មនុស្សភាគច្រើនគិតថា ស្ថានភាពនៃសក់របស់ពួកគេ គឺអាស្រ័យលើរបៀបដែលពួកគេថែរក្សាវា និងកត្តាខាងក្រៅ ផ្សេងៗទៀត ។ ប៉ុន្តែជាក់ស្ដែងស្ថានភាពនៃសក់ រួមជាមួយនឹងរោគសញ្ញាមួយចំនួនអាចក្លាយជាការចង្អុលបង្ហាញឲ្យដឹងពីភាពមិនប្រក្រតីណាមួយក្នុងរាងកាយបាន ។ បញ្ហាទូទៅបំផុតមួយចំនួននៃសក់ដែលកើតឡើងនៅពេលសុខភាពជួបប្រទះនូវភាពមិនប្រក្រតី…
មនុស្សភាគច្រើនគិតថា ស្ថានភាពនៃសក់របស់ពួកគេ គឺអាស្រ័យលើរបៀបដែលពួកគេថែរក្សាវា និងកត្តាខាងក្រៅ ផ្សេងៗទៀត ។ ប៉ុន្តែជាក់ស្ដែងស្ថានភាពនៃសក់ រួមជាមួយនឹងរោគសញ្ញាមួយចំនួនអាចក្លាយជាការចង្អុលបង្ហាញឲ្យដឹងពីភាពមិនប្រក្រតីណាមួយក្នុងរាងកាយបាន ។ បញ្ហាទូទៅបំផុតមួយចំនួននៃសក់ដែលកើតឡើងនៅពេលសុខភាពជួបប្រទះនូវភាពមិនប្រក្រតី ៖
១. សក់ស្រអាប់គ្មានជីវិត ៖ ការថែរក្សាមិនបានត្រឹមត្រូវ, ការលាបពណ៌សក់ ឬការប្រើប្រាស់ម៉ាស៊ីនកៀបមូរសក់ញឹកញាប់ពេក គឺសុទ្ធតែជាមូលហេតុដំបូងបំផុតដែលមនុស្សភាគច្រើនគិតដល់នៅពេលដែលសក់របស់ពួកគេប្រែជាស្រអាប់មិនរលាស់។ ទោះជាយ៉ាងណាសក់ក៏ប្រែជាស្រអាប់ផងដែរនៅពេលរាងកាយខ្វះនូវជាតិវីតាមីន និងធាតុមីក្រូ (microelements)។
ស្ថាននៃសក់បែបនេះអាចចង្អុលបង្ហាញថា រាងកាយរបស់អ្នកត្រូវការជាតិរ៉ែសេឡេញ៉ូម, ស្ពាន់ធ័រ, និងផូស្វ័រ ។ ដើម្បីប្រាកដថាអ្វីដែលអ្នកគិត គឺត្រឹមត្រូវចូរពិនិត្យមើលលើស្ថានភាពអញ្ចាញ និងធ្មេញបន្ថែម ដោយប្រសិនបើសម្គាល់ឃើញមានបញ្ហាខុសប្រក្រតីណាមួយនោះ អ្នកគួរប្រញាប់ទៅជួបពិគ្រោះជាមួយគ្រូពេទ្យជំនាញ ។
២. អង្គែ ៖ មានមូលហេតុច្រើនណាស់ដែលបង្កឲ្យកើតអង្គែដូចជា ការប្រើប្រាស់ផលិតផលថែរក្សាសក់ច្រើនប្រភេទពេក, ការទទួលទានអាហារសម្បូរជាតិខ្លាញ់ និងជាតិស្ករ, ស្ត្រេស និងបញ្ហាទាក់ទងជាមួយក្រពះពោះវៀនជាដើម ។ ទោះជាយ៉ាងណា ប្រសិនបើមនុស្សម្នាក់កើតមានអង្គែពណ៌លឿង នោះពួកគេអាចកើតជំងឺរលាកស្បែក seborrheic។ ក្នុងករណីនេះសាប៊ូកម្ចាត់អង្គែ គឺមិនអាចជួយអ្វីបានឡើយ ហើយអ្នកត្រូវប្រញាប់ទៅជួបពិនិត្យជាមួយគ្រូពេទ្យជំនាញដើម្បីស្វែងរកដំណោះស្រាយ ។
៣. សក់ស្ដើងផុយស្រួយ ៖ សក់ដែលស្ដើង និងផុយស្រួយ គឺអាចបណ្ដាលមកពីកង្វះនូវជាតិប្រួតេអ៊ីន ។ ដូច្នេះអ្នកគួរទទួលទានផ្លែឈើឲ្យបានច្រើន រួមទាំងអាស៊ីតខ្លាញ់អូមេហ្កា៣ផងដែរ ។ ទោះជាយ៉ាងណា ស្ថានភាពនៃសក់បែបនេះអាចចង្អុលបង្ហាញឲ្យដឹងពីបញ្ហាសុខភាពធ្ងន់ធ្ងរ ដូចជាជំងឺ Cushing’s disease ប្រសិនបើមានអមមកជាមួយនូវអាការ គេងមិនលក់រ៉ាំរ៉ៃ, សម្ពាធឈាមឡើងខ្ពស់ និងឈឺខ្នងគ្មានមូលហេតុ ។
៤. សក់ជ្រុះ ៖ សក់ជ្រុះច្រើនខុសប្រក្រតីអាចត្រូវបានផ្សារភ្ជាប់ជាមួយនឹងប្រព័ន្ធអង់ដូគ្រីន ឬបញ្ហា ផ្សេងៗទាក់ទងជាមួយប្រព័ន្ធភាពស៊ាំ ។ វាក៏អាចជារោគសញ្ញាមួយនៃជំងឺទឹកនោមផ្អែមផងដែរ ។ ដូច្នេះដើម្បីជាការប្រសើរ អ្នកគួរប្រញាប់ទៅជួបពិគ្រោះជាមួយគ្រូពេទ្យជំនាញ ។ កុំស្លន់ស្លោ ក៏ព្រោះពេលខ្លះវាអាចគ្រាន់តែបណ្ដាលមកពីកង្វះវីតាមីន ឬភាពស្ត្រេសប៉ុណ្ណោះ ។
៥.សក់ឡើងប្រេង ៖ ជាធម្មតាបញ្ហាសក់បែបនេះ គឺបណ្ដាលមកពីរបបអាហាររបស់អ្នក ។ ដើម្បីដោះស្រាយបញ្ហានេះ ចូរព្យាយាមកាត់បន្ថយការទទួលទានសាច់, ខ្លាញ់ ឬប្រេង និងអាហារបំពង, ចៀសវាងការទទួលទានជាតិផ្អែមច្រើន, អាហារអាំង, ជាតិអាល់កុល និងកាហ្វេ ។ ប្រសិនបើសក់នៅតែមិនប្រែជាមានសភាពធម្មតាទេនោះ វាប្រហែលជាបណ្ដាលមកពីបញ្ហានៃការដុតរំលាយអាហារ, ខ្សោយអ័៊រម៉ូន ឬបញ្ហាទាក់ទងនឹងថ្លើម ។ ក្នុងករណីនេះអ្នកគួរប្រញាប់ទៅជួបពិគ្រោះជាមួយគ្រូពេទ្យជំនាញមុនពេលស្ថានភាពប្រែជាអាក្រក់ខ្លាំង ។
៦. សក់ស្កូវមុនវ័យ ៖ តាមពិតទៅសក់ស្កូវ ភាគច្រើនអាស្រ័យលើភាពប្រែប្រួលនៃហ្សែនរបស់មនុស្ស ។ នៅពេលយើងចាស់ចំនួននៃជាតិខ្លាញ់ melanocytes ដែលទទួលខុសត្រូវចំពោះការផលិតជាតិពណ៌មានការថយចុះ ។ ជាមធ្យម ស្ត្រីចាប់ផ្ដើមមានសក់ស្កូវនៅវ័យចន្លោះពី ៣០ទៅ៤០ឆ្នាំ ។ ប៉ុន្តែក៏មានស្ថានភាពមួយចំនួនទៀតនៅពេលមនុស្សវ័យក្មេង និងក្មេងជំទង់ប្រែជាមានសក់ស្កូវ ។ ជាញឹកញយ សក់ស្កូវមុនវ័យ គឺជាលទ្ធផលនៃភាពតានតឹងខ្លាំង, អស់កម្លាំងរ៉ាំរ៉ៃ និងរបបអាហារមិនល្អ ។
៧. ស្បែកក្បាលរមាស់ ៖ ប្រសិនបើរោគសញ្ញានេះអមមកជាមួយនឹង មុន, ការឈឺចាប់, របកស្បែក ឬរលាក នោះវាអាចជារោគសញ្ញាមួយដែលបង្ហាញឲ្យដឹងថាពិតជាមានអ្វីខុសប្រក្រតីធ្ងន់កើតឡើងហើយ ដូច្នេះអ្នកត្រូវប្រញាប់ទៅជួបពិគ្រោះជាមួយគ្រូពេទ្យជំនាញសើស្បែកឲ្យបានលឿនបំផុត។ ប៉ុន្តែប្រសិនបើការរមាស់មិនអមមកជាមួយនូវអាការផ្សេងទៀតទេ នោះវាការរមាស់ គឺបណ្ដាលមកពីជំងឺប្រព័ន្ធសសៃប្រសាទបង្កឡើងដោយស្ត្រេស ។
៨. សក់ស្ងួតបែកចុង ៖ សក់ស្ងួតអាចបណ្ដាលមកពីកង្វះនូវជាតិប្រូតេអ៊ីន, ជាតិដែក និងជាតិទង់ដែង ។ បញ្ហាសក់ស្ងួតបែកចុងក៏កើតមានជាញឹកញយលើអ្នកដែលមានរបបអាហារតឹងរ៉ឹង និងអ្នកដែលមានបញ្ហាទាក់ទងនឹងប្រព័ន្ធអង់ដូគ្រីន ។ ដូច្នេះដើម្បីចៀសឆ្ងាយពីបញ្ហានេះចូរព្យាយាមទទួលទាន ត្រីក្រហម, ការ៉ុត និងទឹកក្រូចស្រស់ឲ្យបានច្រើន ហើយកុំភ្លេចទទួលទានទឹកធម្មតាឲ្យបានគ្រប់គ្រាន់ផង (ប្រភពពី៖ Health.com.kh) ៕
ចែករំលែកព័តមាននេះ