ខេត្តកំពង់ឆ្នាំង ៖ បើតាមសេចក្តីរាយការណ៍បានឱ្យដឹងថា រថយន្តកែច្នៃមួយគ្រឿងសម្រាប់បុកអណ្តូងទឹកបើកលឿនស្រាប់តែដាច់រ៉ូទីលកង់ខាងស្តាំរ៉េចង្កូតបុកដើមឈើក្រឡាប់សង្កត់ពីលើបុរសម្ចាស់រថយន្ត បណ្តាលឱ្យស្លាប់ភ្លាមៗនៅនិងកន្លែងកើតហេតុ កាលពីម៉ោង៨និង៥០នាទីព្រឹក ថ្ងៃទី៣០ ខែមករា ឆ្នាំ២០១៩ នៅលើកំណាតមផ្លូវជាតិលេខ៥៣A ចំណុចអូរចន្លុះ ស្ថិតក្នុងភូមិអញ្ចាញរូង ឃុំអញ្ចាញរូង ស្រុកបរិបូរណ៍ ។
សមត្ថកិច្ចនគបាលមូលដ្ឋានដែលចុះដល់កន្លែងកើតហេតុបាននិយាយឱ្យដឹងថា ជនរងគ្រោះស្លាប់ក្នុងហេតុការណ៍គ្រោះថ្នាក់ខាងលើនេះឈ្មោះ ម៉ៅ គឿង អាយុ៣៧ឆ្នាំ មុខរបរបដើរជីកអណ្តូងទឹក មានទីលំនៅក្នុងភូមិព្រៃកកោះ ឃុំជ្រៃបាក់ ស្រុករលាប្អៀ ខេត្តកំពង់ឆ្នាំង ។
ប្រភពដដែលបន្ថែមទៀតថា នៅមុនពេលកើតហេតុ គេបានឃើញបុរសរងគ្រោះបើករថយន្តយន្តកែច្នៃសម្រាប់បុកអណ្តូងទឹករបស់ខ្លួនក្នុងល្បឿនលឿន ស្រាប់តែមកដល់កន្លែងកើតហេតុបានដាច់រ៉ូទីលកង់ខាងស្តាំ បណ្តាលឱ្យគោយន្តកែច្នៃនោះរ៉េចង្កូតធ្លាក់ចេញពីផ្លូវទៅបុកនឹងដើមឈើ ដែលជាកន្លែងមានចំណោតខ្ពស់ បណ្តាលឱ្យសង្កត់ជនរងគ្រោះពីលើស្លាប់ភ្លាមៗនៅនិងកន្លែងតែម្តង ។
ក្រោយពេលកើតហេតុសមត្ថកិច្ចទៅដល់ និងធ្វើការពិនិត្យរួចរាល់ឃើញថា ជនរងគ្រោះបានស្លាប់ដោយគ្រោះថ្នាក់ចរាចរណ៍ក្រឡាប់រថយន្តសង្កត់ស្លាប់ខ្លួនឯងមែន ទើបប្រគល់សពជនរងគ្រោះជូនទៅក្រុមគ្រួសាដឹកយកមកលំនៅឋានធ្វើបុណ្យតាមប្រពៃណី ។ ដោយឡែករថយន្តកែច្នៃត្រូវសមត្ថកិច្ចនាំយកមករក្សាទុកនៅអធិការនគបាលស្រុកបរិបូណ៍។
សមត្ថកិច្ចនគរបាលបញ្ជាក់ថា៖ គ្រោះថ្នាក់ចរាចរណ៍ខាងលើនេះ បណ្តាលមកពីការកែច្នៃរថយន្តគ្មានបច្ចេកទេសច្បាស់លាស់ ទើបការបើកបរគ្មានសុវត្ថិភាពបែបនេះ ៕
ចែករំលែកព័តមាននេះ