ខេត្តកំពង់ឆ្នាំង ៖ ផ្ទះក្បឿងចំនួន៣ខ្នង ដែលជាកម្មសិទ្ធិរបស់មន្ត្រីនគរបាលស្រុកកំពង់ត្រឡាចម្នាក់ ត្រូវបានអគ្គីភ័យឆេះខ្ទេចអស់ទាំងស្រុង ខណៈដែលម្ចាស់ផ្ទះទាំងពីរនាក់ប្តីប្រពន្ឋមិននៅផ្ទះ ។ ហេតុការណ៍នេះបានបង្កឱ្យមានការភ្ញាក់ផ្អើល កាលពីវេលាម៉ោង៣និង១០នាទីរសៀលថ្ងៃទី ៦…
ខេត្តកំពង់ឆ្នាំង ៖ ផ្ទះក្បឿងចំនួន៣ខ្នង ដែលជាកម្មសិទ្ធិរបស់មន្ត្រីនគរបាលស្រុកកំពង់ត្រឡាចម្នាក់ ត្រូវបានអគ្គីភ័យឆេះខ្ទេចអស់ទាំងស្រុង ខណៈដែលម្ចាស់ផ្ទះទាំងពីរនាក់ប្តីប្រពន្ឋមិននៅផ្ទះ ។ ហេតុការណ៍នេះបានបង្កឱ្យមានការភ្ញាក់ផ្អើល កាលពីវេលាម៉ោង៣និង១០នាទីរសៀលថ្ងៃទី ៦ ខែកុម្ភៈ ឆ្នាំ២០១៩ នៅក្នុងភូមិស្រែប្រីយ៍ ឃុំអូរឬស្សី ស្រុកកំពង់ត្រឡាច ។
លោក នន ស៊ីណាត អធិការនគរបាលស្រុកកំពង់ត្រឡាច បានអោយដឹងថា ផ្ទះដែលត្រូវអគ្គីភ័យឆាបឆេះនោះ ជាកម្មសិទ្ធិរបស់លោក លី សំអាត អាយុ៣៨ ឆ្នាំ ជាមន្ត្រីមានឋានន្តរស័ក្តិ អនុសេនីយ៍ទោ និងជានាយរងផ្នែកនគរបាលយុត្តិធម៌ នៃអធិការដ្ឋាននគរបាល ស្រុកកំពង់ត្រឡាច ។
ប្រភពដដែលបានបន្តថា មុនពេលកើតហេតុ មិនមានអ្នកណានៅផ្ទះនោះទេ ដោយលោក លី សំអាត ជាប្តី ត្រូវទៅប្រចាំការនៅភូមិលាច ចំណែកប្រពន្ធ របស់គាត់បានទៅធ្វើការនៅរោងចក្រស្បែកជើង ។ ដោយ
ឡែកកូនៗទាំង២នាក់បានទៅនៅជាមួយជីដូន។
ប្រភពដដែលបានបន្តទៀតថា លុះនៅវេលាម៉ោងប្រមាណជាង៣រសៀល ស្រាប់តែមានអណ្តាតភ្លើង
ឆាបឆេះផ្ទះរបស់មន្ត្រីនគរបាលខាងលើ យ៉ាងសន្ធោសន្ធៅ ពេលនោះ រថយន្តរបស់អធិការដ្ថាននគរបាលស្រុកកំពង់ត្រឡាចបានចេញអន្តរាគមន៍បាញ់ទឹកពន្លត់អស់ចំនួន៣គ្រឿង ។ ប៉ុន្តែដោយសារតែភ្លើងឆាប
ឆេះខ្លាំងពេកមិនអាចជួយសង្គ្រោះអ្វីបានឡើយ គ្រាន់តែទប់ទល់សភាពការណ៍មិនអោយរាលដាលដល់ផ្ទះអ្នកជិតខាងតែប៉ុណ្ណោះ ។
ចំពោះទំហំនៃការខូចខាតវិញរួមមាន ផ្ទះទំហំ៨ម៉ែត្រគុណនឹង៩ ម៉ែត្រ ដែលមានជញ្ជាំងក្តារ ក្រាលក្តារ ប្រក់ក្បឿងចំនួន៣ខ្នង ត្រូវបានឆេះខ្ទេចទាំងស្រុងតែម្ដង ជាមួយគ្នានោះផ្ទះបាយដែលមានទំហំ៤ម៉ែត្រគុណនឹង៦ម៉ែត្រក៏ត្រូវភ្លើងឆេះខ្ទេចអស់ដែរ ។ ចំពោះសម្ភារៈខូចខាតរួមមានស្រូវចំនួន២០បាវ អង្ករចំនួន១៥០គីឡូក្រាម ប្រាក់៥០ម៉ឺនរៀល ប្រាក់២ពាន់ដុល្លារ មាស៥ជី ទូរទស្សន៍១ កង្ហា១ ឯកសារគ្រួសារ និងសម្ភារៈជាច្រើនទៀត ។
ចំពោះមូលហេតុនៃអគ្គីភ័យឆាបឆេះផ្ទះខាងលើ លោកអធិការនគរបាលស្រុកកំពង់ត្រឡាចបានបញ្ជាក់ថាគឺបណ្ដាលមកពីទុស្សេរចរន្តអគ្គិសនី។ ជាចុងក្រោយក្នុងនាមលោកជាអធិការនគរបាលស្រុកកំពង់ត្រឡាច សូមអំពាវនាវដល់សប្បុរសជនជិតឆ្ងាយ សូមមេត្តាជួយដល់គ្រួសាររងគ្រោះខាងលើនេះផង ព្រោះពេលនេះ នៅសល់ខោអាវមួយចង្កេះម្នាក់តែប៉ុណ្ណោះ៕
ចែករំលែកព័តមាននេះ