រាជធានីភ្នំពេញ ៖ រថយន្តម៉ាកហ៊ីយ៉ាន់ដាយដឹកត្រី១គ្រឿងបានបើកបរក្នុងល្បឿនលឿនហើយជ្រុលទៅកៀររថយន្តម៉ាកហាយឡែនឌ័រ១គ្រឿងទៀតពីក្រោយបណ្ដាលឲ្យរថយន្តហាយឡែនឌ័រនោះរងការខូចខាតអស់មួយចំហៀងខ្លួន ប៉ុន្តែសំណាងល្អមិនបានបង្កឲ្យអ្នកបើកបររងរបួសនោះឡើយ ។
ឧប្បត្តិហេតុនោះបានកើតឡើងកាលពីវេលាម៉ោង៦និង២០នាទីព្រឹក ថ្ងៃទី២៩ ខែមករា ឆ្នាំ២០១៩ នៅលើកំណាត់មហាវិថីឈ្នះឈ្នះ ហៅផ្លូវអូរដឹមកប់ស្រូវ ត្រង់ចំណុចមុខក្លោងទ្វារវត្តភ្នៀតសម្ពលី ស្ថិតនៅក្នុងភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ ។
រថយន្តបង្កម៉ាកហ៊ីយ៉ាន់ដាយ ពណ៏ស ពាក់ផ្លាកលេខ ភ្នំពេញ 2J-9365 ជារថយន្តដឹកត្រីចំណែករថយន្តដែលរងការខូចខាតមួយចំហៀងខ្លួននោះម៉ាកហាយឡែនឌ័រ ពណ៍ស ស៊េរីឆ្នាំ២០០៤ ពាក់ផ្លាកលេខ ភ្នំពេញ 2AZ-8767 ហើយអ្នកបើកបររថយន្តទាំង២គ្រឿងនេះមិនបានប្រាប់ឲ្យដឹងឈ្មោះឡើយ ។
អ្នកភូមិបាននិយាយាថា រថយន្តម៉ាកហាយឡែនឌ័រនោះម្ចាស់ទើបនឹងទិញបានរយៈពេល៣ខែប៉ុណ្ណោះ ដោយមិនទាន់ជិះឆ្អែតផងពេលនេះស្រាប់តែមកជួបឧប្បត្តិហេតុបែបនេះតែម្ដង ។
នៅមុនពេលកើតហេតុអ្នកបើកបរបានបើកដឹកកូនចេញពីផ្ទះនៅម្ដុំភូមិកើតហេតុទៅសាលារៀនជម្ពូវ័នដោយបានធ្វើដំណើរតាមផ្លូវបេតុងវត្តភ្នៀតសម្ពលីក្នុងទិសដៅពីលិចទៅកើត លុះឡើងដល់លើមហាវិថីឈ្នះឈ្នះបានបត់ក្បាលសម្ដៅទៅទិសខាងត្បូងវិញ ស្របពេលនោះរថយន្តដឹកត្រីបើកបរក្នុងល្បឿនលឿនពីទិសខាងជើងទៅត្បូងស្របគ្នាទៅដល់កៀរពីក្រោយទាំងកម្រោល ។
ប្រភពដដែលបានបន្តទៀតថា ខណៈនោះរថយន្តដឹកត្រីបានជ្រុលបុកឡើងលើសួនច្បារពុះចែកទ្រូងផ្លូវបណ្ដាលឲ្យបែកកង់មុខខាងឆ្វេង១គ្រាប់ទៅមុខលែងរួច ។ ក្រោយពីឧប្បត្តិហេតុកើតឡើងអ្នកបើកបររថយន្តដឹកត្រីបានដៀលអ្នកបើករថយន្តហាយឡែនឌ័រថា«បើកឡានឆ្កួតៗ» និងនិយាយពាក្យដដែលៗនេះច្រើនដងដែលជាហេតុធ្វើឲ្យស្ទើរតែផ្ទុះហិង្សាទៅហើយ ។
ប៉ុន្តែក្រោយមកទៀតភាគីទាំងសង្ខាងបានសម្របសម្រួលគ្នាហើយភ្លាមៗនោះអ្នកបើកបររថយន្តដឹកត្រីបានសងថ្លៃខូចខាតត្រឹម៥០ដុល្លារប៉ុណ្ណោះ ប៉ុន្តែខាងអ្នករថយន្តហាយឡែនឌ័រមិនព្រមឡើយ ។ រហូតដល់នគរបាលប៉ុស្តិ៍សំរោងក្រោមទៅដល់ទើបមានការសម្រួលគ្នាជាថ្មីហើយខាងភាគីរថយន្តដឹកត្រីព្រមសងចំនួន៣៥០ដុល្លារជាការបញ្ចប់រឿង ៕
ចែករំលែកព័តមាននេះ