ខេត្តក្រចេះ ៖ ក្រុមមន្ត្រីអភិរក្សអះអាងថា ត្រីផ្សោតដែលកំពុងតែរស់នៅក្នុងទន្លេមេគង្គខេត្តក្រចេះ និងអាចមានកំណើនជាង១០ក្បាលបន្ថែមទៀត នៅក្នុងឆ្នាំ២០១៩នេះ ។ ការកើនចំនួនត្រីផ្សោត ដោយសារការចាប់កំណើត តាមរយៈការបន្តពូជរបស់ពពួកឋនិកសត្វទឹកសាបដ៏កម្រនេះ ក៏ត្រូវបានក្រុមមន្ត្រីបញ្ជាក់ថា កើតមានឡើងក្រោយពីមានការអភិរក្សយ៉ាងតឹងរឹងពីក្រុមមន្ត្រីឆ្មាំ ក៏ដូចជាចូលរួមពីប្រជាសហគមនេសាទបានលើកកម្ពស់សុខសុវត្ថិភាពរបស់ពពួកត្រីផ្សោត ដែលកំពុងតែរស់នៅតាមអន្លង់ ទើបធ្វើឲ្យផ្សោតងាយ និងបន្តពូជ ។
ប្រធានឆ្មាំអភិរក្សត្រីផ្សោតទន្លេមេគង្គខេត្តក្រចេះ លោក ម៉ុក ពន្លក បានឲ្យដឹងនៅថ្ងៃទី៣១ មករា នេះថា កូនត្រីផ្សោត១ក្បាលទំងន់ជាង១២គីឡូក្រាម ត្រូវបានក្រុមមន្ត្រីអភិរក្ស និងក្រុមអ្នកស្រាវជ្រាវនៃអង្គការជាដៃគូបានរកឃើញនៅក្នុងអន្លង់ផ្សោតទន្លេមេគង្គកាំពី ។ កូនត្រីផ្សោត១ក្បាលនេះ អាចទើបនិងកើតក្នុងអំឡុងរយៈពេល១សប្តាហ៍មុននេះ ។
នាយរងខណ្ឌរដ្ឋបាលជលផលខេត្ត និងជាប្រធាឆ្មាំអភិរក្សលោក ម៉ុក ពន្លក បានប្រាប់ឲ្យដឹងដែរថា ត្រីផ្សោតមេមួយក្បាលអាចបន្តពូជបាន១ដងក្នុងរយៈពេល៣ឆ្នាំ ។ តែយ៉ាងណា ពពួកត្រីផ្សោតទឹកសាបចិញ្ចឹមកូនដោយទឹកដោះ មិនអាចបន្តពូជមានកូនភ្លោះ ដូចសត្វដទៃទៀតបានឡើយ ។ ក្រុមមន្ត្រីស្រាវជ្រាវបានឲ្យដឹងថា នៅក្នុងដងទន្លេមេគង្គសព្វថ្ងៃ មានត្រីផ្សោតរស់នៅយ៉ាងតិចជាង៩០ក្បាល ដែលចំនួននេះ ត្រូវបានរាប់បញ្ជូលតែទៅលើផ្សោត ដែលមានវ័យជំទង់ប៉ុណ្ណោះ ។
ដោយឡែក សម្រាប់ទន្លេមេគង្គខេត្តក្រចេះ សព្វថ្ងៃមានត្រីផ្សោតរស់នៅក្នុងចន្លោះពី៥៥ ទៅ៦០ក្បាល។ ត្រីផ្សោតទាំងអស់នេះ សព្វថ្ងៃកំពុងតែរស់នៅតាមអន្លង់ចំនួន៥អន្លង់ធំៗ ក្នុងទន្លេមេគង្គខេត្តក្រចេះ។ អន្លង់ទាំងនោះ មានដូចជាអន្លង់ខ្សាច់ម្កាក់, អន្លង់កោះដំបង, អន្លង់កោះផ្តៅ, អន្លង់កន្ទុយកោះរងាវ និងអន្លង់ផ្សោតកាំពី។ ក្នុងចំណោមអន្លង់ធំៗទាំង៥ គឺអន្លង់ផ្សោតកាំពី មានត្រីផ្សោតរស់នៅច្រើនជាងគេ ក្នុងចន្លោះចាប់ពី២០ទៅ ៣០ក្បាល ។
នាយរងខណ្ឌរដ្ឋបាលជលផលខេត្ត និងជាប្រធានឆ្មាំអភិរក្ស លោក ម៉ុក ពន្លក បានឱ្យដឹងទៀតថា បើតាមការប៉ាន់ប្រមាណក្នុងឆ្នាំ២០១៩នេះ ត្រីផ្សោតអាចមានកំណើនដល់ទៅជាង១០ក្បាល តាមរយះការបង្កកំណើត ។ ទន្ទឹមនឹងការប៉ាន់ប្រមាណលើកំណើតចំនួនត្រីផ្សោតនេះ លោកប្រធានឆ្មាំអភិរក្សបាន អំពាវនាវដល់ប្រជានេសាទ ក៏ដូចជាប្រជាសហគមន៍នៅតាមបណ្តោដងទន្លេមេគង្គ ឱ្យមានការរួមគ្នា អភិរក្សថែរក្សា ។
លោកថា កន្លងមកមន្ត្រីជំនាញតែងតែបង្កើនការចុះផ្សព្វផ្សាយឱ្យពលរដ្ឋនៅតាមដងទន្លេមេគង្គ មានការយល់ដឹងពីច្បាប់ជលផល ក៏ដូចជាការចុះហាមប្រាម មិនឲ្យធ្វើការនេសាទនៅតាមតំបន់អភិរក្ស ដែលធ្វើឲ្យប៉ះពាល់ដល់ជីវិតផ្សោតបាត់បង់ត្រីនុយ ក៏ដូចជាត្រីមេពូជជាដើម ។
ចែករំលែកព័តមាននេះ