រាជធានីភ្នំពេញ ៖ អគ្គិភ័យបានឆាបឆេះឃ្លាំងក្នុងរោងចក្រផលិតស្បែកជើង និងគ្រឿងបន្សំស្បែកជើងដែលគរទុកនៅក្នុងនោះ បានបង្កការភ្ញាក់ផ្អើលដល់សមត្ថកិច្ចហៅរថយន្តពន្លត់អគ្គីភ័យមកធ្វើការបាញ់ពន្លត់ដែរ តែត្រូវតំណាងរោងចក្រមិនអោយរថយន្តពន្លត់អគ្គីភ័យចូលកន្លែងកើតហេតុឡើយ ដែលហេតុ
ការណ៍នេះបានបង្កអោយមានការភ្ញាក់ផ្អើលដល់អ្នកសារព័ត៌មាន និងប្រជាពលរដ្ឋកាលពីវេលាម៉ោង៣និង៣០នាទីទៀបភ្លឺថ្ងៃទី៦ ខែកុម្ភៈ ឆ្នាំ២០១៩ នៅជិតផ្សារទួលពង្រ ស្ថិតនៅភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ ។
តាមប្រភពព័ត៌មានពីសមត្ថកិច្ចបានអោយដឹងថា អគ្គិភ័យបានឆាបឆេះឃ្លាំងស្តុកស្បែកជើង និងកំទេចកាតុងក្នុងរោងចក្រដែលជាប់របងផ្ទះជួល ប្រជាពលរដ្ឋ ធ្វើឲ្យមានការផ្អើលឆោឡោ និងភ័យខ្លាច តែផ្ទុយទៅវិញ ពេលហេតុការណ៍កើតឡើងភ្លាមៗនោះដែរ សមត្ថកិច្ចនគរបាលប៉ុស្តិ៍បានទាក់ទងហៅរថយន្តពន្លត់អគ្គិភ័យមកដល់កន្លែងកើតហេតុដែរ តែតំណាងរោងចក្រខាងលើមិនឲ្យរថយន្តពន្លត់អគ្គិភ័យចូលទៅធ្វើការបាញ់ទឹកពន្លត់ឡើយ។
បន្ទាប់មកលោកអធិការរងខណ្ឌពោធិ៍សែនជ័យបានទាក់ទងទៅលោកអភិបាលខណ្ឌ និងលោកអធិការដើម្បីសុំគោលការណ៍ចាត់វិធានការក្តៅៗ និងបញ្ជាកំលាំងនគរបាលប៉ុស្តិ៍ដើម្បីវាយសោទ្វាររោងចក្រអោយរថយន្តចូលពន្លត់ភ្លាមៗផងដែរ។
សមត្ថកិច្ចផ្នែកពន្លត់អគ្គីភ័យបានឱ្យដឹងថា រថយន្តពន្លត់អគ្គីភ័យរបស់សាលារាជធានីភ្នំពេញបានមកធ្វើការបាញ់ទឹកពន្លត់ចំនួន៩គ្រឿងដែរ តែប្រើប្រាស់ទឹកអស់ចំនួន៨គ្រឿង ។
ដោយឡែកខាងជំនាញផ្នែកពន្លត់អគ្គិភ័យបានបញ្ជាក់ថា ក្នុងព្រឹកថ្ងៃដដែល នឹងហៅតំណាងរោងចក្រខាងលើ ដើម្បីយកទៅធ្វើការណែនាំផងដែរ។
ចំពោះមូលហេតុបណ្តាលឱ្យកើតមានអគ្គិភ័យឆាបឆេះឃ្លាំងស្តុកស្បែកជើង និងកម្ទេចកាតុងខាងលើ សមត្ថកិច្ចរកមិនទាន់ឃើញមូលហេតុពិតប្រាកដនៅឡើយទេ គ្រាន់តែដឹងថានៅក្នុងឃ្លាំងដែលស្តុកស្បែកជើង និងកំទេចកាតុងនោះមិនមានខ្សែភ្លើងនោះឡើយ៕
ចែករំលែកព័តមាននេះ