ខេត្តសៀមរាប ៖ មន្ត្រីជំនាញបង្ហាញថា គិតមកដល់ដើមខែកុម្ភៈ ឆ្នាំ២០១៩នេះ ការកាត់ខ្សែកាបនៅលើ អាកាស តាមបង្គោលខ្សែភ្លើងក្នុងក្រុងសៀមរាប បង្កឲ្យមានភាពរញ៉េរញ៉ៃ បានកាត់ទម្លាក់…
ខេត្តសៀមរាប ៖ មន្ត្រីជំនាញបង្ហាញថា គិតមកដល់ដើមខែកុម្ភៈ ឆ្នាំ២០១៩នេះ ការកាត់ខ្សែកាបនៅលើ អាកាស តាមបង្គោលខ្សែភ្លើងក្នុងក្រុងសៀមរាប បង្កឲ្យមានភាពរញ៉េរញ៉ៃ បានកាត់ទម្លាក់ មកបង្កប់ ក្រោមដីវិញ បានចំនួន៦ផ្លូវហើយក្នុងចំណោមផ្លូវទាំង១១ នៃគម្រោងទី១។ លោក សុខ សីហា ប្រធានមន្ទីរ ប្រៃសណីយ៍ និងទូរគមនាគមន៍ ខេត្តសៀមរាប បានឱ្យដឹងថា គិតចាប់ពីខែសីហា ឆ្នាំ២០១៨ មកដល់ដើមខែកុម្ភៈ ឆ្នាំ២០១៩នេះ ក្រោមការដឹកនាំរបស់រដ្ឋបាលខេត្តសៀមរាប មន្ទីរប្រៃសណីយ៍ និងទូរគមនាគមន៍ ចុះអនុវត្តន៍គម្រោងកាត់ខ្សែកាបអាកាសនៅតាមបង្គោលខ្សែភ្លើងក្នុងក្រុងសៀមរាប។
មកបង្កប់ក្រោមដីបានចំនួន៦ផ្លូវហើយ ដែលមានប្រវែងសរុបជាង២៤គីឡូម៉ែត្រ ក្នុងចំណោមផ្លូវទាំង១១ នៃគម្រោងទី១នេះ ក្នុងនោះមានផ្លូវលោកតាណឺយ, តំបន់ជុំវិញផាប់ស្ទ្រីត, កំណាត់ផ្លូវហ្សាដឺហ្គោល ចាប់ពីចំណុចសួនច្បារព្រះរាជដំណាក់ រហូតដល់បុរីប្រិមប្រិយ, កំណាត់ផ្លូវ៦០ម៉ែត្រ រហូតដល់កែង ផ្លូវហ្សាដឺហ្គោល, កំណាត់ផ្លូវកូម៉ៃ ចាប់ពីចំណុចផ្លូវបំបែកអ៩០ រហូតដល់វត្តថ្មី និងកំណាត់ផ្លូវ៧មករា ចាប់ពីផ្លូវក្រវាត់ក្រុង រហូតដល់រង្វង់មូលព្រះរាជដំណាក់។
លោក សុខ សីហា បានឱ្យដឹងទៀតថា ចំពោះផ្លូវចំនួន៥ខ្សែទៀត ដែលគម្រោងនឹងចុះអនវុត្តន៍បន្ទាប់រួមមាន ផ្លូវជាតិលេខ៦ ចាប់ពីព្រំប្រទល់ រដ្ឋបាលក្រុង ស្រុកពួក និងស្រុកប្រាសាទបាគង, ផ្លូវស៊ីវុត្ថា ចាប់ពីចំណុចផ្លូវអ៩០ រហូតដល់រង្វង់មូល នាគបាញ់ទឹក, ផ្លូវផ្សារញ៉ែ ចាប់ពីចំណុចភោជនីយ៍ម្លប់ស្បូវ រហូតដល់ស្ដុបផ្សារញ៉ែ និងស្ដុបផ្សារកណ្ដាល, ផ្លូវអមសងខាងស្ទឹងសៀមរាប ចាប់ពីចំណុចស្ពាននាគ រហូតដល់ស្ពានក្រវាត់ក្រុង, និងផ្លូវទៅផ្សារក្រោម ចាប់ពីចំណុចរង្វង់មូលនាគបាញ់ទឹក រហូតដល់ផ្លូវក្រវាត់ក្រុង។
ដែលគម្រោងនេះនឹងចាប់ផ្តើមអនុវត្តន៍ ជាបន្តបន្ទាប់ចាប់ពីពាក់កណ្ដាលខែកុម្ភៈ រហូតដល់ពាក់កណ្ដាលខែមិថុនា ឆ្នាំ២០១៩ ដូច្នេះសូមសំណូមពរដល់ពលរដ្ឋដែលរស់នៅតាមបណ្ដោយផ្លូវក្នុងគម្រោងនេះ សុំមានការយោគយល់ ព្រោះការផ្លាស់ប្ដូរនេះ អាចនឹងមានការដាច់ចរន្តអគ្គិសនីមួយរយៈពេលខ្លី។ លោក សុខ សីហា បានឱ្យដឹងបន្ថែមទៀតថា ការងារចុះកាត់ខ្សែកាបអាកាសលើបង្គោលភ្លើងក្នុងក្រុងសៀមរាបនេះ ធ្វើឡើងក្នុងបំណងដើម្បីលើកកម្ពស់សោភ័ណភាព សន្ដិសុខ និងសុវត្ថិភាពដល់ពលរដ្ឋ ពិសេសអ្នករស់នៅជាប់បង្គោលភ្លើងទាំងនោះ ដែលអាចកើតហានិភ័យជាយថាហេតុ បង្កឡើងដោយការឆ្លងចរន្តអគ្គិសនីជាដើម៕ ដោយ ៖ ច័ន្ទ រស្មី
ចែករំលែកព័តមាននេះ