រាជធានីភ្នំពេញ ៖ គម្រោងខុនដូភីអេសគ្រីស្តាល់ ថ្មីៗនេះបានចេញលិខិតមួយបដិសេធការចោទប្រកាន់របស់បុគ្គល សុខ គឹម ហាក់ ដែលចោទប្រកាន់គម្រោងខុនដូ ថា បានឆបោក…
រាជធានីភ្នំពេញ ៖ គម្រោងខុនដូភីអេសគ្រីស្តាល់ ថ្មីៗនេះបានចេញលិខិតមួយបដិសេធការចោទប្រកាន់របស់បុគ្គល សុខ គឹម ហាក់ ដែលចោទប្រកាន់គម្រោងខុនដូ ថា បានឆបោក ដោយលក់ចំណែកឯកជនរបស់ខ្លួនទៅអ្នកដទៃ និងបានគៃបំបាត់ប្រាក់របស់ខ្លួននោះ។
យោងតាមលិខិតជូនដំណឹងរបស់គម្រោងខុនដូភីអេសគ្រីស្តាល់ ចុះថ្ងៃទី ២៩ ខែមករា ឆ្នាំ២០១៩ បានឲ្យដឹងថា បុគ្គល សុខ គឹម ហាក់ បានទិញចំណែកឯកជនរបស់គម្រោងខុនដូភីអេសគ្រីស្តាល់ ដែលជាចំណែកឯកជនលេខ S3 601 ដោយបានចុះកិច្ចព្រមព្រៀងលក់-ទិញខុនដូ ចុះថ្ងៃទី ១៩ សីហា ឆ្នាំ ២០១៥ ។
ផ្អែកតាមលក្ខខណ្ឌនៃ ឧបសម្ព័ន្ធ «ក» នៃកិច្ចព្រមព្រៀងលក់-ទិញខុនដូ ចុះថ្ងៃទី ១៩ សីហា ឆ្នាំ ២០១៥ លោកសុខ គឹមហាក់ ត្រូវបង់រំលស់ប្រាក់ថ្លៃទិញលក់ជូនគម្រោងខុនដូភីអេសគ្រីស្តាល់ ។ ប៉ុន្តែបុគ្គល សុខ គឹមហាក់ បានបំពានកិច្ចសន្យា ដោយមានការយឺតយ៉ាវជាច្រើនលើកច្រើនសារក្នុងការបង់ប្រាក់រំលស់ និងបានប្រើប្រាស់ពាក្យសម្តីមិនសមរម្យ ពេលបុគ្គលិកក្រុមហ៊ុនទំនាក់ទំនងទៅលោក ក្រើនរំលឹករឿងបង់ប្រាក់ ។
តាមកិច្ចសន្យាបានចែងយ៉ាងច្បាស់ថា ផ្អែកតាមប្រការ ១២.២ នៃកិច្ចព្រមព្រៀង បានកំណត់យ៉ាងច្បាស់ថា «ក្នុងករណីអ្នកទិញ គឺលោក សុខ គឹមហាក់ មិនបានបង់ប្រាក់តាមតារាងបង់ប្រាក់ នោះអ្នកលក់ មានសិទ្ធិរំលាយកិច្ចព្រមព្រៀង និងរឹបអូសយកប្រាក់ដែលបានបង់រួចទាំងអស់»។ ដែលនេះជាការព្រមព្រៀងរបស់គូភាគី។
សូមបញ្ជាក់ថា គម្រោងខុនដូភីអេសគ្រីស្តាល់ បានចេញលិខិតជូនដំណឹងលើកចុងក្រោយឲ្យអ្នកទិញ ចូលធ្វើការបង់ប្រាក់ដំណាក់កាលចុងក្រោយ តែបុគ្គល សុខ គឹមហាក់ នៅតែមិនចូលខ្លួន ធ្វើឲ្យគម្រោងខុនដូអស់ជំនឿ និងសម្រេច ធ្វើការរំលាយកិច្ចព្រមព្រៀង តាមរយៈលិខិតចុះថ្ងៃទី ២២ មិថុនា ២០១៨ ៕ ដោយសហការ
ចែករំលែកព័តមាននេះ