ទោះបីជាបញ្ហាសក់ស្ដើង ហើយថែមទាំងជ្រុះតែងកើតមានធម្មតាចំពោះបុរស ប៉ុន្តែមនុស្សស្រីក៏អាចជួបប្រទះបញ្ហានេះផងដែរអំឡុងពេលមានផ្ទៃពោះ, ប្រើប្រាស់ថ្នាំណាមួយ, តំណពូជ ឬបញ្ហាសុខភាពណាមួយ ។ មកទល់នឹងពេលបច្ចុប្បន្នផលិតផលថែររក្សាសក់ព្យាបាលសក់ជ្រុះស្ដើងមានមិនខ្វះឡើយ តែវាមានតម្លៃថ្លៃ ហើយមួយចំនួនមានផ្ទុកសារធាតុគីមីប៉ះពាល់ដល់សុខភាព…
ទោះបីជាបញ្ហាសក់ស្ដើង ហើយថែមទាំងជ្រុះតែងកើតមានធម្មតាចំពោះបុរស ប៉ុន្តែមនុស្សស្រីក៏អាចជួបប្រទះបញ្ហានេះផងដែរអំឡុងពេលមានផ្ទៃពោះ, ប្រើប្រាស់ថ្នាំណាមួយ, តំណពូជ ឬបញ្ហាសុខភាពណាមួយ ។ មកទល់នឹងពេលបច្ចុប្បន្នផលិតផលថែររក្សាសក់ព្យាបាលសក់ជ្រុះស្ដើងមានមិនខ្វះឡើយ តែវាមានតម្លៃថ្លៃ ហើយមួយចំនួនមានផ្ទុកសារធាតុគីមីប៉ះពាល់ដល់សុខភាព ។ មានរូបមន្តបែបធម្មជាតិច្រើនណាស់ជួយដោះស្រាយបញ្ហាសក់ស្ដើង ហើយជ្រុះប្រកបដោយប្រសិទ្ធភាពខ្ពស់ ។ គន្លឹះ និងរូបមន្តបែបធម្មជាតិ ងាយៗដោះស្រាយបញ្ហាសក់ស្ដើង ហើយជ្រុះ ៖
១. កាត់បន្ថយការលេងស្តាយសក់ ៖ ស្ត្រីភាគច្រើនចូរចិត្តលេងស្តាយសក់ជាមួយឧបករណ៍កម្ដៅ ផ្សេងៗដូចជា ម៉ាស៊ីនកៀប, ម៉ាស៊ីនផ្លុំសក់ និងមូររួញ ។ កម្ដៅខ្លាំងដែលចេញពីឧបករណ៍ទាំងនេះបំផ្លាញសក់គួរឱ្យព្រួយបារម្ភដែលអាចធ្វើឱ្យក្លាយជាបែកចុង, ផុយស្រួយ និងចាប់ផ្ដើមជ្រុះ ។ ដូច្នេះដើម្បីជាការប្រសើរ ចូរព្យាយាមកាត់បន្ថយការលេងស្តាយសក់បែបមូររួញ ឬកៀបឱ្យត្រង់មកត្រឹម ១ ឬ២ដងបានហើយក្នុងមួយសប្តាហ៍ ដើម្បីទុកពេលឱ្យសក់ជួសជុលខ្លួនឯងបានខ្លះ ។ គួរចាំក្នុងចិត្តថា របៀបនៃការលេងស្តាយសក់ឱ្យស្អាតមានច្រើនណាស់មិនចាំបាច់ត្រូវតែប្រើប្រាស់ម៉ាស៊ីនកៀប ឬផ្លុំឡើយ ។
២. ម៉ាស្សាស្បែកក្បាលជាមួយប្រេង ៖ វិធីព្យាបាលសក់ជ្រុះស្ដើងបែបធម្មជាតិមួយទៀត គឺការប្រើប្រាស់ប្រេងដូចជា ប្រេងអូលីវ និងប្រេងដូងម៉ាស្សាលើស្បែកក្បាល ។ ប្រេងទាំង២នេះមានផ្ទុកសម្បូរទៅដោយអាស៊ីតខ្លាញ់ ល្អៗ រួមទាំងវីតាមីន និងជាតិរ៉ែដែលមិនត្រឹមតែជួយជួសជុលសក់ខូចជ្រុះប៉ុណ្ណោះទេ ប៉ុន្តែក៏ប្រសើរចំពោះស្ថានភាពនៃស្បែកក្បាលផងដែរ ។ អ្វីដែលអ្នកត្រូវធ្វើ គឺគ្រាន់តែកម្ដៅប្រេងរហូតដល់ក្តៅ ឧណ្ហៗ រួចចាប់ផ្ដើមម៉ាស្សាវាលើសក់ និងស្បែកក្បាល ។ រួចហើយទុកចោលសម្រាប់រយៈពេល៤៥នាទីសិន សឹមកក់សម្អាតសក់ជាមួយសាប៊ូដូចធម្មតាជាការស្រេច ។
៣. ប្រើប្រាស់ប្រទាលកន្ទុយក្រពើ ៖ អ្វីដែលអ្នកត្រូវធ្វើ គឺគ្រាន់តែយកជែលប្រទាលកន្ទុយក្រពើប្រមាណជា២ស្លាបព្រាកាហ្វេ មកកិន ឬវឹករហូតក្លាយជាម៉ដ្ឋរលោង សឹមម៉ាស្សាលើស្បែកក្បាលដោយប្រើចុងម្រាមដៃសម្រាប់រយៈពេល៥នាទី ។ ឬួចហើយទុកចោលសម្រាប់រយៈពេល២៥នាទី សឹមលាងសម្អាតចេញជាមួយទឹកក្ដៅ ឧណ្ហៗ។
៤. លាបខ្ទិះដូង ៖ អ្វីដែលអ្នកត្រូវធ្វើ គឺគ្រាន់តែម៉ាស្សាខ្ទិះដូងលើសក់ និងស្បែកក្បាល ហើយទុកចោលសម្រាប់រយៈពេល៣០នាទី សឹមលាងសម្អាតចេញ ។ អនុវត្តរូបមន្តនេះឱ្យបានយ៉ាងហោចណាស់៣ ដងក្នុងមួយសប្តាហ៍ ដើម្បីទទួលបានលទ្ធផលកាន់តែប្រសើរ ។
៥. ស៊ុត ៖ អ្វីដែលអ្នកត្រូវធ្វើ គឺលាយស៊ុត១គ្រាប់ ជាមួយប្រេងអូលីវ១ស្លាបព្រាបាយ ក្នុងចានគោមតូចមួយរហូតដល់ក្លាយជាល្បាយម៉ដ្ឋរលោង ។ លាបល្បាយលើសក់ និងស្បែកក្បាលរហូតដល់សព្វ ។ គ្របសក់ជាមួយមួកពាក់ងូតទឹក ហើយទុកចោលសម្រាប់រយៈពេល ២០នាទី សឹមកក់លាងសម្អាតសក់ចេញជាមួយសាប៊ូ និងទឹកត្រជាក់ជាការស្រេច (ប្រភពពី៖ Health.com.kh) ៕
ចែករំលែកព័តមាននេះ