រាជធានីភ្នំពេញ ៖ យុវជនម្នាក់ជិះម៉ូតូលឿនបំពានភ្លើងសញ្ញាចរាចរណ៍ទៅបុកម៉ូតូមួយគ្រឿងដែលបើកបរដោយបុរស2នាក់ធ្វើដំណើរឆ្លងផ្លូវពេញទំហឹង បណ្តាលឱ្យម៉ូតូដួលទាំងពីរគ្រឿងខ្ទាតទៅចិញ្ចើមផ្លូវធ្វើឱ្យបុរសម្នាក់ដែលអង្គុយពីក្រោយរងរបួសបាក់ជើងស្តាំម្នាក់ និងម្នាក់ទៀតរងរបួសស្រាល ចំណែកជនបង្កមិនមានរងរបួសឡើយ ។ ហេតុការណ៍នេះកើតឡើងកាលពីម៉ោង9និង20នាទីយប់ ថ្ងៃទី6 ខែកុម្ភៈ ឆ្នាំ២០១៩ នៅចំណុចស្តុបចំការមន តាមមហាវិថីព្រះនរោត្តម កែងនឹងមហាវិថីម៉ៅសេទុង ស្ថិតក្នុងសង្កាត់ទន្លេបាសាក់ ខណ្ឌចំការមន។
ម៉ូតូបង្កខាងលើម៉ាកហុងដាឌ្រីម ស៊េរីឆ្នាំ2016 ពណ៌ខ្មៅ ពាក់ស្លាកលេខភ្នំពេញ 1FU:1760 បើកបរដោយយុវជនម្នាក់ជាម៉ូតូរបស់ក្រុមសមាគម (រួមគ្នាដើម្បីអភិវឌ្ឍន៍កម្ពុជា) ចំណែកម៉ូតូរងគ្រោះម៉ាកហុងដា Beat ពណ៌ក្រហមលាយស អត់មានស្លាកលេខ ទើបតែនឹងទិញមិនទាន់បានធ្វើស្លាកលេខ រងការខូចខាតតិចតួចមួយចំហៀងខាងស្ដាំ បណ្តាលឱ្យបុរសម្នាក់ដែលអង្គុយពីក្រោយរងរបួសបាក់.កជើងខាងស្តាំ ចំណែកអ្នកបើកបររងរបួសស្រាល។
ប្រភពពីកន្លែងកើតហេតុប្រាប់ឱ្យដឹងថា មុនកើតហេតុគឺគេឃើញម៉ូតូរងគ្រោះខាងលើធ្វើដំណើរតាមបណ្ដោយផ្លូវព្រះនរោត្តមពីត្បូងទៅជើង លុះដល់ចំនុចស្តុបចំការមនក៏ឈប់ចាំស្តុបភ្លើងមួយសន្ទុះ លុះដល់ភ្លើងខៀវអាទិភាពបត់ស្តាំ គាត់ក៏ធ្វើដំណើរឆ្លងបត់ស្តាំឆ្ពោះទៅមហាវិថីម៉ៅសេទុង ខណៈនោះស្រាប់តែម៉ូតូបង្កធ្វើដំណើរយ៉ាងលឿនតាមបណ្ដោយមហាវិថីព្រះនរោត្តមពីជើងទៅត្បូងតែម្នាក់ឯងទាំងដែលគេឈប់គ្រប់គ្នាហើយនោះ ក៏មកបុកចំពាក់កណ្តាលម៉ូតូរបស់ជនរងគ្រោះពេញទំហឹង បណ្តាលដួលទាំងពីរខ្ទាតជាង5ម៉ែត្រទៅកៀនចិញ្ចើមផ្លូវ ធ្វើឱ្យបុរសម្នាក់អង្គុយពីក្រោយម៉ូតូរងគ្រោះរងរបួសបាក់.កជើងខាងស្តាំដេកដួលលើផ្លូវ ចំណែកអ្នកបើកបររងរបួសស្រាល រីឯខាងម៉ូតូបង្កមិនមានរងរបួសទេ គឺខូចខាតតែម៉ូតូតិចតួចប៉ុណ្ណោះ។
ភ្លាមៗនោះជនរងគ្រោះត្រូវបានសាច់ញាតិហៅរថយន្តសង្គ្រោះមកដឹកទៅព្យាបាលរបួសភ្លាមៗ ទុកតែម្ចាស់ម៉ូតូរងគ្រោះដែលរបួសស្រាលនៅដោះស្រាយ ដោយគាត់ទាមទារឱ្យខាងម៉ូតូបង្កជួយចេញថ្លៃព្យាបាលរបួសជនរងគ្រោះ ចំណែកម៉ូតូជួសជុលរៀងខ្លួន។ តែខាងម៉ូតូបង្កមិនព្រមសង ដោយបានទូរស័ព្ទហៅបក្សពួកដែលនៅក្រុមសមាគមជាមួយគ្នាទាំងហ្វូងមកដោះស្រាយជំនួស ដោយអាងគ្នាច្រើនទៅគំរាមខាងម៉ូតូរងគ្រោះដែលគ្នានៅតែម្នាក់ឯងឱ្យគេសងវិញ ដោយចោទប្រកាន់គេថា ជិះខុសគោលដៅចរាចរណ៍ ទាំងម៉ូតូរបស់ក្រុមសមាគមខ្លួនជិះបំពានភ្លើងសញ្ញាចរាចរណ៍ ហើយបុកគេខ្ទាតទៅចិញ្ចើមផ្លូវទាំងពីរគ្រឿង តែលើកម៉ូតូចេញពីកន្លែងកើតហេតុ ដោយយកលេសថាខ្លួនជាអ្នកត្រូវទៀត។
បន្ទាប់ពីកើតហេតុភ្លាមៗសមត្ថកិច្ចមូលដ្ឋានបានចុះមកដល់កន្លែងកើតហេតុ បានឱ្យភាគីទាំងពីរដោះស្រាយគ្នា ដោយខាងម៉ូតូរងគ្រោះទាមទារឱ្យខាងម៉ូតូបង្កចេញថ្លៃព្យាបាលរបួសជនរងគ្រោះ ចំណែកម៉ូតូគាត់ជួសជុលខ្លួនឯង តែខាងម៉ូតូបង្កមិនព្រមដោយអាងខ្លួនមានគ្នាច្រើននៅតែស្រែកថា ខ្លួនជាអ្នកត្រូវទាំងខ្លួនមិនក្នុងហេតុការណ៍នោះទេ បើទោះបីជាមានអ្នកឃើញហេតុការណ៍បានប្រាប់ថា ម៉ូតូបង្កជាអ្នកបុកគេក៏ពួកគាត់នៅតែប្រកែកយកត្រូវ ដោយចោទគេជិះខុសផ្លូវចរាចរណ៍ទាំងដែលខ្លួនជាអ្នកបុកគេ ហើយខ្ទាតទៅចិញ្ចើមផ្លូវសោះ ធ្វើឱ្យប្រជាពលរដ្ឋដែលឆ្លងកាត់ទីនោះហួសចិត្តគ្រប់គ្នា។
ចុងក្រោយភាគីទាំងពីរចរចាមិនត្រូវគ្នា ខាងកម្លាំងសមត្ថកិច្ចជំនាញចរាចរណ៍ក៏ធ្វើការវាស់វែងតាមជំនាញយកម៉ូតូទាំងពីរទៅដោះស្រាយនៅអធិការដ្ឋានខណ្ឌចំការមន នៅពេលក្រោយ ៕
ចែករំលែកព័តមាននេះ