមាណ២០គីឡូម៉ែត្រខាងជើងក្រុងGUERNESEY រួចបំណែកយន្តហោះរកឃើញនៅបាតសមុទ្រជម្រៅ៦៧,៧ម៉ែត្រ។
សាកសពដែលស្រង់បានត្រូវបញ្ជូនមកកាន់PORTLAND ដែលបន្ទាប់មកនឹងធ្វើកោសល្យវិច្ឆ័យ សំដៅកំណត់អត្តសញ្ញាណ៕
ចែករំលែកព័តមាននេះ