ខេត្តបន្ទាយមានជ័យ ៖ ប្រភពពីពលរដ្ឋនៅភូមិប៉ោយប៉ែត សង្កាត់ប៉ោយប៉ែត បានលើកឡើងថា ស្ថានីយរថភ្លើងនៅបន្ទាត់ព្រំដែនក្រុងប៉ោយប៉ែត ពេលនេះបានក្លាយជាទីតាំងជនអនាថាជក់ថ្នាំញៀនយ៉ាងគគ្រឹក គគ្រេងនៅពេលយប់ ។ មិនតែប៉ុណ្ណោះ នៅមុខស្ថានីយរថភ្លើងនេះក៏ក្លាយជាចំណតរថយន្តដឹកទំនិញ និងអ្នកដំណើរផងដែរ ។
ប្រភពព័ត៌មានបន្តថា នៅវេលាយប់ចាប់ពីម៉ោង១២អធ្រាត្រទៅ ចំណុចបន្ទប់ទឹកនៃស្ថានីយរថភ្លើងខាងលើក៏ដូចជាលើផ្លូវរថភ្លើង មានជនអនាថាឈរហូរហែជក់ថ្នាំញៀន ។ ដោយឡែក របងសំណាញ់ដែកខណ្ឌចែកផ្លូវរថភ្លើង និងពលរដ្ឋដែលកំណត់មិនឲ្យឆ្លងកាត់(ខាងត្បូងផ្លូវរថភ្លើង) ក៏ត្រូវក្រុមអ្នកញៀនថ្នាំកាត់សំណាញ់ដែកជាប្រឡោះៗ ដើម្បីដើរឆ្លងកាត់ចូលទៅមិនតិចជាង១០កន្លែងទេ ។
ជុំវិញករណីនេះ ស្ត្រីម្នាក់ឈ្មោះ ឈឿម ស្រីអ៊ុក ជាអ្នកនៅមើលថែទីតាំងស្ថានីយខាងលើបានប្រាប់កោះ សន្តិភាពថា ការរិះគន់ពីពលរដ្ឋរឿងជនអនាថាជក់ថ្នាំញៀននៅស្ថានីយរថភ្លើងនាពេលយប់ គឺពិតជាមានមែន ។ ករណីនេះ គាត់ធ្លាប់បានប្រាប់ទៅសមត្ថកិច្ចដែរតែមិនអាចធ្វើបាន ព្រោះជាតំបន់អនា ធិបតេយ្យហើយគាត់មានតួនាទីត្រឹមតែជាអ្នកលក់សំបុត្ររថភ្លើងប៉ុណ្ណោះ យប់ឡើងចាក់សោការពារសម្បត្តិរដ្ឋក្នុងស្ថានីយជាការស្រេច ។
ចំពោះករណីនៅមុខស្ថានីយក្លាយជាចំណតរថយន្តនោះ ដោយសារមួយរយៈនេះទីតាំងទំនេរ ហើយតាមព័ត៌មានពីថ្នាក់លើថាទាល់តែក្រោយពិធីបុណ្យចូលឆ្នាំថ្មីប្រពៃណីជាតិខាងមុខ ទើបរថភ្លើងដំណើរការវិញ ។ ម្យ៉ាងទៀត ត្រូវការសេវាខ្លះឲ្យខាងបោសសម្អាតប្រើប្រាស់ទើបអនុញ្ញាតឲ្យរថយន្តចូលចតលើកដាក់ទំនិញតែម្តង ។ ប៉ុន្តែពេលរថភ្លើងដំណើរការវិញ នឹងឲ្យរថយន្តទាំងអស់ផ្អាកចូលចតហើយ ។
ឯចំពោះការលួចកាត់សំណាញ់ដែកចេញចូលទីតាំងស្ថានីយរថភ្លើង ស្ត្រីរូបនេះនិយាយថា ផ្នែកខាងក្រៅស្ថានីយគ្មានអ្នកគ្រប់គ្រងឬការពារទេហើយបើអាជ្ញាធរមានសមត្ថកិច្ចនៅតែធ្វើហីៗមិនមានវិធានការ និងមិនបញ្ជូនកម្លាំងមកចូលរួមមិនអាចទៅរួចទេ ព្រោះមានភ្នាក់ងារសន្តិសុខតែ២នាក់មិនអាចធ្វើអ្វីបានឡើយ៕
ចែករំលែកព័តមាននេះ