រាជធានីភ្នំពេញ ៖ សមាជិកព្រឹទ្ធសភាបារាំងជាមួយប្រទេសសមាជិកសហភាពអឺរ៉ុប ដើម្បីឲ្យពិនិត្យឡើងវិញនៃការដាក់សម្ពាធមកលើកម្ពុជាក្រោមលេសចោទប្រកាន់ពីសិទ្ធមនុស្ស និងការអនុវត្តន៍លទ្ធិប្រជាធិបតេយ្យនៅកម្ពុជា ។ នេះបើតាមការបញ្ជាក់ឲ្យដឹងពីលោក ណុប ចាន់ណារិន្ទ អ្នកនាំពាក្យ…
រាជធានីភ្នំពេញ ៖ សមាជិកព្រឹទ្ធសភាបារាំងជាមួយប្រទេសសមាជិកសហភាពអឺរ៉ុប ដើម្បីឲ្យពិនិត្យឡើងវិញនៃការដាក់សម្ពាធមកលើកម្ពុជាក្រោមលេសចោទប្រកាន់ពីសិទ្ធមនុស្ស និងការអនុវត្តន៍លទ្ធិប្រជាធិបតេយ្យនៅកម្ពុជា ។
នេះបើតាមការបញ្ជាក់ឲ្យដឹងពីលោក ណុប ចាន់ណារិន្ទ អ្នកនាំពាក្យ និងជាអនុរដ្ឋលេខាធិការ នៅក្រោយជំនួបពិភាក្សារវាងលោកជំទាវម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចជាមួយ ឯ.ឧ ហ្វ្រង់ស្វ័រ ហ្គ័រ៉ូសឌីឌីយេ សមាជិកព្រឹទ្ធសភា និងជាអនុប្រធានក្រុមមិត្តភាពព្រឹទ្ធសភា បារាំង-កម្ពុជា កាលពីពេលថ្មីៗកន្លងមកនេះនៅទីស្តីការក្រសួង ។
ក្នុងជំនួបលោកហ្វ្រង់ស្វ័រ ហ្គ័រ៉ូសឌីឌីយេ បានបញ្ជាក់ថា នេះជាដំណើរទស្សនកិច្ច លើកទី២របស់លោកនៅកម្ពុជា ហើយតាមរយៈទស្សនកិច្ចនេះលោកបានមើលឃើញច្បាស់ពីសភាពការណ៍ពិតនៅកម្ពុជាទាំងល្បឿននៃការអភិវឌ្ឍការរីកចម្រើនវិស័យសេដ្ឋកិច្ច និងជីវភាពរស់នៅរបស់ប្រជាជនកម្ពុជា គឺមានភាពធូរធា ពិសេសឃើញពីភាពសុខសានរបស់ប្រជាជនកម្ពុជា ដែលផ្ទុយពីការលើកឡើងរបស់បុគ្គលមួយចំនួនជាប្រទេសសមាជិកសហភាពអឺរ៉ុបថា គ្មានការគោរពសិទ្ធិមនុស្ស និងមិនមានលទ្ធិប្រជាធិបតេយ្យ ។
សមាជិកព្រឹទ្ធសភាបារាំងរូបនេះបានចាត់ទុកថា ការលើកឡើងទាំងអស់ខាងលើជាលេសពិតប្រាកដ ដើម្បីដាក់គំនាបមកលើប្រទេសកម្ពុជាក្រោមការជំរុញពីសហរដ្ឋអារិកតាមរយៈការគំរាមដកប្រព័ន្ធអនុគ្រោះពន្ធ (EB A) ដែលជាក់ស្តែងនៅចំពោះមុខនេះគេកំពុងនិយាយពីវិស័យអង្កការរបស់កម្ពុជា ។ លោកបានបន្ត បើនិយាយពីប្រជាធិបតេយ្យ និងការគោរពសិទ្ធមនុស្សនៅកម្ពុជា គឺមានលក្ខណៈល្អ ប្រសើរជាងប្រទេសនៅអឺរ៉ុប និងនៅប្រទេសប្រជាធិបតេយ្យមួយចំនួនទៅទៀតដែលប្រទេសខ្លះមានការឡើងកាន់អំណាចមិនមានការបោះឆ្នោតផង ហេតុអីគេមិននិយាយមកនិយាយតែកម្ពុជា គ្រាដែលការបោះឆ្នោតគ្រប់អាណត្តិនៅកម្ពុជា មានគណបក្សនយោបាយជាច្រើនចូលរួមប្រកួតប្រជែង ពិសេសការបោះឆ្នោតកាលពីឆ្នាំ២០១៨ ដែលជាការបោះឆ្នោតអាណត្តិទី៦ កម្ពុជាមានគណបក្សរហូតដល់ទៅ២០ចូលរួម និងមានប្រជាពលរដ្ឋទៅបោះឆ្នោតជាង៨៣ភាគរយឯណោះ ។
បើតាមអ្នកនាំពាក្យដដែលបានឲ្យដឹងក្នុងជំនួបនោះសមាជិកព្រឹទ្ធសភាបារាំងរូបនេះបានធ្វើការប្រៀបធៀបចំៗទៅនឹងប្រទេសអ៊ីតាលីដែលជាប្រទេសសមាជិកអឺរ៉ុបដែលមិនបានគោរពអ នុវត្តលទ្ធិប្រជាធិបតេយ្យ និងការគោរពសិទ្ធមនុស្សពេញលេញនៅឡើយទេ មកដល់ពេលនេះ តែបែរជាបណ្តាប្រទេសនៅក្នុងអឺរ៉ុបខ្លួនឯង និងសហរដ្ឋអាមេរិកធ្វើមិនដឹងមិនឮទៅវិញ ។
សមាជិកព្រឹទ្ធសភារូបនេះក៏សន្យាជាមួយលោកស្រី ម៉ែន សំអន ថានឹងបន្តជួបពិភាក្សាបន្តបន្ទាប់ជាមួយប្រទេសសមាជិកសហភាពអឺរ៉ុប ដើម្បីឲ្យពិនិត្យឡើងវិញ ពីការគំរាមដកប្រព័ន្ធអនុគ្រោះពន្ធ (EBA) មកលើកម្ពុជាក្រោមលេសប្រជាធិបតេយ្យ និងការគោរពសិទ្ធមនុស្ស ។ ដូចនេះសហភាពអឺរ៉ុបគួរតែពិនិត្យរួមគ្នា ដើម្បីបន្ថយកំដៅនយោបាយ ហើយសមាជិកព្រឹទ្ធសភាបារាំងរូបនេះថា ការរំលាយគណបក្សសង្គ្រោះជាតិ គឺជាការសម្រេចរបស់តុលាការ មិនមែនជាការសម្រេចរបស់រាជរដ្ឋាភិបាលនោះទេ ។
ជាការឆ្លើយតបឧបកនាយករដ្ឋមន្ត្រី ម៉ែន សំអន បានអរគុណចំពោះការយកចិត្តទុកដាក់របស់ភាគីបារាំងដែលគាំទ្រកម្ពុជា លើយន្តការអនុវត្តលទ្ធិប្រជាធិបតេយ្យ និងការគោរពសិទ្ធិមនុស្សដែលកំពុងមានភាពល្អប្រសើរនៅកម្ពុជា ។ លោកជំទាវថា អាស្រ័យដោយការខិតខំប្រឹងប្រែងរបស់សម្តេចតេជោ ហ៊ុន សែន នាយករដ្ឋមន្ត្រីបានធ្វើឲ្យប្រទេសកម្ពុជាដែលធ្លាប់ឆ្លងកាត់សង្គ្រាមស៊ីវិលដ៏ជូរចត់អស់ជិតបីទសវត្សរ៍ មកជាប្រទេសមានសន្តិភាព និងមានឱកាសបន្តការអភិវឌ្ឍផ្នែកសេដ្ឋកិច្ច សង្គម និងវប្បធម៌របស់ខ្លួនបន្តទៀត ហើយក្នុងរយៈពេលជាង២០ឆ្នាំចុងក្រោយនេះកម្ពុជាមានកំណើនសេដ្ឋកិច្ចខ្ពស់ និងថេរជាង៧ភាគរយ ក្នុងមួយឆ្នាំ និងបានប្រែក្លាយខ្លួនពីសមរភូមិទៅជាទីផ្សារដ៏ទាក់ទាញ និងពីប្រទេសដែលមានការអភិវឌ្ឍតិចបំផុត ឬក្រីក្របំផុតទៅជាប្រទេសដែលមានចំណូលមធ្យមកំរិតទាប ។
លោកស្រីឧបកនាយករដ្ឋមន្ត្រីបានបន្តថា បច្ចុប្បន្នរាជរដ្ឋាភិបាលកម្ពុជាកំពុងខិតខំបន្ថែមទៀត ក្នុងការពង្រឹងសន្តិភាព ការពារលទ្ធិប្រជាធិបតេយ្យ និងការគោរពសិទ្ធិមនុស្ស តាមរយៈការដោះស្រាយ និងបញ្ចប់ទំនាស់ គ្រប់រូបភាព ដើម្បីប្រយោជន៍ជាតិ និងប្រជាជនកម្ពុជា ៕
ចែករំលែកព័តមាននេះ