ខេត្តប៉ៃលិន ៖ ស្ត្រីម្នាក់រងរបួសថ្ពាល់ឆ្វេងត្រូវបានសាច់ញាតិដឹកទៅសង្គ្រោះនៅមន្ទីរពេទ្យបង្អែកខេត្ត ខណៈនាំគ្នាផឹកស៊ីជួបជុំមិត្តភក្តិ នៅថ្ងៃបុណ្យចូលឆ្នាំចិន ស្រាប់តែស្រវឹងធ្លាក់ភ្នែក និយាយគ្នាលេងចុះឡើងៗបង្កទៅជាទំនាស់ពាក្យសម្តី ស្រាប់តែបុរសម្នាក់បានវាយទៅលើស្ត្រីម្នាក់រងរបួសចំថ្ពាល់ឆ្វេងសន្លប់នៅនឹងកន្លែងតែម្តង ។
ហេតុការណ៍ផឹកស៊ីទាស់ពាក្យសម្តីរហូតឈានដល់ប្រើអំពើហិង្សានេះបានកើតឡើង កាលពីវេលាម៉ោង៥និង៣០នាទីល្ងាចថ្ងៃទី០៥ ខែកុម្ភៈ ឆ្នាំ២០១៩ ស្ថិតនៅផ្ទះមួយកន្លែង ក្នុងភូមិអូរច្រាលិច សង្កាត់បរយ៉ាខា ក្រុងប៉ៃលិន ខេត្តប៉ៃលិន ។ ប្រភពព័ត៌មានពីលោក យ៉ែម សារិទ្ធ អធិការនគរបាលក្រុងប៉ៃលិនបានឱ្យដឹងថា ជនបង្កហេតុមានឈ្មោះ ថេង ភេទប្រុស អាយុជាង៤០ឆ្នាំ មានទីលំនៅបច្ចុប្បន្ន ស្ថិតនៅភូមិរថក្រោះឆេះ ឃុំស្ទឹងកាច់ ស្រុកសាលាក្រៅ ខេត្តប៉ៃលិនបានរត់គេចខ្លួនបាត់ស្រមោល ។
ប្រភពបន្តទៀតថា ចំណែកជនរងគ្រោះមានឈ្មោះ កុល សារឿត ភេទស្រី អាយុ៣៤ឆ្នាំ រងរបួសថ្ពាល់ឆ្វេងសន្លប់នៅនឹងកន្លែង បច្ចុប្បន្នរស់នៅភូមិឃុំកើតហេតុខាងលើ ។ ប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញជនរងគ្រោះ និងជនបង្កហេតុរួមជាមួយមិត្តភក្តិជាច្រើននាក់បានទិញស្រាបៀរយកទៅផឹកស៊ីនៅកន្លែងកើតហេតុតាំងពីព្រឹករហូតដល់ពេលល្ងាចក៏ស្រាប់តែម្នាក់ៗស្រវឹងធ្លាក់ភ្នែក ហើយក៏និយាយជជែកគ្នាលេងចុះឡើងៗក៏បង្កទៅជាឈ្លោះទាស់ទែងពាក្យសម្តី ហើយស្ត្រីរងគ្រោះក៏បាននិយាយប៉ះពាល់ចំជនដៃដល់ក៏វាយប្រាវ បណ្តាលឱ្យរងរបួសតែម្តង ។
ក្រោយពេលបង្កហេតុជនដៃដល់បានស្ទុះរត់គេចខ្លួនបាត់ស្រមោល ចំណែកឯស្ត្រីរងគ្រោះបានដួលសន្លប់នៅកន្លែងកើតហេតុបានអ្នកជិតខាងឃើញទាន់ក៏ចូលទៅជួយរឹត និងដឹកយកទៅសង្គ្រោះនៅមន្ទីរពេទ្យបង្អែកខេត្តទាន់ពេលវេលា ។ ពាក់ព័ន្ធនឹងបញ្ហានេះកម្លាំងប៉ុស្តិ៍នគរបាលរដ្ឋបាលសង្កាត់បរយ៉ាខា កំពុងធ្វើការស្រាវជ្រាវរកមុខសញ្ញា ដើម្បីចាត់យកមកចាត់ការតាមនីតិវិធី ៕
ចែករំលែកព័តមាននេះ