អ្នកស្និទ្ធនឹងវិស័យកាត់ដេរកម្ពុជាព្រមានថា កម្មករមិនតិចជាង១សែននាក់ឡើយ នឹងបាត់បង់ការងារដោយសារតែការសម្រេចចិត្តរបស់សហភាពអឺរ៉ុបនៅក្នុងការដាក់ពន្ធទៅលើទំនិញនាំចេញពីប្រទេសកម្ពុជា ទៅទីផ្សារអឺរ៉ុបដោយសារការលុបចោលគម្រោងអនុគ្រោះពន្ធ EBA ។
ប្រភពដែលសុំមិនបញ្ចេញឈ្មោះនោះនិយាយថា កម្មករប្រមាណ១,៥សែននាក់ ក្នុងចំណោមកម្មករជិតមួយលាននាក់ អាចនឹងមានបញ្ហាការងារ ។ មនុស្សនៅក្នុងវិស័យកាត់ដេរ កំពុងតែមានការព្រួយបារម្ភអំពីផលប៉ះពាល់ដែលនឹងអាចកើតមានចេញពីការសម្រេចចិត្តរបស់សហភាពអឺរ៉ុប ។
ដូច្នេះ ពួកគេចង់ឱ្យសហភាពអឺរ៉ុបបន្តការអនុគ្រោះពន្ធនេះតទៀត ដើម្បីប្រយោជន៍កម្មករ ក្រុមគ្រួសារ របស់ពួកគេ ដែលជាអ្នកក្រីក្រនិងអ្នកលក់ដូរតូចតាច ដែលពាក់ព័ន្ធផ្សេងទៀត។
បច្ចុប្បន្ន កម្មករអាចនឹងដល់ជិតមួយលាននាក់ទទួលផលពីវិស័យកាត់ដេរ ខណ:ដែលមនុស្សប្រមាណ៣លាននាក់ទៀតទទួលផលប្រយោលពីវិស័យកាត់ដេរនេះ ។
សហភាពអឺរ៉ុបនឹងធ្វើការសម្រេចចិត្តនៅពេល៦ខែ បន្ទាប់ពីការបើកការស៊ើបអង្កេត ខណ:ពេលដែល រដ្ឋាភិបាលកម្ពុជា មានរយ:ពេល៦ខែ ដើម្បីឆ្លើយតប។ ការសម្រេចចិត្តនោះនឹងចូលជាធរមាននៅរយ:ពេល១០ខែក្រោយពីនោះ។
ដូច្នេះ ដំណើរការទាំងមូលនេះអាចនឹងមានរយ:ពេលប្រមានជិត២ឆ្នាំ ចាប់ពីថ្ងៃនៃការចាប់ផ្តើមការស៊ើបអង្កេត ។
ចែករំលែកព័តមាននេះ