ខេត្តព្រៃវែង ៖ មហាសោកនាដកម្មដ៏គួរឱ្យរន្ធត់និងអាណោចអាធ័មមួយ ដែលមនុស្ស១គ្រួសារមានក្មេងចាស់ប្រុសស្រីសរុបទាំងអស់៦នាក់បានស្លាប់បាត់បង់ជីវិត នៅក្នុងគ្រោះថ្នាក់រថយន្តបុកគ្នានៅលើកំណាត់ផ្លូវជាតិលេខ១ ចន្លោះបង្គោលគីឡូម៉ែត្រលេខ៩១និងលេខ៩២ ក្នុងភូមិជ្រលង ឃុំប្រាសាទ ស្រុកកំពង់ត្របែក កាលពីវេលាម៉ោង១០និង៤៥នាទីយប់ថ្ងៃទី២៨ ខែមករា ។
មន្ត្រីសមត្ថកិច្ចបានឲ្យដឹងថា នាវេលាម៉ោងជាង១០យប់នោះ រថយន្តយីឌុបដឹកស្រូវ១គ្រឿងពាក់ផ្លាកលេខខម០១-៩៤៥៧ បើកបរក្នុងទិសដៅពីខាងកើតទៅខាងលិច ។ ពេលមកដល់ចំណុចខាងលើ ស្រាប់តែជ្រុលចង្កូតទៅបុករថយន្តហាយឡែនឌ័រ១គ្រឿង ពាក់ផ្លាកលេខភ្នំពេញ ២AI-៨០៩៦ ដែលធ្វើដំណើរបញ្ច្រាសទិសគ្នាពេញទំហឹង លាន់ឮដូចរន្ទះខែប្រាំង បណ្តាលឱ្យរថយន្តទាំង២គ្រឿងធ្លាក់ចេញពីផ្លូវក្រឡាប់ចូលទៅក្នុងដីស្រែ ។
គ្រោះថ្នាក់នេះ បណ្តាលឱ្យមនុស្សក្មេងចាស់ប្រុសស្រីចំនួន៦នាក់ ដែលជិះនៅក្នុងរថយន្តហាយឡែនឌ័រស្លាប់បាត់បង់ជីវិតទាំងអស់ ។ ចំណែកអ្នកបើកបររថយន្តយីឌុបដឹកស្រូវរត់គេចខ្លួនបាត់ ដោយបន្សល់ទុករថយន្តនិងបាវស្រូវ រួមទាំងគំនរស្រូវរាយប៉ាយពេញផ្លូវនិងក្នុងស្រែ ។
ប្រភពដដែលឱ្យដឹងទៀតថា ជនរងគ្រោះទាំង៦នាក់ដែលស្លាប់បាត់បង់ជីវិតត្រូវបានស្គាល់អត្តសញ្ញាណគឺ ១-ឈ្មោះ ឃឹម គា ភេទប្រុស អាយុ៥០ឆ្នាំ ២-ឈ្មោះ មោគ សុភាព ភេទស្រី អាយុ៤៩ឆ្នាំ ៣-ឈ្មោះ ម៉ែន សៅសុម៉េតធា ភេទប្រុស អាយុ២៨ឆ្នាំ ៤-ឈ្មោះ ឡាយ ស្រីនិចភេទស្រី អាយុ២៤ឆ្នាំ ៥-ឈ្មោះ សាក់ វណ្ណីភេទប្រុស អាយុ២៨ឆ្នាំ និង៦-ឈ្មោះ ឌី វណ្ណៈភេទប្រុស អាយុ១ឆ្នាំកន្លះ ។
ទាំង៦នាក់មានទីលំនៅក្នុងភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង គឺជាក្រុមគ្រួសារតែមួយ ដែលខ្លះជាសាច់ថ្លៃក្នុងនោះជនរងគ្រោះឈ្មោះ ម៉ែន សៅសុម៉េតធា ជានាយប៉ុស្តិ៍នគរបាលរដ្ឋបាលឃុំថ្កូវ ស្រុកកំពង់ត្របែករួមទាំងប្រពន្ធនិងកូនផងដែរ ។
ក្រោយកើតហេតុ សមត្ថកិច្ចទាំងនគរបាល និងអាវុធហត្ថស្រុក បានទៅដល់និងនាំយកសពជនរងគ្រោះទៅដាក់នៅគេហដ្ឋាន ដើម្បីឱ្យសាច់ញាតិរៀបចំធ្វើបុណ្យតាមប្រពៃណី និងបាននាំយករថយន្តទាំង២គ្រឿងទៅរក្សាទុករង់ចាំដោះស្រាយទៅតាមនីតិវិធី ។
តាមប្រភពព័ត៌មានឱ្យដឹងថា អ្នកជិះក្នុងរថយន្តហាយឡែនឌ័រ ទំនងជាវិលត្រឡប់មកផ្ទះវិញ តែមិនដឹងថាមកពីណាទេ ហើយពីចំណុចកើតហេតុទៅលំនៅឋានជនរងគ្រោះមានចម្ងាយប្រមាណ៥ទៅ៦គីឡូម៉ែត្រប៉ុណ្ណោះ ពោលគឺជិតទៅដល់ផ្ទះហើយ មិនគួរជួបគ្រោះអកុសលបែបនេះឡើយ ។ សូមចូលរួមមរណទុក្ខដ៏ធ្ងន់ធ្ងរនេះផង ជាមួយក្រុមគ្រួសារនៃសព ។
រថយន្តដឹកស្រូវមួយគ្រឿងទៀតក្រឡាប់ចាក់ស្រូវសង្កត់មនុស្ស ស្លាប់២នាក់របួស២នាក់ ក្នុងហេតុការណ៍ដាច់ដោយឡែកមួយទៀតរថយន្តយីឌុបដឹកស្រូវ១គ្រឿង សង្ស័យអ្នកបើកបរងោកមួយភាំង បានរេចង្កូតធ្លាក់ចេញពីផ្លូវក្រឡាប់បះជើងមួយចំហៀង ចាក់ស្រូវខ្ចាយសង្កត់អ្នកជិះលើបាវស្រូវស្លាប់២នាក់ និងរបួស ធ្ងន់២នាក់ ។ ហេតុការណ៍គ្រោះថ្នាក់នេះ បង្កឲ្យមានការភ្ញាក់ផ្អើលឡើងកាលពីវេលាម៉ោង៣និង៥នាទីទៀបភ្លឺថ្ងៃទី២៩ ខែមករា នៅតាមផ្លូវជាតិលេខ៨ ត្រង់ចំណុចភូមិព្រហ្ម ឃំុព្រៃព្នៅ ស្រុកពារាំង ខេត្ត ព្រៃវែង ។
តាមរបាយការណ៍របស់សមត្ថកិច្ចនគរបាលបានឲ្យដឹងថា ជនរងគ្រោះដែលស្លាប់និងរបួសទាំង៤នាក់ មាន ៖១-ឈ្មោះ លី ណូ ភេទស្រី អាយុ៣៥ឆ្នាំស្លាប់នៅនឹងកន្លែង២-មិនទាន់ស្គាល់ឈ្មោះ ភេទប្រុស ស្លាប់នៅនឹងកន្លែង៣-ឈ្មោះ សាំង កុសល ភេទប្រុស អាយុ៣៨ឆ្នាំ របួសធ្ងន់ និង៤-ឈ្មោះ គក់ កូ ភេទប្រុស អាយុ៣១ឆ្នាំ របួសធ្ងន់ ។
ជនរងគ្រោះទាំង៤នាក់ រស់នៅភូមិព្រៃខ្លា ឃុំព្រែកកណ្តៀង ស្រុកពាមរក៍ ខេត្តព្រៃវែងជាមួយគ្នា ។
របាយការណ៍បានឲ្យដឹងទៀតថា មុនពេលកើតហេតុ ជនរងគ្រោះទាំង៤នាក់បានរួមដំណើរជាមួយរថយន្តដឹកស្រូវពេញ១គ្រឿងម៉ាកហ៊ីយ៉ាន់ដាយ ពណ៌សលាយក្រហម ពាក់ផ្លាកលេខព្រះស៊ីហនុ ៣A-០៤៧៣ អ្នកបើកបរមិនស្គាល់ឈ្មោះ ធ្វើដំណើរតាមផ្លូវជាតិលេខ៨ពីខាងលិចទៅខាងកើត ។
លុះទៅដល់ចំណុចខាងលើ សង្ស័យអ្នកបើកបរងោកមួយភាំង ទើបបានជារថយន្តរេចង្កូតធ្លាក់ចុះទៅក្រោមចិញ្ចើមថ្នល់ផ្អៀងចាក់ស្រូវចោលសង្កត់មនុស្សស្លាប់២នាក់និង២នាក់ទៀតរងរបួសធ្ងន់តែម្តង ។ ក្រោយកើតហេតុ អ្នកបើក បររថយន្តបានរត់គេចខ្លួនបាត់ ។
ភ្លាមៗនោះដែរ សមត្ថកិច្ចបានចុះទៅដល់ទូរស័ព្ទហៅរថយន្តសាមុយមកដឹកអ្នករបួសទៅព្យាបាលនៅមន្ទីរ ពេទ្យបង្អែកស្រុកពារាំង។ចំណែកសពជនរងគ្រោះ កំពុងធ្វើការស្រាវជ្រាវរកក្រុមគ្រួសារមកទទួលយកទៅធ្វើបុណ្យតាមប្រពៃណី ។ រីឯរថយន្តនិងស្រូវ ក៏សមត្ថកិច្ចទាក់ទងហៅរថយន្តស្ទូចដឹកយកទៅរក្សាទុកនៅអធិការដ្ឋាននគរបាលស្រុក ដើម្បីបំពេញសំណំុរឿងតាមនីតិវិធី ៕
ចែករំលែកព័តមាននេះ