ខេត្តប៉ៃលិន ៖ រហូតមកដល់ព្រឹកថ្ងៃទី៥ ខែកុម្ភ: ឆ្នាំ២០១៩នេះ គំនរសំរាមនៅក្នុងផ្សារសាមគ្គី ហៅប៉ាហ៊ី បានហៀរចេញរហូតដល់លើផ្លូវសាធារណ:ជះក្លិនស្អុយដល់ប្រជាពលរដ្ឋដែលធ្វើដំណើរចេញចូលទៅមក ។
ចំណែកអាជីវករដែលលក់ដូរនៅក្បែរគំនរសំរាមនេះបានបង្ខំចិត្តបិទតូប ដោយរង់ចាំឱ្យខាងអនាម័យចូលទៅប្រមូលអស់ ទើបនាំគ្នាបើកតូបលក់ដូរសារជាថ្មីឡើងវិញ ។
ប្រជាពលរដ្ឋដែលធ្វើដំណើរតាមផ្លូវជុំវិញផ្សារសាមគ្គីហៅប៉ាហ៊ី បានឱ្យដឹងថា គាត់បានសង្កេតឃើញគំនរសំរាមខាងលើនេះត្រូវបានអាជីវករយកទៅបោះចោលនៅខាងក្រៅកន្លែងស្តុកសំរាមអស់រយ:ពេល២ទៅ៣ថ្ងៃមកហើយ ដែលជាហេតុបង្កទៅជាជះក្លិនស្អុយ លំបាកក្នុងការធ្វើដំណើរចេញចូលទៅមក ។
ប្រភពបន្តទៀតថា មានក្រុមហ៊ុនដឹកសំរាមមួយដែលតែងតែដើរប្រមូលជារៀងរាល់ថ្ងៃ ប៉ុន្តែនៅមុនថ្ងៃចូលឆ្នាំចិនវៀតណាម១ថ្ងៃ គេមិនទាន់ឃើញខាងអនាម័យចូលទៅប្រមូលសំរាមទាំងនោះនៅឡើយទេ បើសិនជាបន្តទុកបែបនេះទៀត អ្នកលក់ដូរនៅក្បែរៗកន្លែងដាក់សំរាមនឹងបង្ខំចិត្តបិទតូបជាក់ជាមិនខាន ព្រោះជះក្លិនស្អុយពិបាកក្នុងការដកដង្ហើមយ៉ាងខ្លាំង ។
ពាក់ព័ន្ធនឹងបញ្ហាគំនរសំរាមខាងលើនេះ លោក សែប សារ៉ាន់ ហៅចិន ជាមេការប្រមូលសំរាមក្នុងផ្សារបានឱ្យដឹងតាមទូរស័ព្ទថា ខាងលោកតែងតែដើរប្រមូលជារៀងរាល់ថ្ងៃ មិនធ្លាប់ខានម្តងណាឡើយ ។ ប៉ុន្តែក្នុងឱកាសបុណ្យចូលឆ្នាំចិននេះ ខាងលោកបានរាយការណ៍ទៅម្ចាស់ផ្សារ និងនគរបាលនៃអធិការក្រុងប៉ៃលិនដែរថា ខាងលោកមានការយឺតយ៉ាវបន្តិច ព្រោះកម្មករមានការជាប់រវល់ ហើយម្យ៉ាងវិញទៀតខាងអ្នកម៉ៅការភាស៊ីផ្សារ ក៏មានការយឺតយ៉ាវក្នុងការបង់ថ្លៃលុយដឹកសម្រាមផងដែរ ។
ដូច្នេះ នៅល្ងាចថ្ងៃនេះ ខាងលោកនឹងឱ្យកម្មករបើករថយន្តបន្តដឹកសំរាមយកទៅចាក់ចោលនៅទីលានចាក់សំរាម មិនទុកឱ្យជះក្លិនស្អុយបែបនេះទៀតទេ ៕
ចែករំលែកព័តមាននេះ