តើលោកអ្នកមានឆ្ងល់ទេ ហេតុអ្វីបានជារថយន្តពណ៌សត្រូវប៉ាន់ម្ល៉េះ? តើមានអ្វីពិសេសទៅ ចំពោះរថយន្តពណ៌ស ដែលគ្រប់គ្នាចូលចិត្តប្រើប្រាស់? ខាងក្រោមនេះ គឺជាចំណុចល្អ និង ចំណុចអាក្រក់ របស់វាដែលអាចឱ្យលោកអ្នកធ្វើការពិចារណាថាគួរទិញប្រើឬអត់៖…
តើលោកអ្នកមានឆ្ងល់ទេ ហេតុអ្វីបានជារថយន្តពណ៌សត្រូវប៉ាន់ម្ល៉េះ? តើមានអ្វីពិសេសទៅ ចំពោះរថយន្តពណ៌ស ដែលគ្រប់គ្នាចូលចិត្តប្រើប្រាស់? ខាងក្រោមនេះ គឺជាចំណុចល្អ និង ចំណុចអាក្រក់ របស់វាដែលអាចឱ្យលោកអ្នកធ្វើការពិចារណាថាគួរទិញប្រើឬអត់៖
ចំណុចល្អ ៖
១. ពណ៌សគឺសមជាមួយនឹងរថយន្តគ្រប់ប្រភេទ
បើទោះបីជាអ្នកទិញរថយន្តណាមួយក៏ដោយ មិនថាជាប្រភេទរថយន្តធម្មតា ឬ រថយន្តប្រណិតនោះទេ គឺអ្នកនឹងមានទំនុកចិត្តថា ពណ៌សគឺសាកសមចំពោះគ្រប់រថយន្តទាំងអស់។ សូម្បីតែក្រុមហ៊ុនផលិតរថយន្ត ក៏តែងយករថយន្តពណ៌សដាក់តាំងជាលើកដំបូងដែរ។ ចំពោះរថយន្តដែលទើបនឹងចេញម៉ូដ ហើយមិនទាន់ដាក់លក់ ក៏គេបាញ់ពណ៌សដំបូងគេដែរ ដើម្បីមើលឃើញចំនុចខ្វះខាតក្នុងចង្វាក់ផលិតកម្ម ។
២. តម្លៃមិនសូវធ្លាក់
ពេលអ្នកមានរថយន្តពណ៌សយកទៅលក់ ក្រោយពីបានប្រើប្រាស់មួយរយៈ អ្នកនឹងលក់វាមិនសូវជាខាតនោះទេ ដោយសារតែវាជាពណ៌មិនចេះសាំ ដូចពណ៌ដទៃទៀត ។ ម្យ៉ាងវិញទៀត រថយន្តពណ៌ស ពេលយើងទិញ មិនសូវជាថ្លៃដូចពណ៌ពិសេសៗមួយចំនួននោះទេ ព្រោះតែវាសាមញ្ញ។ ដូចនេះពេលទិញក៏មិនសូវថ្លៃ ពេលលក់ក៏មិនសូវថោក ។
៣. ឆ្កូតមើលមិនសូវដឹង និង អាចការពារកម្តៅ
ពណ៌សគឺជាពណ៌ដ៏ល្អបំផុត សម្រាប់ការផ្លាតកម្តៅ។ ដូចនេះ ចំពោះអាកាសធាតុក្តៅដូចស្រុកយើង ការជ្រើសរើសយករថយន្តពណ៌សមកប្រើប្រាស់ គឺជាជម្រើសដ៏ល្អបំផុត។ ណាមួយវិញទៀត វាក៏អាចបន្លំជាមួយស្នាមឆ្កូតតូចៗខ្លះផងដែរ ប្រសិនបើធៀបជាមួយនឹងរថយន្តពណ៌ខ្មៅ។
ចំណុចអាក្រក់៖
១. ស្នាមប្រឡាក់គឺឃើញច្បាស់ដូចថ្ងៃ
អ្នកប្រហែលជាឧស្សាហ៍ទៅកន្លែងលាងរថយន្តហើយ ប្រសិនបើរថយន្តអ្នកជារថយន្តពណ៌ស ។ នេះក៏ដោយសារតែ វាមិនអាចលាក់បាំងស្នាមប្រឡាក់ភក់ឬដីបានទេ បើធៀបនឹងរថយន្តពណ៌ខ្លាញ់ក្តាម ឬ ពណ៌ក្រម៉ៅ ។
២. ពណ៌សសុទ្ធគឺមិនស្អាតទេ
បើទោះបីជាពណ៌ស គឺពិតជាសាមញ្ញមែន តែយើងមិនគួរយកពណ៌សសុទ្ធនោះទេ ព្រោះថាយើងនៅមានជម្រើសច្រើនទៀត ដែលស្រដៀងទៅនឹងពណ៌ស ហើយមានលក្ខណៈពិសេសជាង។ វាមានដូចជា ពណ៌សបែបលោហៈ ឬ ពណ៌សកាម៉ៃជាដើម ។
៣. មានអ្នកប្រើពណ៌សច្រើនពេក
ប្រសិនបើអ្នកជាមនុស្សមិនសូវចង់ធ្វើអ្វីឱ្យខុសពីគេទេ នោះការជ្រើសរើសយករថយន្តពណ៌ស គឺគ្មានបញ្ហាអ្វីឡើយ ។ តែបើអ្នកចង់មានភាពលេចធ្លោ អ្នកគួរតែជ្រើសរើសពណ៌ផ្សេង ដើម្បីកុំឱ្យស៊ាំភ្នែក ។
សរុបជារួមមក ប្រសិនបើអ្នកមិនចង់លក់ខាតច្រើន ឬ លេចធ្លោខ្លាំងពេកទេ រថយន្តពណ៌សគឺជាជម្រើសដ៏ល្អសម្រាប់អ្នក តែប្រសិនបើអ្នកគិតថា បើជ្រុលជាទិញរថយន្តជិះទៅហើយ មិនត្រូវខ្វល់រឿងខាតច្រើន អ្នកអាចសាកទិញពណ៌ផ្សេងបាន៕
ចែករំលែកព័តមាននេះ