ខេត្តបន្ទាយមានជ័យ ៖ បុរសម្នាក់កំពុងរស់នៅយ៉ាងសែនលំបាកក្នុងខ្ទមកម្សត់តូចមួយ ដោយយកភួយធ្វើជាកន្ទេល ឯកន្ទេលធ្វើជាដំបូលលើដីចំណីផ្លូវ និងរស់នៅអាស្រ័យអ្នកស្រុក ក៏ដូចជាអាជ្ញាធរផ្តល់ឱ្យ តើមូលហេតុអ្វីបានជាបុរសរូបនេះរស់ក្នុងស្ថានភាពវេទនាតោកយ៉ាកបែបនេះ ?
បុរសខាងលើឈ្មោះ ស៊ាង នឿន អាយុ៣៩ឆ្នាំ ជាជនពិការជើងស្តាំ ដោយសារគ្រោះថ្នាក់ដួលលើទូកនេសាទថៃ ក្នុងខេត្តរ៉ាក់យ៉ង កាលពីជាង៥ឆ្នាំមុន និងបច្ចុប្បន្នរស់នៅក្នុងភូមិប្រាសាទត្បែង ឃុំបន្ទាយឆ្មារ ស្រុកថ្មពួក ។ បុរសខាងលើបានប្រាប់ឱ្យដឹងថា ឪពុករបស់គាត់ត្រូវគេបាញ់ស្លាប់តាំងពីសម័យសង្គ្រាម ខណៈម្តាយមានប្តីក្រោយរស់នៅឯស្រុកសំពៅលូន ខេត្តបាត់ដំបង ។
បុរសដដែលបន្តថា ខ្លួនជាកូនទោលពុំមានបងប្អូនទៀតឡើយ ។ ដោយសារខឹងម្តាយមានប្តីក្រោយពិបាករស់នៅជាមួយ ខ្លួនក៏ទៅធ្វើជាពលករលើទឹកដីថៃនៅខេត្តរ៉ាក់យ៉ង ជាកម្មករលើទូកនេសាទ ។ លុះមានគ្រោះថ្នាក់របួសធ្ងន់ដោយសារជាន់ផ្កាថ្មដួល លើទូកនេសាទថៃ ខ្លួនក៏វិលត្រឡប់មកស្រុកខ្មែរវិញរស់នៅក្នុងភូមិឃុំខាងលើរយៈពេលជិត៥ឆ្នាំមកហើយ ។ បុរសដដែលបន្តថា ពីមុនរស់នៅជាមួយគ្រួសារមួយក្នុងភូមិដែរ ប៉ុន្តែមួយរយៈចុងក្រោយនេះ គ្រួសារដែលខ្លួនធ្លាប់សុំរស់នៅជាមួយគេលក់ដី គាត់ក៏ទៅរស់នៅលើដីចំណីផ្លូវជាទីតាំងបច្ចុប្បន្នតែម្តង ។
បុរសកម្សត់និយាយថា កន្លងមក ពេលជំងឺរើម្តងៗគាត់មានការពិបាកជាងស្លាប់ទៅទៀត ហើយបានទៅមន្ទីរពេទ្យរដ្ឋក្នុងស្រុកថ្មពួក ដើម្បីសម្រាកព្យាបាលដែរ ។ បុរសរូបនេះបន្តថា ការសម្រាកព្យាបាលនៅមន្ទីរពេទ្យគេមិនយកប្រាក់ទេ ប៉ុន្តែសំខាន់គាត់គ្មានប្រាក់ធ្វើសោហ៊ុយចុះឡើង និងសម្រាប់ចាយវាយនៅក្នុងមន្ទីរពេទ្យ ។
គ្រួសារមួយជាអាជីវករលក់គ្រឿងទេសនៅជាប់ផ្លូវចូលទៅច្រករបៀងប្រាសាទត្បែង បានប្រាប់អ្នកយកព័ត៌មានកោះសន្តិភាពថា បុរសខាងលើជាមនុស្សត្រឹមត្រូវ មិនមែនជាមនុស្សវិកលចរិត ឬមនុស្សឆ្កួតទេ ។
គ្រួសារខាងលើបន្តថា ដោយសារការអាណិតអាសូរគ្រួសារគាត់ក៏ដូចជាអ្នកស្រុក ថែមទាំងសមត្ថកិច្ច ពិសេសអាជ្ញាធរភូមិតែងតែផ្តល់បាយទឹក ជូនសម្លៀកបំពាក់ ជូនជាអង្ករ និងពេលខ្លះជាប្រាក់ដើម្បីទិញនំចំណីហូបទៀតផង ។
បុរសកម្សត់ខាងលើនិយាយថា ខ្លួនចង់ទៅមន្ទីរពេទ្យដើម្បីព្យាបាលជំងឺ ប៉ុន្តែគ្មានប្រាក់សម្រាប់ធ្វើសោហ៊ុយ និងសម្រាប់ចាយវាយពេលដេកព្យាបាល ព្រោះខ្លួនគ្មានសាច់ញាតិ គឺជាជីវិតឯកោ ។ គាត់ក៏មិនភ្លេចអំពាវនាវសុំសប្បុរសជនក្នុងនិងក្រៅប្រទេស មេត្តាជួយដល់រូបគាត់យកតែបុណ្យផង ៕
ចែករំលែកព័តមាននេះ