ខេត្តព្រៃវែង ៖ បុរសម្នាក់បានយកស្នឹងគោមុតស្រួចចាក់ទៅលើបុរសម្នាក់ទៀត បណ្តាលអោយរងរបួស ហើយជនសង្ស័យក៏រត់គេចខ្លួនបាត់ ដែលហេតុការណ៍នេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី២៨ មករា នៅចំណុចផ្ទះរបស់ឈ្មោះ សាញ់ ស្ថិតក្នុងភូមិបឹងផ្សោត…
ខេត្តព្រៃវែង ៖ បុរសម្នាក់បានយកស្នឹងគោមុតស្រួចចាក់ទៅលើបុរសម្នាក់ទៀត បណ្តាលអោយរងរបួស ហើយជនសង្ស័យក៏រត់គេចខ្លួនបាត់ ដែលហេតុការណ៍នេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី២៨ មករា នៅចំណុចផ្ទះរបស់ឈ្មោះ សាញ់ ស្ថិតក្នុងភូមិបឹងផ្សោត ឃុំពាមមានជ័យ ស្រុកពាមរក៍ ។
សមត្ថកិច្ចបានអោយដឹងថា ជនសង្ស័យខាងលើឈ្មោះ ហុង នី ភេទប្រុស អាយុ២៣ឆ្នាំ មានទីលំនៅក្នុងភូមិកើតហេតុ ចំណែកជនរងគ្រោះឈ្មោះ យ៉ិន ចិត្រា ភេទប្រុស អាយុ៣០ឆ្នាំ បានរងរបួសក្រោមឆ្អឹងជំនីរខាងឆ្វេង និងត្រូវបានក្រុមគ្រួសារនាំយកទៅព្យាបាលនៅមន្ទីរពេទ្យភ្លាមៗក្រោយពីកើតហេតុ។
ប្រភពដដែលនេះបានបញ្ជាក់ថា ជនសង្ស័យនិងជនរងគ្រោះជាអ្នកភូមិជាមួយគ្នា ហើយធ្លាប់ផឹកស៊ីជាមួយគ្នាជារឿយៗ ហើយមិនដែលមានទំនាស់នឹងគ្នានោះទេ ប៉ុន្តែនៅមុនពេលកើតហេតុនោះ ជនសង្ស័យបានមកហៅជនរងគ្រោះដែលកំពុងលេងបុកប៊ីយែរអោយទៅផឹកជាមួយខ្លួន ប៉ុន្តែជនរងគ្រោះមិនព្រមទៅ ទើបធ្វើអោយជនសង្ស័យខឹង ហើយក៏ទៅដកស្នឹងគោដែលគេដំជាប់ដីនៅក្បែនោះចាក់ទៅលើជនរងគ្រោះដែលកំពុងលេងបុកប៊ីយែរ បណ្តាលអោយរងរបួសក្រោមឆ្អឹងជំនីរផ្នែកខាងឆ្វេង ហូរឈាមជោកខ្លួន ភ្លាមៗនោះក៏បង្កឱ្យមានការភ្ញាក់ផ្អើលកើតឡើង ហើយជនសង្ស័យក៏បានរត់គេចខ្លួនបាត់ស្រមោលតែម្តង។
ទោះបីជាយ៉ាងណា ពេលនេះកំលាំងសមត្ថកិច្ចកំពុងតាមរកចាប់ខ្លួនជនសង្ស័យ ដើម្បីយកមកចាត់ការទៅតាមនីតិវិធី ចំណែកជនរងគ្រោះកំពុងសម្រាកព្យាបាលនៅមន្ទីរពេទ្យ៕
ចែករំលែកព័តមាននេះ