ខេត្តបន្ទាយមានជ័យ ៖ ប្រភពព័ត៌មានពីពលរដ្ឋនៅភូមិ និងសង្កាត់ប៉ោយប៉ែតបានលើកឡើងថា ស្ថានីយរថភ្លើងនៅបន្ទាត់ព្រំដែនក្រុងប៉ោយប៉ែត ពេលនេះក្លាយជាទីតាំងជនអាណាថាជក់ថ្នាំញៀនយ៉ាងគគ្រឹកគគ្រេងនៅពេលយប់ ។ មិនតែប៉ុណ្ណោះមុខស្ថានីយរថភ្លើងនេះក៏ក្លាយជាចំណតរថយន្តដឹកទំនិញ និងអ្នកដំណើរផងដែរ។ ប្រភពដដែលបន្តថា…
ខេត្តបន្ទាយមានជ័យ ៖ ប្រភពព័ត៌មានពីពលរដ្ឋនៅភូមិ និងសង្កាត់ប៉ោយប៉ែតបានលើកឡើងថា ស្ថានីយរថភ្លើងនៅបន្ទាត់ព្រំដែនក្រុងប៉ោយប៉ែត ពេលនេះក្លាយជាទីតាំងជនអាណាថាជក់ថ្នាំញៀនយ៉ាងគគ្រឹក
គគ្រេងនៅពេលយប់ ។ មិនតែប៉ុណ្ណោះមុខស្ថានីយរថភ្លើងនេះក៏ក្លាយជាចំណតរថយន្តដឹកទំនិញ និងអ្នកដំណើរផងដែរ។
ប្រភពដដែលបន្តថា នៅវេលាយប់ចាប់ពីម៉ោង១២ឡើងទៅ ត្រង់ចំណុចបន្ទប់ទឹកនៃស្ថានីយរថភ្លើងខាងលើក៏ដូចជាលើដងផ្លូវរថភ្លើងមានជនអាណាថាឈរហូហែជក់ថ្នាំញៀន ។ ដោយឡែករបងសំណាញ់ដែកខណ្ឌចែកផ្លូវរថភ្លើង និងពលរដ្ឋដែលកំណត់មិនឲ្យឆ្លងកាត់(ខាងត្បូងផ្លូវរថភ្លើង) ក៏ត្រូវបានក្រុមជនញៀនថ្នាំកាត់សំណាញ់ដែកជាប្រឡោះៗដើម្បីដើរឆ្លងកាត់ចូលទីតាំងនោះមិនតិចជាង១០កន្លែងនោះទេ។
ជុំវិញករណីនេះស្ត្រីឈ្មោះឈឿម ស្រីអ៊ុក អ្នកនៅមើលថែទីតាំងស្ថានីយបានប្រាប់កោះសន្តិភាពដោយផ្ទាល់ថាករណីរិះគន់ពីសំណាក់ប្រជាពលរដ្ឋរឿងជនអាណាថាជក់ថ្នាំញៀននៅស្ថានីយរថភ្លើងនាពេលយប់ គឺពិតជាកើតមានមែន។
ស្ត្រីដដែលបន្តថា គាត់ធ្លាប់បានប្រាប់ទៅសមត្ថកិច្ចដែរ តែមិនអាចធ្វើបាន ព្រោះជាតំបន់អាណាធិបតេយ្យ ហើយថា គាត់មានតួនាទីត្រឹមតែជាអ្នកលក់សំបុត្ររថភ្លើងតែប៉ុណ្ណោះ យប់ឡើងចាក់សោរការពារសម្បត្តិរដ្ឋក្នុងស្ថានីយជាកាស្រេច ។
ចំពោះករណីនៅខាងមុខស្ថានីយក្លាយជាចំណតរថយន្ត ស្ត្រីឈ្មោះឈឿម ស្រីអ៊ុក បាននិយាយថា ដោយសារមួយរយៈនេះទីតាំងទំនេរ ហើយតាមព័ត៌មានពីថ្នាក់លើ ទាល់តែក្រោយពិធីបុណ្យចូលឆ្នាំថ្មីប្រពៃណីជាតិខាងមុខទើបរថភ្លើងដំណើរវិញ ម្យ៉ាងត្រូវការសេវាខ្លះឲ្យខាងបោសសំអាតប្រើប្រាស់ ទើបអនុញ្ញាតឲ្យរថយន្តចូលចតលើកដាក់ទំនិញតែម្តង ប៉ុន្តែពេលរថភ្លើងដំណើរការវិញនឹងឲ្យរថយន្តទាំងអស់ផ្អាកចូលចតវិញ ។
ចំពោះការលួចកាត់សំណាញ់ដែកចេញចូលទីតាំងស្ថានីយរថភ្លើង ស្ត្រីឈ្មោះឈឿម ស្រីអ៊ុក បាននិយាយថា ផ្នែកខាងក្រៅស្ថានីយគ្មានអ្នកគ្រប់គ្រង ឬការពារនោះទេ ហើយថាបើអាជ្ញាធរមានសមត្ថកិច្ចនៅតែធ្វើហីៗ មិនមានវិធានការ និងមិនបញ្ជូនកម្លាំងមករៀបចំសណ្តាប់ធ្នាប់ ឬបង្ក្រាបនោះ មិនអាចទៅរួចទេ ព្រោះគាត់គ្រាន់តែជាអ្នកលក់សំបុត្រនៅស្ថានីយ ហើយមានសន្តិសុខតែ២នាក់មិនអាចធ្វើអ្វីបានឡើយ៕
ចែករំលែកព័តមាននេះ