រាជធានីភ្នំពេញ ៖ អ្នកជំនាញផ្នែកអចលនទ្រព្យ ពិសេសជំនាញលើការទិញលក់ដីធ្លីបានអះអាងថា តម្លៃដីធ្លីនៅតំបន់សំខាន់ៗចំនួនពីរនៃជាយរាជធានីភ្នំពេញ នឹងមានកំណើនកើនឡើងខ្លាំងនាពេលខាងមុខនេះ ។ លោក កាង សុទ្ធី…
រាជធានីភ្នំពេញ ៖ អ្នកជំនាញផ្នែកអចលនទ្រព្យ ពិសេសជំនាញលើការទិញលក់ដីធ្លីបានអះអាងថា តម្លៃដីធ្លីនៅតំបន់សំខាន់ៗចំនួនពីរនៃជាយរាជធានីភ្នំពេញ នឹងមានកំណើនកើនឡើងខ្លាំងនាពេលខាងមុខនេះ ។
លោក កាង សុទ្ធី អគ្គនាយកក្រុមហ៊ុន Century21 Land Station Real Estateបានមានប្រសាសន៍នាពេលថ្មីនេះថា តម្លៃដីធ្លីនៅទីក្រុងភ្នំពេញមានសក្តានុពល និងកំណើនតម្លៃខុសៗគ្នា អាស្រ័យលើទីតាំង និងស្ថានភាពដីជាក់ស្តែង ប៉ុន្តែដីនៅតំបន់កំបូល និងដីនៅស្របតាមបណ្តោយផ្លូវជាតិលេខ៦អា នឹងមានសក្តានុពលកើនឡើងតម្លៃលឿនជាងគេនាពេលឆាប់ៗខាងមុខនេះ ។
លោកបន្តថា ៖« ការកើនឡើងដីធ្លីនៅតំបន់នេះ ដោយសារលក្ខខណ្ឌភូមិសាស្ត្រ កំណើននៃការវិនិយោគពីអ្នកវិនិយោគជាតិ និងអន្តរជាតិ ព្រមទាំងសណ្ឋានដីមានលក្ខណៈល្អប្រសើរ »។
លោកបន្ថែមថា ៖« តម្លៃដីនៅតាមតំបន់ផ្លូវជាតិលេខ៦អា នឹងកើនទ្វេដងនាបណ្តាឆ្នាំខាងមុខ ដោយសារតំបន់នេះមានការអភិវឌ្ឍលឿន ព្រោះមានបណ្តុំដោយមជ្ឈមណ្ឌលកីឡា លំនៅដ្ឋាន និងសកម្មភាពពាណិជ្ជកម្មផ្សេងៗ »។
លោក កាង សុទ្ធី បានបន្តថា ចំណែកតម្លៃដីធ្លីនៅតំបន់កំបូល ក៏មានការកើនឡើងខ្ពស់ផងដែរ ដោយសារតំបន់នេះសប្បូររោងចក្រ សហគ្រាស ប្រជាជនរស់នៅច្រើន និងជាពិសេសរាជរដ្ឋាភិបាលកាលពីពេលថ្មីៗនេះ បានចេញអនុក្រិតបង្កើតខណ្ឌចំនួន២ទៀតនៅក្រុងភ្នំពេញ គឺខណ្ឌកំបូល និងខណ្ឌបឹងកេងកង ។
លោកបន្តថា តំបន់កំបូលក៏មានហេដ្ឋារចនាសម្ព័ន្ឋខ្វាត់ខ្វែង មានការតភ្ជាប់រវាងផ្លូវជាតិលេខ៤ ផ្លូវទំនប់កប់ស្រូវ ផ្លូវក្រវាត់ក្រុងទី៣ជាដើម ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានយល់ស្របនឹងការលើកឡើងខាងលើ ដោយលោកបានមានប្រសាសន៍ថា ការកើនឡើងតម្លៃដីធ្លីនៅតំបន់នោះ ដោយសារកត្តាសំខាន់ៗជាច្រើនរួមមាន ៖ ១-ជាតំបន់អភិវឌ្ឍន៍ថ្មី ដែលងាយស្រួលក្នុងការរៀបចំហេដ្ឋារចនាសម្ព័ន្ធ។ ២-ហេដ្ឋារចនាសម្ព័ន្ធល្អប្រសើរក្នុងការតភ្ជាប់មកកណ្តាលរាជធានីភ្នំពេញ។ ៣-កំណើនប្រជាសាស្ត្រ ដែលធ្វើឲ្យសកម្មភាពពាណិជ្ជកម្មកើនឡើង។ ៤-កំណើននៃការវិនិយោគពីអ្នកវិនិយោគជាតិ និងអន្តរជាតិ ។
យោងតាមការសិក្សារបស់ក្រុមហ៊ុនCBRE Cambodiaបានរកឃើញថា តម្លៃដីធ្លីនៅកម្ពុជាមានកំណើនជាមធ្យម៧ភាគរយក្នុងមួយឆ្នាំ ៕
ចែករំលែកព័តមាននេះ