មេធាវីថា លោកកឹម សុខា មិនគាំទ្រយុទ្ធសាស្ត្រទូងស្គររបស់លោកសម រង្ស៊ី
មេធាវីរបស់លោក កឹម សុខា បាននិយាយថ្មីៗនេះថា លោក កឹម សុខា មិនគាំទ្រដល់យុទ្ធសាស្ត្រណាមួយដែលស្រែកបំពងសំឡេងដោយលោក សម រង្ស៊ី…
មេធាវីរបស់លោក កឹម សុខា បាននិយាយថ្មីៗនេះថា លោក កឹម សុខា មិនគាំទ្រដល់យុទ្ធសាស្ត្រណាមួយដែលស្រែកបំពងសំឡេងដោយលោក សម រង្ស៊ី នោះទេ ។
លោកចាន់ ចេង សហមេធាវីការពារក្តីឲ្យលោកកឹម សុខា បានលើកឡើងលើបណ្តាញសង្គមកាលពីថ្មីៗនេះថា លោក កឹម សុខា «គាត់ (កឹម សុខា) មិនមានសេរីភាពមែន ប៉ុន្តែគាត់មានសម្បជញ្ញៈដឹងថា អ្នកកំពុងតែធ្វើអ្វី មកលើរូបគាត់ និងប្រទេសជាតិ» ។ លោកបញ្ជាក់ថា «យុទ្ធសាស្ត្រស្ងប់ស្ងាត់ កាលៈទេសៈខ្លះឈ្នះទាំងខ្លួនឯងឈ្នះទាំងគូប្រជែង ។
យុទ្ធសាស្ត្របំពងសំឡេងគ្រប់កាលៈទេសៈ អាចជាការដេញបង្អើលចាប តែក៏អាចជាការដាស់ខ្លាឲ្យដេញខាំខ្លួន និងអ្នកភូមិផងដែរ» ។ លោកមេធាវីបានលើកឡើងទៀតថា លោកកឹម សុខា មិនធ្វើ និងមិនគាំទ្រនូវយុទ្ធសាស្ត្រណាដែលរុញច្រានប្រជាពលរដ្ឋខ្មែរ ឬអ្នកគាំទ្រឲ្យ ទទួលរងគ្រោះជំនួស ហើយខ្លួនគេចវេះនោះឡើយ ។
សូមជម្រាបថា ការលើកឡើងរបស់មេធាវីការពារក្តីឲ្យកឹម សុខានេះ បន្ទាប់ពីលោកសម រង្ស៊ីបានបង្កើនសកម្មភាពរិះគន់ដល់រដ្ឋាភិបាលកម្ពុជា និងបានកំពុងប្រមូលមនុស្សអោយបានច្រើនសម្រាប់ការវិលត្រឡប់មកវិញរបស់គាត់ ។ ប៉ុន្តែគេនៅមិនប្រាកដនៅឡើយថា តើលោក សម រង្ស៊ី ប្រាកដជានឹងវិលត្រឡប់មកវិញឬអត់ ៕
ចែករំលែកព័តមាននេះ