ខេត្តកំពង់ឆ្នាំង ៖ បន្ទាប់ពីសារព័ត៌មាន កោះសន្តិភាព បានផ្សាយអំពីប្រជាពលរដ្ឋខ្វះខាតទឹកដាក់ស្រែ ប្រាំង នៅភូមិកោះតាម៉ូវ ឃុំកំពង់ព្រះគគីរ ស្រុកបរិបូណ៌ ដោយបានអំពាវនាវសុំសប្បុរសជន និងមន្ទីរ ពាក់ព័ន្ធជួយអន្តរាគមន៍ជាប្រេងដើម្បីបូមទឹកសង្គ្រោះស្រូវឲ្យទាន់ពេលវេលារួចមក នៅរសៀលថ្ងៃទី៦ ខែកុម្ភៈ ឆ្នាំ២០១៩នេះ ឯកឧត្តម ប៉ុញ សច្ចៈ រដ្ឋលេខាធិការ ក្រសួងធនធានទឹក និងឧតុនិយម អមដំណើរដោយលោក ដោក ប៊ុនថុន ប្រធានមន្ទីរធនធានទឹក និងអាជ្ញាធរមូលដ្ឋានផងនោះ បានចុះទៅពិនិត្យទីតាំងស្រូវប្រាំងដែលកំពុងតែសង្គ្រោះនៅចំណុច ឃុំខុនរ៉ង ឃុំកំពង់ព្រះគគីរ ស្រុកបរិបូណ៌ និងឃុំអំពិលទឹក ស្រុកកំពង់ត្រឡាច។
នៅក្នុងឱកាសនោះ ឯកឧត្តម ប៉ុញ សច្ចៈ រដ្ឋលេខាធិការ ក្រសួងធនធានទឹក និងឧតុនិយម បានមានប្រសាសន៍ថា៖ ដោយយោងតាមសេចក្តី អំពាវនាវរបស់អាជ្ញាធរមូលដ្ឋាន ថ្ងៃនេះជំនួសមុខឲ្យឯកឧត្តមរដ្ឋមន្ត្រីក្រសួងធនធានទឹក និងឧតុនិយម សូមសន្យានឹងផ្ដល់ប្រេង និងម៉ាស៊ីនបូមទឹក ដើម្បីជួយសង្គ្រោះស្រូវរបស់ប្រជាពលរដ្ឋ នៅក្នុងស្រុក បរិបូណ៌នេះឲ្យទាន់ពេលវេលា និងបន្តជួយរហូតដល់ប្រមូលផលរួចរាល់។ ឯកឧត្ដមបានបញ្ជាក់ថា៖ បើសិនមានការខ្វះខាតសូមទំនាក់ទំនងទៅខាងមន្ទីរធនធានទឹក ដើម្បីបន្ថែមម៉ាស៊ីន ប្រេង ដើម្បីបូមទឹកសង្គ្រោះស្រូវឲ្យទាន់ពេលវេលា ដោយមិនត្រូវទុកឱ្យស្រូវរបស់ប្រជាពលរដ្ឋងាប់ឡើយ។ ប៉ុន្តែត្រូវមានប្រភពទឹកច្បាស់លាស់ដែរ ទើបអាចជួយបាន។
ឯកឧត្តមបានបញ្ជាក់ថា៖ ទឹកទន្លេឆ្នាំនេះ បានឡើងខ្ពស់ ប៉ុន្តែនៅពេលស្រកទៅវិញគឺលឿនហួសកម្រិត និងទាបជាងឆ្នាំចាស់ ជាងមួយម៉ែត្រ ឯណោះ ទើបធ្វើឱ្យទឹកជួបបញ្ហា។ ជាមួយគ្នានេះលោក ដោក ប៊ុនថុន ប្រធានមន្ទីរធនធានទឹក និងឧតុនិយម ខេត្តកំពង់ឆ្នាំង បានឲ្យដឹងថា៖ តាមផែនការ ក្នុងខេត្តកំពង់ឆ្នាំងស្រូវប្រាំង មានចំនួន ២៩,៥០០ ហិកតា ប៉ុន្តែប្រជាពលរដ្ឋបានធ្វើលើសផែនការរហូតទៅដល់ជាង ៣៤,០០០ហិកតា ឯណោះ ម្ល៉ោះហើយកង្វះខាតទឹកគឺចៀសមិនផុតឡើយ។ ម្យ៉ាងវិញទៀតដោយសារតែបងប្អូនប្រជាពលរដ្ឋបាន កាប់រានដីថ្មីធ្វើឲ្យផ្ទៃដីចេះតែរីកធំ ប៉ុន្តែការកាប់រានដីថ្មីនេះគឺគ្មានប្រភពទឹកច្បាស់លាស់។
យ៉ាងនេះក្តីលោកបានបញ្ជាក់ថា៖ មន្ទីរធនធានទឹក និងឧតុនិយម ឧត្ថមប្រេងដល់សហគមន៍បូមទឹក និងម៉ាស៊ីនបូមទឹកសម្រាប់បូមដាក់ប្រឡាយមេ ដើម្បីជួយស្រូវរបស់ប្រជាពលរដ្ឋ។ ជាងនេះទៅទៀត លោកសូមអំពាវនាវដល់ប្រជាពលរដ្ឋ ប្រសិនបើជួបបញ្ហាខ្វះខាតទឹកសូមទាក់ទងទៅអាជ្ញាធរភូមិឃុំ ដើម្បីទាក់ទងមកមន្ទីរធនធានទឹក ដើម្បីជួយឲ្យទាន់ពេលវេលា។ នៅក្នុងឱកាសនោះផងដែរលោក ឃួន សៅរុំ អភិបាលស្រុកបរិបូណ៌ និងលោក ចាន់ អាន មេឃុំខុនរ៉ង បានថ្លែងអំណរគុណដល់ ឯកឧត្តមរដ្ឋ មន្ត្រីក្រសួងធនធានទឹក ដែលបានឧបត្ថម្ភជាប្រេង និងម៉ាស៊ីនជួយសង្គ្រោះស្រូវរបស់ប្រជាពលរដ្ឋ ទូទាំងស្រុកបរិបូណ៌។ សូមបញ្ជាក់ដែរថា ស្រូវដែលកំពុងតែសង្គ្រោះនៅក្នុងឃុំមេលំ មានចំនួន១០៧ ហិកតា ឃុំខុនរ៉ង មានចំនួន ២១០ហិកតា និងឃុំអំពិលទឹក ស្រុកកំពង់ត្រឡាចមានចំនួន ២៨៨ហិកតា៕ ដោយ ៖ ពៅ សុខហ៊ាន
ចែករំលែកព័តមាននេះ