រាជធានីភ្នំពេញ ៖ បុរស២នាក់ជិះម៉ូតូមួយគ្រឿងបើកបរក្នុងល្បឿនលឿន បានជ្រុលទៅបុកខឿនសួនច្បារពុះចែកទ្រូងផ្លូវ បណ្តាលអោយអ្នកបើកម៉ូតូដួលបោកក្បាលហូរឈាមស្លាប់នៅកន្លែងកើតហេតុ ចំណែកអ្នករួមដំណើរបានរងរបួសធ្ងន់ ។ ហេតុការណ៍នេះដែរបានកើតឡើងកាលពីវេលាម៉ោង១១និង៤០នាទីយប់ ថ្ងៃទី៥ ខែកុម្ភៈ ឆ្នាំ២០១៩ ទុលមុខបញ្ជាការដ្ឋានកងរាជអាវុធហត្ថក្រុងភ្នំពេញ ផ្លូវវ៉េងស្រេង ស្ថិតក្នុងភូមិទ្រា សង្កាត់ស្ទឹងមានជ័យ១ ខណ្ឌមានជ័យ ។
ជនរងគ្រោះ ដែលស្លាប់ឈ្មោះ អុិន ឃាន់ ភេទប្រុស អាយុ២៣ឆ្នាំ មុខរបរបុគ្គលិគខារ៉ាអូខេ ស្នាក់នៅកន្លែងធ្វើការ ផ្លូវវ៉េងស្រេង ភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើត ភូមិចំបក់ជ្រុំ ឃុំប្រាសាទ ស្រុកសន្ទុក ខេត្តកំពង់ធំ ជាអ្នកបើកបរម៉ូតូមួយគ្រឿងម៉ាកហ្សូ៊មមើ អិច ស៊េរីឆ្នាំ២០១៧ ពណ៌ខ្មៅសលាយទឹកក្រូច ពាក់ស្លាកលេខ កណ្តាល ១W-២៣៤២ ។ ចំណែកអ្នករួមដំណើរម្នាក់ទៀតមិនស្គាល់អត្តសញ្ញាណ ។
តាមប្រភពពីអ្នកឃើញហេតុការណ៍បានអោយដឹងថា មុនពេលកើតហេតុ គេបានឃើញបុរស២នាក់ជិះម៉ូតូមួយគ្រឿង មិនដឹងថាគោលបំណងទៅណានោះទេ បានធ្វើដំណើរតាមផ្លូវវ៉េងស្រេង ក្នុងទិសដៅពីកើតទៅលិច ក្នុងល្បឿនលឿន លុះមកដល់ចំណុចកើតហេតុ ដែលជាផ្លូវកោង ស្រាប់តែអ្នកបើកម៉ូតូកាច់ចង្កូតមិនទាន់ ជ្រុលទៅបុកខឿនសួនច្បារពុះចែកទ្រូងផ្លូវធ្វើឱ្យដួលម៉ូតូអូសជិត១០០ម៉ែត្រ បណ្តាលឱ្យអ្នកបើកបរម៉ូតូបោកក្បាលនឹងផ្លូវ ផុងលលាដ៍ក្បាលហូរឈាមស្លាប់នៅនៅកន្លែងកើតហេតុ ចំណែកអ្នករួមដំណើរម្នាក់ទៀតបានរងរបួសធ្ងន់ ។
ក្រោយពេលកើតហេតុ គេឃើញសមត្ថកិច្ចមូលដ្ឋាននិងជំនាញចរាចរណ៍ខណ្ឌមានជ័យបានចុះទៅកន្លែងកើតហេតុ ព្រមទាំងទំនាក់ទំនងហៅសាច់ញាតិ និងប្រពន្ធ អោយមកទទួលយកសពជនរងគ្រោះទៅធ្វើបុណ្យនៅស្រុកកំណើត ខេត្តកំពង់ធំ ចំណែកម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌមានជ័យ រង់ចាំសាច់ញាតិមកទទួលយកទៅប្រើប្រាស់វិញ ៕
ចែករំលែកព័តមាននេះ