ខេត្តប៉ៃលិន ៖ បុរសម្នាក់ត្រូវបានសាច់ញាតិប្រទះឃើញចងកសម្លាប់ខ្លួននៅក្បែរគ្រែខាងមុខផ្ទះ បង្កឱ្យមានការភ្ញាក់ផ្អើលកើតឡើងកាលពីវេលាម៉ោង៦និង១០នាទីព្រឹកថ្ងៃទី១ ខែកុម្ភៈ ឆ្នាំ២០១៩ ស្ថិតនៅក្នុងភូមិអូរពឺត សង្កាត់ទួលល្វា ក្រុងប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះដែលស្លាប់ឈ្មោះ អែល សំណាង ភេទប្រុស អាយុ៤៨ឆ្នាំ រស់នៅក្នុងភូមិកើតហេតុខាងលើ
ប្រភពព័ត៌មានបានឱ្យដឹងថា កាលពីពេលថ្មីៗនេះ ក្រុមគ្រួសារបានដឹកយកជនរងគ្រោះទៅសម្រាកព្យាបាលនៅក្នុងមន្ទីរពេទ្យបង្អែកខេត្តប៉ៃលិន ព្រោះជនរងគ្រោះដេកមិនលក់ អស់កម្លាំង និងញ័រដៃជើង លុះជរងគ្រោះបានធូរស្បើយឡើងវិញ ក្រុមគ្រួសារក៏ដឹកយកទៅសម្រាកនៅផ្ទះវិញ ។
ទោះបីជាយ៉ាងណា ជនរងគ្រោះចេះតែពោលប្រាប់កូនចៅខ្លួនថា គាត់រស់នៅមានជម្ងឺប្រចាំកាយបែបនេះ ពិតជាលំបាកដល់ប្រពន្ធកូន ក្នុងការមើលថែរក្សា ហើយគាត់មិនចង់រស់នៅបន្តទៀតទេ ។ បន្ទាប់ពីបានស្តាប់ជនរងគ្រោះនិយាយរួចហើយ អ្នកផ្ទះក៏មិនចាប់រម្មណ៍អ្វីទាំងអស់ ។
លុះនៅមុនថ្ងៃកើតហេតុ ជនរងគ្រោះចេះតែប្រាប់ប្រពន្ធកូនដដែលៗថា គាត់មិនសូវស្រួលក្នុងខ្លួនទេ ដេកអត់លក់ ថប់ៗក្នុងទ្រូង លុះព្រឹកព្រលឹមស្រាងឡើង ខណ:ស្ងាត់មនុស្ស ជនរងគ្រោះក៏យកខ្សែចងកធ្វើអត្តឃាត បណ្តាលឱ្យស្លាប់តែម្តង ។
ពាក់ព័ន្ធនឹងករណីខាងលើនេះ មន្ត្រីជំនាញបានធ្វើកោសល្យវិច័្ចយលើសពរួចសន្និដ្ឋានថា ជនរងគ្រោះ ពិតជាស្លាប់ដោយសារចងកធ្វើអត្តឃាតប្រាកដមែន និងដោយយោងតាមការបញ្ជាក់របស់គ្រួសារជនរងគ្រោះ គឺជនរងគ្រោះមានជម្ងឺសរសៃប្រសាទ ដោយមានលិខិតពេទ្យបញ្ជាក់ច្បាស់លាស់ ។
បច្ចុប្បន្ន សពជនរងគ្រោះត្រូវបាននគរបាលប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ