ខេត្តប៉ៃលិន ៖ បន្ទាប់ពីដឹងខ្លួនថា មានចោរចូលលួចគាស់ដំបូលតូបរបស់ខ្លួន ហើយយកទូរស័ព្ទអស់ជាច្រើនគ្រឿង ម្ចាស់ហាងលក់ទូរស័ព្ទមួយកន្លែងបានដាក់ពាក្យបណ្តឹងទៅកងរាជអាវុធហត្ថខេត្តឱ្យចុះប្រតិបត្តិការស៊ើបអង្កេតរហូតឈានដល់ចាប់ក្របួចជាប់តែម្តង ។
ហេតុការណ៍ចាប់ជនសង្ស័យពូកែគាស់ដំបូលតូបលួចទូរស័ព្ទដៃនេះបានធ្វើឡើង កាលពីវេលាម៉ោង៩និង៣០នាទីព្រឹកថ្ងៃទី០១ ខែកុម្ភៈ ឆ្នាំ២០១៩ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលា ក្រៅ ប្រភពព័ត៌មានបានឱ្យដឹងថា ជនសង្ស័យមានឈ្មោះ រ៉ន សារ៉ា ភេទប្រុស អាយុ២៤ឆ្នាំ មុខរបរមិនប្រាដក រស់នៅក្នុងភូមិផ្សារព្រំ ឃុំស្ទឺងកាច់ ស្រុកសាលាក្រៅ ខេត្តប៉ៃលិន ករណីលួចមានស្ថានទម្ងន់ទោស ។
ប្រភពបន្តទៀតថា សមត្ថកិច្ចបានដកហូតនូវវត្ថុតាងមួយចំនួនរួមមានទូរស័ព្ទដៃចំនួន៩គ្រឿង ប្រាក់ខ្មែ១៣៨.៨០០រៀល កាតទូរស័ព្ទស្មាតហ្វូនចំនួន៣០សន្លឹក ក្នុង១សន្លឹកស្មើ១ដុល្លារ ។
ជនសង្ស័យខាងលើធ្លាប់ធ្វើសកម្មភាពដើរលួចឆក់នៅតាមផ្ទះប្រជាពលរដ្ឋជាច្រើនកន្លែងមកហើយ នាពេលយប់ ហើយរូបគេក៏មានកររណីជាប់ពាក់ពន្ធនឹងការប្រើប្រាស់គ្រឿងញៀនខុសច្បាប់ផងដែរ ។ បច្ចុប្បន្នក្រោយពីសាកសួររួចមកជំនាញបានរៀបចំកសាងសណុំរឿង ដើម្បីបញ្ជូនទៅតុលាការឱ្យចាត់ការតាមនីតិវិធី ។
សូមបញ្ជាក់ថា នៅក្នុងភូមិខាងលើប្រជាពលរដ្ឋជាច្រើននាក់មានការព្រួយបារម្ភពីភូមិឃុំសុវត្ថិភាព ខណៈក្រុមចោរដើរល្បាតចូលលួចទាំងយប់ទាំងថ្ងៃមិនចេះស្រាក សូម្បីតែសម្ភារនៅក្នុងសាលារៀនឯកជនមួយចំនួនក៏ពួកគេចូលទៅលួច និងគាស់ទ្វារលួចសម្ភារផងដែរ ៕
ចែករំលែកព័តមាននេះ