រាជធានីភ្នំពេញ ៖ អតីតប្រធានគណបក្សសង្គ្រោះជាតិលោក សម រង្ស៊ី បានអះអាងថា នឹងធ្វើសកម្មភាពប្រឆាំងនឹងរាជរដ្ឋាភិបាលកម្ពុជារហូត ពិសេសនោះស្របពេលដែលអន្តរជាតិកំពុងដាក់ទណ្ឌកម្មមកលើកម្ពុជា ។
យោងតាមវិឌីអូឃ្លីបបង្ហោះនៅថ្ងៃទី២៩ មករានេះ នៅចំពោះមុខសកម្មជននៅទីក្រុងយូស្តុន សហរដ្ឋអាមេរិក លោក សម រង្ស៊ី បានអំពាវនាវឲ្យប្រជាពលរដ្ឋទាំងប្រុសទាំងស្រីទាំងចាស់ទាំងក្មេង ចាប់ផ្តើមធ្វើចលនាបញ្ចុះបញ្ចូលទាហាន និងប៉ូលិសដែលជាសាច់ឈាមក្នុងគ្រួសារនីមួយៗ ឲ្យឈប់ការពាររបបផ្តាច់ ហ៊ុន សែន ហើយបែរចិត្តមកការពារប្រជារាស្ត្រវិញដែលទាមទារសេរីភាព និងយុត្តិធម៌ ។
លោក សម រង្ស៊ី ក៏បានបញ្ជាក់យ៉ាងដូច្នេះថា «ខ្ញុំក្នុងនាមជាប្រធានស្តីទីគណបក្សខ្ញុំត្រូវតែដឹកនាំឲ្យមានសកម្មភាពឲ្យមានចលនាឲ្យមានការងើបឈរតតាំងជាមួយ ហ៊ុន សែន ពេលដែលហ៊ុន សែន កំពុងប្រឈមពីប្រតិកម្មអន្តរជាតិ ។ ខណៈដែលអន្តរជាតិកំពុងមានគំនាប និងពីប្រទេសគ្រប់ទិសទីហើយខ្ញុំនឹងទៅដឹកនាំនៅក្នុងប្រទេសកម្ពុជាតែម្តង» ។
អតីតមេបក្សប្រឆាំងបានអះអាងថា លោកនឹងវិលត្រឡប់ចូលមកកម្ពុជា នៅក្នុងឆ្នាំ២០១៩នេះ ។ លោកថា «ជាកាតព្វកិច្ចនៅឆ្នាំ២០១៩នេះយើងនឹងឆ្លៀតឱកាសនេះ យើងមិនចាប់យក ដើម្បីកុំរឿងប្រវត្តិស្តីឲ្យ ហើយកូនចៅជំនាន់ក្រោយស្តីឲ្យនោះទេ» ។ លោកសម រង្ស៊ី ក៏បានលើកឡើងពីបញ្ហាកងទ័ពនៅកម្ពុជាផងដែរ ។ លោកថា នឹងទាក់ទងជាមួយម្តាយឪពុកកងទ័ព ដែលជាកូនខ្មែរ ហើយមានការឈឺចាប់ក្នុងរបបគ្រប់គ្រងរបស់សម្តេចតេជោ ហ៊ុន សែន ទាក់ទង និងការយកដីធ្វើឲ្យមានចំណាកស្រុកទៅធ្វើការនៅក្រៅប្រទេសព្រមទាំងមានការគាបសង្កត់គ្រប់រូបភាព ។
ជាមួយគ្នានោះដែរ លោក សម រង្ស៊ី ក៏ប្រកាសថា លោកនឹងបូជាជីវិត ដើម្បីលទ្ធិប្រជាធិបតេយ្យនៅកម្ពុជា ដើម្បីផ្លាស់ប្តូរអំណាចផ្តាច់ការនៅកម្ពុជាផងដែរ ។ ចំពោះការលើកឡើងរបស់លោកសម រង្ស៊ី ត្រូវបានអ្នកនាំពាក្យគណបក្សប្រជាជនកម្ពុជាលោក សុខ ឥសាន បានប្រតិកម្មុយ៉ាងខ្លាំង និងនិយាយដោយប្រើសំដីធ្ងន់ៗយ៉ាងដូច្នេះថា «បូជាជីវិតអីអាអាចម៍គ្រាន់តែជាប់គុកមិនហ៊ានផង» ។
លោកសុខ ឥសាន បានឲ្យដឹងនៅថ្ងៃទី២៩ មករាថា គួរឲ្យខ្ពើមរអើមណាស់ ដែលទណ្ឌិតមួយនោះប្រកាសថា ហ៊ានបូជា ជីវិតដើម្បីលទ្ធិប្រជាធិបតេយ្យនោះបើគ្រាន់តែវិលចូលស្រុកប្រកាសមិនដឹងប៉ុន្មានដងទេ តែនៅតែមិនហ៊ានមកផង តើឲ្យជឿម្ត៉េចបានទៅ ។ ដូច្នេះគួរឲ្យខ្ពើមណាស់ដែលទណ្ឌិតរូបនេះនិយាយច្រំដែលៗ គួរឲ្យជ្រិញមែនទែន ។
លោកបញ្ជាក់ថា« បើថាមកមកតែម្តងទៅ មិនបាច់និយាយច្រើនទេអាអាចម៍ ។ ក្រែងប្រកាសថា មកចូលស្រុក ដើម្បីប្រមូលលុយ៣០ម៉ឺនដុល្លាទេដឹង ? ដូច្នេះស្នើបងប្អូននៅក្រៅប្រទេសជួយបរិច្ចាគផងកំពុងខ្វះ៣០ម៉ឺនដុល្លារ ដើម្បីបន្ថែមលើលុយទូរទស្សន៍ ថ្ងៃលិច៨០ម៉ឺន ដែលបាត់ដំណឹងឈឹងនោះ »៕
ចែករំលែកព័តមាននេះ