ខេត្តកំពង់ឆ្នាំង ៖ សាលាបឋមសិក្សាសេះស្លាប់ មិនខុសអីទៅនឹងប្រជាពលរដ្ឋជាង២០០គ្រួសារដែលរស់នៅលើផ្ទះបណ្តែតទឹក ហើយត្រូវបានបន្លាស់ទីអោយមករស់នៅលើគោកដែរ ។ ប៉ុន្តែអ្វីជាការសំខាន់គឺបញ្ហាការប្រឈមដោយការខ្វះខាតទឹកស្អាតប្រើប្រាស់ និងបង្គន់អនាម័យជាដើមដែលទាំងពីរចំណុចនេះលោកគ្រូអ្នកគ្រូ និងសិស្សានុសិស្សត្រូវការជាចាំបាច់ និងសំណូមពរដល់ក្រសួងពាក់ព័ន្ឋពិសេសប្រមុខរាជរដ្ឋាភិបាល មេត្តាអន្តរាគមន៍ដោះស្រាយជាបន្ទាន់ផង ។
លោកគ្រូបង្រៀនថ្នាក់ទី៣ រួមនឹងសិស្សនៃសាលាបឋមសិក្សាសេះស្លាប់ ស្ថិតក្នុងភូមិសេះស្លាប់ ឃុំឆ្នុកទ្រូ ស្រុកបរិបូរណ៌ បានរាប់រាប់ថា ចាប់តាំងពីសាលាបានបន្លាស់ទីពីក្នុងទឹកអោយមករស់នៅលើគោកដូចប្រជាពលរដ្ឋក្នុងភូមិសេះស្លាប់ដែររួចមក គឺជួបបញ្ហាប្រឈមជាច្រើន ប៉ុន្តែបញ្ហាសំខាន់ជាងគេគឺអណ្តូងទឹក ព្រោះថា ទាំងសិស្ស និងគ្រូត្រូវការទឹកស្អាតជាប្រចាំទាំងការទទួលទានដាំដំណាំ អនាម័យដៃជើង និងទឹកសម្រាប់បន្ទប់ទឹកជាដើម ។ ជាងនេះទៅទៀតគឺបង្គន់អនាម័យនេះតែម្តង ដែលបច្ចុប្បន្នគ្មានទាស់តែសោះ ។
បច្ចុប្បន្ននេះសាលាបានសុំទឹកពីប្រជាពលរដ្ឋអ្នកមានអណ្តូងទឹកដោយការលំបាក ចំណែកឯសិស្សវិញពេលត្រូវការបន្ទោបង់គឺត្រូវរត់ចូលព្រៃចម្ងាយឆ្ងាយ ដែលបញ្ហានេះធ្វើអោយប៉ះពាល់ដល់ការសិក្សា បរិដ្ឋាន និងសុខមាលភាពផងដែរ ។
ហេតុនេះហើយក្នុងនាមលោកគ្រូ អ្នកគ្រួ សិស្សានុសិស្ស ក្នុងសាលាបឋម សិក្សា សូមសំណូមពរ ដល់អាជ្ញាធរខេត្ត មន្ទីរជំនាញពាក់ព័ន្ឋ និងពិសេសប្រមុខរាជរដ្ឋាភិបាល សូមមេត្តាជួយ ដោះស្រាយ បញ្ហាទុកលំបាក របស់លោកគ្រួអ្នកគ្រួ និងសិស្ស សាលាបឋមសិក្សាសេះស្លាប់នេះផង ។
ទាក់ទងនឹងសំណូមពរខាងលើនេះ លោក ស៊ឹម សំបូណា នាយកសាលាបឋមសិក្សាសេះស្លាប់ បានឱ្យដឹងថា សាលាបឋមសិក្សាសេះស្លាប់មានអគារឈើចំនួន២ខ្នង៤បន្ទប់ សំរាប់បង្រៀនសិស្សចំនួន៦ថ្នាក់ពីថ្នាក់ទី១ដល់ទី៦ និងសិស្សប្រុសស្រីសរុបចំនួន ជាង២០០នាក់ និងគ្រូបង្រៀនចំនួន៤នាក់ ដោយត្រូវបង្រៀននៅពេលព្រឹក៣ថ្នាក់ និងនៅពេលរសៀល៣ថ្នាក់ ។
ចាប់តាំងពីសាលាឡើងមកបោះទីតាំងបង្រៀននៅលើកគោក សាលាពុំទាន់មានអណ្ដូងទឹកស្អាត និងបង្គន់អនាម័យសម្រាប់ប្រើប្រាស់នៅឡើយទេ ហេតុនេះហើយលោកសូមអោយក្រសួងអប់រំ យុវជននិងកីឡា មេតា្តជួយគិតគូបញ្ហានេះផង ៕
ចែករំលែកព័តមាននេះ