ខេត្តក្រចេះ៖ បុរសជនជាតិភាគតិចម្នាក់បានអារ និងកាប់ដើមឈើមិនប្រយ័ត្ន បណ្តាលឲ្យរលំសង្កត់ពីលើស្លាប់ ដែលហេតុការណ៍នេះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី២ កុម្ភៈ ឆ្នាំ២០១៩ ស្ថិតក្នុងភូមិកូនវ៉ា ឃុំស្រែជិះ ស្រុកសំបូរ ។
នគរបាលប៉ុស្តិ៍រដ្ឋបាលស្រុកសំបូរបានឲ្យដឹងថា ជនរងគ្រោះដែលស្លាប់ឈ្មោះ ខិល ខូន ភេទប្រុស អាយុ៤៥ឆ្នាំ ជនជាតិភាគតិចថ្មូន រស់នៅឃុំអូរគ្រៀង ស្រុកសំបូរ ។
បើតាមការសាកសួរពីមន្ត្រីននគរបាលមូលដ្ឋានបានឲ្យដឹងថា មុនពេលកើតហេតុ ជនរងគ្រោះ និងអ្នកភូមិចំនួន៤នាក់ផ្សេងទៀតបានចូលព្រៃដើម្បីកាប់ព្រៃរានដីធ្វើចម្ការ ហើយជនរងគ្រោះក៏បានកាប់ដើមឈើធំមួយដើម តែដោយសារការអារ និងកាប់ដើមឈើខុសបច្ចេកទេស បានធ្វើឲ្យដើមឈើនោះរលំសង្កត់ពីលើជនរងគ្រោះ បណ្តាលឱ្យស្លាប់តែម្តង។
ប្រភពព័ត៌មានបានឱ្យដឹងថា ភ្លាមៗនោះជនរងគ្រោះត្រូវបានអ្នកភូមិដែលកំពុងតែព្រៃនៅក្បែរៗនោះបានស្ទុះមកជួយដែរ តែមិនអាចជួយបានឡើយដោយសារជនរងគ្រោះត្រូវដើមឈើធំសង្កត់ពីលើ បណ្តាលឱ្យស្លាប់នៅនឹងកន្លែងកើតហេតុបាត់ទៅហើយ។ បន្ទាប់មកអ្នកភូមិបានរាយការណ៍ទៅសមត្ថកិច្ចដើម្បីឱ្យចុះមកពិនិត្យ ។
ក្រោយពីមន្ត្រីនគរបាលមូលដ្ឋានបានចុះទៅពិនិត្យដល់កន្លែងកើតហេតុ និងពិនិត្យលើសពជនរងគ្រោះរួចមក សមត្ថកិច្ចបានបញ្ជាក់ថា ជនរងគ្រោះ ពិតជា ស្លាប់ដោយសារដើមឈើរលំសង្កត់ពីលើប្រាកដមែន ។
បច្ចុប្បន្នសពជនរងគ្រោះ ត្រូវបានសមត្ថកិច្ចប្រគល់ក្រុមគ្រួសារ និងសាច់ញាតិដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ